Կարեն Քոչարյան. «Հայաստանում դասական հետհեղափոխական շրջան է». «Փաստ»

«Փաստ» օրաթերթը գրում է.

Հայաստանում դասական հետհեղափոխական շրջան է` իր բոլոր` թե՛ հետհեղափոխական և թե՛ միաժամանակ նաև նախընտրական օբյեկտիվ դրսևորումներով: Անդրադառնալով Հայաստանում առկա իրավիճակին, ներքաղաքական զարգացումներին` «Փաստ»-ի հետ զրույցում նման տեսակետ հայտնեց քաղտեխնոլոգ Կարեն Քոչարյանը: 

Դիտարկմանը, թե որո՞նք են օբյեկտիվ դրսևորումները, քաղտեխնոլոգը պատասխանեց. «Նախ` բիզնեսի փաստացի անորոշությունն է: Բիզնեսի ներկայացուցիչները սպասում են ընտրություններին, որպեսզի հասկանան իրենց անելիքները: Հետհեղափոխական և նախընտրական շրջանում օբյեկտիվ դրսևորում են նաև ԱԱԾ-ի և ոստիկանության գործողությունները: Օբյեկտիվ դրսևորում են նաև քաղաքական կուսակցությունների նոր «մոզաիկայի» վերադասավորումները: Այդ վերադասավորումները ևս բնորոշ են հետհեղափոխական շրջանին»:

Քաղտեխնոլոգի հետ զրուցեցինք նաև ֆեյսբուքյան դաշտում առկա ֆեյքերի մեծ բանակի, ինչպես նաև իրական մարդկանց կողմից դրսևորվող ագրեսիվ, ոչ ադեկվատ պահվածքի մասին:

Կարեն Քոչարյանը շեշտեց` երևույթը նոր չէ, միշտ է այդպես եղել. «Նորություն չէ: Պարզապես քանի որ գնում ենք ընտրությունների, յուրաքանչյուր նախընտրական շրջանում ֆեյքերն ակտիվանում են: Դեռ 2012 թվականից բոլոր նախընտրական շրջաններում այդ ակտիվացումը տեսել ենք»:

Ինչ վերաբերում է իրական մարդկանց վերոնշյալ պահվածքին, նա նշեց, որ այդ դրսևորումները ևս նոր չեն:

«Ֆեյսբուքն ինքն իրենով շատ մարդկանց համար ինքնահաստատման ինչ-որ հարթակ է: Իսկ այն մարդիկ, ովքեր ֆեյսբուքում առյուծ են դառնում, իրականում նապաստակ են: Դա միշտ է եղել: Պարզապես նոր իշխանության որոշ անձանց առումով փորձը ցույց տվեց հետևյալը. այն, ինչն իրենց «ծնեց», այն էլ իրենց կործանեց, որովհետև իրենք սովոր էին միայն ֆեյսբուքյան հարթակին: Իրենք այդպես էլ չհասկացան, որ քաղաքացիական հասարակության կամ հասարակական կազմակերպության անդամ լինելը մի բան է, պետական չինովնիկ լինելը` մեկ այլ բան: Ով սա հասկանա` երկար կմնա, ով չհասկանա` շատ արագ կլինի այն, ինչ եղավ Գևորգ Աճեմյանի և Կարպիս Փաշոյանի հետ»,-նշեց Կ. Քոչարյանը:

Ինչ վերաբերում է նոր կառավարության կադրային քաղաքականությանը, քաղտեխնոլոգը նկատեց. «Հետհեղափոխական կադրային իրավիճակ է: 

Մի խոսք կա` «методом проб и ошибок», պետք է փորձեն առաջ գնալ: Դա եղել է նաև 90-ականների սկզբին, երբ ՀՀՇ-ն եկավ իշխանության, նույնը եղել է նաև 1998 թվականին` պալատական հեղաշրջումից հետո: Երբ նոր իշխանություն է գալիս, չունի իր կադրերը և փորձում է մարդկանց բերել: Այդ մարդկանց մի մասն իրեն արդարացնում է և շարունակում է աշխատել, մյուս մասը չի արդարացնում ու գնում է իրենց տուն: Սա բնական երևույթ է»:

Ինչ վերաբերում է Երևանի ավագանոարտահերթ ընտրություններին, այդ ընտրություններից մինչև ԱԺ արտահերթ ընտրություններ ընկած ժամանակահատվածին, Կարեն Քոչարյանը նշեց. «Ավագանու ընտրություններն, ամեն դեպքում, ԱԺ արտահերթ ընտրություններից առաջ դառնալու են գլխավոր փորձը: Բայց Երևանի և մարզերի բնակչության մեջ, այնուամենայնիվ, կա մենթալ և մոտեցումների տարբերություն. եթե դիտարկենք բոլոր նախորդ ընտրությունների արդյունքները, կտեսնենք, որ, օրինակ, Երևանում, ի տարբերություն մարզերի, համեմատաբար միշտ ավելի ընդդիմադիր են եղել: Թեև Երևանի ավագանու և Ազգային ժողովի արտահերթ ընտրություններում որոշակի տարբերություններ կլինեն, բայց, ընդհանուր առմամբ, ավագանու ընտրությունները գլխավոր փորձն են լինելու»:

Դիտարկմանը` հաշվի առնելով ավագանու ընտրությունների վերաբերյալ քաղաքական ուժերի հայտարարություններն ու որոշումները, ի՞նչ կարելի է սպասել, նա արձագանքեց. «Այն` ինչը որ Ազգային ժողովում: Կարծում եմ, եթե «Ելք»-ը նույն բլոկով գնա, կհաղթի «Ելք»-ը, եթե առանձին գնա` կհաղթի ՔՊ-ն, բայց «Ելք»-ն էլ կանցնի, կանցնի նաև ԲՀԿ-ն: Իսկ մնացածից ո՞վ կանցնի կամ չի անցնի, ցույց կտա բուն նախընտրական «կամպանիան»: Քանի որ հիմա փող չի լինելու, թե՛ Երևանի ավագանու և թե՛ Ազգային ժողովի ընտրություններում, նախընտրական քարոզարշավները բավականին լուրջ ազդեցություն են ունենալու»:

Կարեն Քոչարյանն ընդգծեց, որ ավագանու ընտրությունների առումով այժմ շատ դժվար է խոսել, քանի որ 30 օրը շատ բան կարող է փոխել: 

Մյուս ուժերի առումով էլ խճանկարը կերևա այն ժամանակ, երբ լինեն ընտրություններ, որովհետև նախընտրական քարոզչական «կամպանիայից» շատ բան է կախված. «Մասնավորապես` ով ոնց կտանի, ով ինչ դեմքով ի հայտ կգա: Իսկ ինչ-որ կուսակցություններ, բնականաբար, իրենց դեմքը պետք է փոխեն: Օրինակ` համոզված եմ, որ ՀՀԿ-ն ամբողջովին այլ տեսքով կներկայանա: ՀՀԿ-ն ավագանու ընտրություններին, կարծես, չի ուզում մասնակցել, բայց ԱԺ ընտրություններին անպայման կմասնակցի: Նաիրա Զոհրաբյանն էլ հայտարարել է, որ իրենք գնալու են բացառապես քաղաքական թիմով: Առհասարակ, բոլոր կուսակցություններում սրբագրումներ են լինում` կապված նոր իրողությունների հետ»: