Ճանապարհ փակելը հարցի լուծում չէ, պետք է տարբերակ գտնենք, որ և՛ բնակիչները գոհ լինեն, և՛ բնապահպաններն իրենց գործը շարունակեն. Հաղարծինի վարչական ղեկավար

SOCIETY 24 July, 2018 20:24

Տավուշի մարզպետ Վահե Ղալումյանը բնապահպաններին և Տավուշի մարզի Հաղարծին և Թեղուտ համայնքների վարչական ղեկավարներին իր մոտ է հրավիրել՝ քննարկելու համայնքներում ստեղծված իրավիճակը։

Այս մասին Tert.am-ի հետ զրույցում ասաց Հաղարծինի վարչական ղեկավար Գևորգ Թամրազյանը։

Նշենք, որ Տավուշի մարզի Հաղարծին համայնքում լարված իրավիճակ է. բնակիչները երեկ փակել էին ճանապարհը՝ պահանջելով, որ «Դիլիջան» ազգային պարկը հսկող կամավոր բնապահպանները հեռանան:

Հիշեցնենք, որ օրեր առաջ բնակիչների և բնապահպանների միջև տեղի էր ունեցել ընդհարում: Ըստ տեղացիների պատճառաբանության՝ անտառը հսկող կամավորները տեղացի մի կնոջ են ծեծել, որից հետո սկսվել է ծեծկռտուք:

Իսկ ըստ բնապահպանն ակտիվիստների՝ Թեղուտ գյուղում մոտ 30 հոգի հավաքվել ու ծեծի են ենթարկել «իրենց այն պատճառով, որ թույլ չեն տալիս անտառը հատել և վաճառել:Գևորգ Թամրազյանը նշեց, որ այս պահին ճանապարհը տեղացիները բացել են, սակայն հավաքված սպասում են մարզպետի հետ քննարկման արդյունքներին:

«Լարվածություն կա, չենք կարող ժխտել, հիմա փորձում ենք նստել սեղանի շուրջ , վերլուծենք, տարբերակներ գտնենք, հարցը լուծենք, որպեսզի և՛ բնակիչները գոհ լինեն, և՛ բնապահպաններն իրենց գործը շարունակեն, այլապես ես չեմ կարծում, որ ճանապարհի փակումը հարցի լուծում է»,- ասաց Թամրազյանը:

Ըստ Հաղարծինի վարչական ղեկավարի՝ բնակիչները բողոքում են բնապահպանների ոչ պատշաճ պահվածքից: «Բնապահպանների գործունեությունը մենք հասկանում ենք, մարդիկ եկել են, որպեսզի անտառն ապօրինի հատումից պաշտպանեն, դա մենք ողջունում ենք, միանշանակ, ուղղակի հարցը նրանում է, որ արդեն բնակչություն-բնապահպաններ հարցն այնքան է սրվել, որ բանը հասել է ծեծկռտուքի, իրար ուղղված հայհոյանքների: Այնպիսի իրավիճակ է, որ մարդիկ փորձում են ճանապարհ փակելով հարց լուծել, ինչը ես չեմ ողջունում և կարծում եմ, որ ավելի խելամիտ տարբերակներ կգտնվեն»,- ասաց նա:

Իսկ թե ճիշտ է այն տեղեկությունը, որ բնապահպանները կին են ծեծել, Թամրազյանն ասաց, որ ստույգ չի կարող ասել, բայց, իհարկե, ծեծկռտուք եղել է: «Եղել են կանայք, մի տարեց կին՝ կողոսկրի կոտրվածքներով, հիվանդանոց է տեղափոխվել, եղել է քաշքշուք, ինքը խառնվել է, որպեսզի կրքերը հանդարտվեն, հրել, վայր են գցել, բայց թե որ կողմն է դա արել, չեմ կարող ասել, նույնիսկ իրավապահները չեն կարող ասել: Իմ տեղեկությամբ՝ քրեական գործ է հարուցված, և կպարզվի՝ մեղավորն ով է: Ամեն դեպքում, իրավիճակը տհաճ է բոլորիս համար, միանշանակ»,- ասաց նա:

Դիտարկմանը, թե բնապահպանները մատնանշում են, թե բոլորի համար էլ պարզ է՝ ինչից են այս աղմուկը տեղացիները բարձրացրել, քանի որ իրենք ծառ հատելուց զրկվում են, նշեց, որ բացարձակ նման պահանջ չեն դնում՝ հասկանալով, որ ծառ հատելը քրեական արարք է:

«Ես անձամբ չեմ տիրապետում ինֆորմացիային, բայց բնակիչներն ավելի շատ բողոքում են բնապահպանների պահվածքից, նրանց վերաբերմունքից, ասում են, որ կան տեսագրություններ, որ նրանք հայհոյում են տեղացիներին, իմ կարծիքով՝ դա ընդունելի չէ, ամեն ինչ պետք է լինի օրենքի սահմաններում՝ և՛ տեղացիների, և՛ բնապահպանների գործունությունը»,- ասաց նա: