Թաթուլ Մանասերյան. «Կան մարդիկ, ովքեր մոլորեցնում են հանրությանն ու զբաղվում մանիպուլյացիաներով». «Փաստ»

«Փաստ» օրաթերթը գրում է.

Կառավարության տնտեսական քաղաքականության առումով այս փուլի համար տնտեսագետ Թաթուլ Մանասերյանի համար երկու կարևոր ուղենիշ կա: Գնահատելով տնտեսական իրավիճակը` «Փաստ»–ի հետ զրույցում տնտեսագետը նախ առանձնացրեց կադրային քաղաքականությունը:

«Հիմնական ուղենիշները մի քանիսն են, բայց կարևոր է կադրային քաղաքականությունը: Հաշվառել ճիշտ կադրերին և օգտագործել նրանց ներուժը: Խոսքն առաջին հերթին երիտասարդ ու բանիմաց կադրերին է վերաբերում: Բայց չպետք է մոռանալ նաև միջին և ավագ սերնդի այն ներկայացուցիչներին, ովքեր կարող են օգտակար լինել ոչ միայն կառավարության ծրագրերի իրականացմանը, այլև երկրի տնտեսական գլոբալ զարգացմանը, իրավիճակի առողջացմանը և այլն: Պետք է հետևողականորեն հաշվառել օգտակար գործողության գործակից ունեցող մասնագետներին: Նրանց, ովքեր իրականում ոչ թե վերցնելու, այլև տալու բան ունեն: Կարելի է հետևողականորեն օգտագործել հենց կենսաթոշակային բարեփոխումները. կան մարդիկ, որոնց չեմ ուզում կոչել հակահեղափոխականներ, բայց նրանք արտաքուստ փորձում են շատ բանիմաց երևալ, այնինչ անցյալում իրենց դրսևորած վարքագիծն այլ բան է հուշում: Այդ մարդիկ վնասից բացի ոչինչ չեն կարող բերել: Նրանք մոլորության են մատնում հանրությանն ու զբաղվում մանիպուլ յացիաներով»:

Տնտեսագետից հետաքրքրվեցինք`այդ մարդիկ այժմ պետական ապարատո՞ւմ են, անուններ չի՞ ցանկանում տալ:

«Կարևոր չէ` որտեղ են, բայց կարևոր է այն, որ ճիշտը ստից կարողանանք տարբերել: Պետք է թույլ չտանք, որ կեղծ մարգարեներն իրենց պսևդո ինտելեկտով վնասեն, ցույց տան, թե իբր փորձում են օգնել կառավարությանը կամ ժողովրդին: Անուններ տալու կարիք չունեմ: Փոքր երկրում, ինչպիսին Հայաստանն է, բոլորս միմյանց ճանաչում ենք: Առաջին հերթին իրար ճանաչում ենք մեր գործերով: Կառավարությունը շատ սթափ է գնահատում իրավիճակը, պարզապես կցանկանայի, որ տնտեսական բլոկն ավելի ուժեղանար, հզորանար բանիմաց մարդկանցով: Խոսքը միայն պաշտոնյաների մասին չէ: Կարող են լինել մարդիկ, տնտեսագիտական հանրության ներկայացուցիչներ, ովքեր կոնկրետ գիտականորեն հիմնավորված առաջարկներով, ծրագրերով կօժանդակեն կառավարությանը. մինչ օրս Հայաստանի որևէ կառավարություն չի կարողացել օգտագործել Հայաստանի գիտական ներուժը: Կարծում եմ` ներկայիս կառավարությունը նման քայլ կանի և հատկապես հաշվի կառնի պարապուրդի մատնված մասնագետներին»,–պատասխանեց մեր զրուցակիցը:

Նա կարևորեց նաև ֆինանսական կայունության ապահովման շարունակական գործընթացը:

«Պետք է ներդրումների համար առողջ միջավայր ստեղծել, որտեղ, առաջին հերթին, կքաջալերվեն ներքին ներդրումները: Պարտադիր չէ, որ մենք անընդհատ օտարերկրյա ներդրումներ ակնկալենք: Շատ կարևոր է, որ տեղաբնակները ևս սկսեն ներդրումներ անել: Մյուս խնդիրն, իհարկե, տնտեսական սպառնալիքների վնասազերծումն է: Այսինքն` ապահովել էներգետիկ, ֆինանսական, ներդրումային, պարենային անվտանգություն: Մինչև այս բոլոր բաղադրիչները չապահովենք, զարգացումը կա՛մ չի լինի, կա՛մ թերի կլինի»:

Թաթուլ Մանասերյանի խոսքով` իշխանափոխության, ինչպես նաև նախընտրական փուլերում ստեղծվում է մի իրավիճակ, երբ որոշ ժամանակ ներդրողները ձեռնպահ են մնում ներդրումներ անել:

«Սպասում են` մինչև հստակություն մտնի:

Տվյալ պարագայում նախընտրական փուլի մասին դեռ վաղ է խոսել: Իսկ հետհեղափոխական փուլի առումով արդեն բազմաթիվ ներդրողներ կան, ովքեր ծրագրեր են առաջարկել: Կարծում եմ` այդ առաջարկները պայմանավորված են այն վստահությամբ, որը ներշնչում է ներկայիս կառավարությունը: Տնտեսության առումով մի քանի դիտարկումներ կարելի է անել, բայց պետք է հաշվի առնել, որ արդյունքներ ակնկալելու համար մի քիչ ավելի երկար ժամանակահատված է պետք: Տնտեսությունը բարդ օրգանիզմ է` մեկ կամ երկու քայլերով չենք կարող գնահատել իրավիճակը»,–ասաց նա` ընդգծելով, որ, այնուամենայնիվ, լավատես է:

«Համաշխարհային տնտեսության մեջ բացառիկ երևույթ է այն, որ հեղափոխությունից հետո ազգային դրամը կայուն է մնում: Սա առաջին գործոնն է: Երկրորդը, կարծում եմ, քաղաքական կամքն է կենսաթոշակային բարեփոխումների իրագործման մասով: Խոսքը պարտադիր կուտակայինի մասին է: Այդ առումով բավականին բարձր եմ գնահատում նոր կառավարության քայլերը: Հուսով եմ` արդյունք կտա, որովհետև այստեղ առանցքային դեր է խաղալու վստահության բաղադրիչը»,–եզրափակեց տնտեսագետը: