«Հաց բերողի» գործով սեպտեմբերին կունենանք հստակ պատկեր. ՀՔԾ պետ

«Հաց բերող» Արթուր Սարգսյանի գործը ժամանակին լիարժեք չի քննվել: Այս մասին, այսօր՝ օգոստոսի 30–ին, Կառավարության նիստից հետո լրագրողների հետ ճեպազրույցում ասաց ՀՔԾ պետ Սասուն Խաչատրյանը։

Նա տեղեկացրեց, որ նշանակվել է հանձնաժողովային դատաբժշկական փորձաքննություն, ներգրավվել են լավագույն մասնագետները։ «Փորձաքննության արդյունքները դեռեւս չենք ստացել, ակնկալում ենք ստանալ սեպտեմբերի կեսերին  եւ հուսով եմ սեպտեմբերի կեսերին արդեն կունենանք հստակ պատկեր»,–ասաց Սասուն Խաչատրյանը։

Լրագրողի ճշտող հարցի՝ այսինքն, հիմք չի՞ եղել նրան կրկին ձերբակալելու, ՀՔԾ պետը պատասխանեց. «Ես այդպիսի բան չասացի, եկեք սպասենք փորձագետների եզրակացությանը։  Շատ հրապարակային, շատ թափանցիկ այդ գործը կքննվի, ես խոսք եմ տալիս։ Փորձագետների եզրակացությունից հետո որոշակի քննչական գործողություններ կատարելու անհրաժեշտություն կլինի, ձեզ ամբողջ ծավալով կտրվի տեղեկատվություն»։

Նշենք, որ Արթուր Սարգսյանը ձերբակալվել է 2016-ի հուլիսի 31-ին, ապա կալանավորվել է: Վեց ամիս անց, դեկտեմբերի 31-ին, դատախազի որոշմամբ նրա խափանման միջոց կալանքը փոխարինվել է չհեռանալու ստորագրությամբ: Արթուր Սարգսյանը 2017-ի մարտի 16-ին մահացել է հիվանդանոցից դուրս գրվելուց հետո: Հիվանդ մարդու նկատմամբ իրավապահ մարմինների գործողությունների իրավաչափության հարցում կասկածների հետեւանքով փորձաքննություն է նշանակվել;