«Եթե հեղափոխություն չլիներ, ես տասնյակ տարիներ, անգամ առանց դատավճռի, առանց ապացույցների փակված կմնայի բանտում». «Փաստ»

«Փաստ» օրաթերթը գրում է.

«Հայրենիք և պատիվ» կուսակցության նախագահ Գառնիկ Մարգարյանը, ով 94–ին հիմնել է «Հայի պատիվ» h/կ–ն, որի հիման վրա էլ ստեղծվել է կուսակցությունը, մոտ երկու տարի առաջ ձերբակալվել էր Նորք–Մարաշում հայտնաբերված զինված խմբի գործով և կասկածվում էր խմբի ղեկավար Արթուր Վարդանյանի կողմից ստեղծած խմբի հետ հանցավոր համագործակցության և այլ մեղադրանքների համար: Այդ ամենով հանդերձ, նա ո՛չ նախկինում, ո՛չ էլ առավել ևս հիմա, երբ արդեն գտնվում է ազատության մեջ, իրեն մեղավոր չի ճանաչում: Ավելին, համարում է, որ իրեն մեղսագրվող գործը շինծու է, պատվիրված, իսկ ինքն էլ եղել է քաղաքական բանտարկյալ:

«Փաստի» հետ զրույցում Գ. Մարգարյանը նշեց, որ երբ արհեստականորեն իրեն շինծու հոդվածներով մեղադրանքներ են մեղսագրել, քննիչի առաջադրած մեղադրանքի վրա ինքը գրել է իր կարծիքը, որ այդ ամենը քաղաքական պատվեր է: Ավելին, գիտի մանրամասներ, թե այն որտեղից և ինչու է գալիս: Հարցին, թե իսկապես որտեղի՞ց և ինչո՞ւ է նման պատվեր եղել, Գ. Մարգարյանը պատասխանեց:

«Դա շատ բարդ հարց է, որովհետև, երբ այդ օղակը բացում եմ, ստացվում է, որ ԱԱԾ–ն իմ տեղը Սերժ Սարգսյանին պետք է տանի: Բայց հիմա շուտ է այդ մասին խոսել: Ես մոտ օրերս կբացեմ բոլոր փակագծերը, բայց հիմա դեռ դրա ժամանակը չէ»:

Այս ամենը նա ոչ միայն թյուրիմացություն է համարում, այլև ափսոսանքով է վերաբերվում կորցրած ժամանակին, որի պատճառով կտրված է եղել հարազատներից, ընկերներից, աշխատանքից, այն դեպքում, երբ այդ կարող էր մեր երկրին ու ժողովրդին գոնե մի փոքր օգուտ տալ, անցկացրել է ճաղերի հետևում: Խոսելով թավշյա հեղափոխության մասին՝ նա նշեց, որ իր կարծիքով՝ դա լրջագույն քայլ էր, իսկ հեղափոխությունը դեռ շարունակվում է: 

«Կարծում եմ՝ յուրաքանչյուր հայ մարդ, անկախ նրանից, թե աշխարհի որ ծայրում է գտնվում, պետք է ըստ արժանվույն գնահատի Փաշինյանի արածը, որովհետև, օրինակ, այն, ինչ նա արեց, ինձ 25 տարիների ընթացքում չհաջողվեց իրականացնել: Այսօր արդեն տեսնում ենք, թե ինչպես է փլուզվում կոռումպացված բուրգը: Այդ ամենի մասին, որ ժողովրդին թալանում են, ես տարիներ շարունակ գրում էի: Իմ կարծիքով, յուրաքանչյուրը պետք է պատասխան տա իր արածի համար: Երբ դա չի իրականացվում, երկրում սկսում է իշխել անարխիան, ինչը տեղի ունեցավ հատկապես Ռոբերտ Քոչարյանի, Սերժ Սարգսյանի ղեկավարման տարիներին»,–ասաց Գ. Մարգարյանը:

Նա միանշանակ համաձայն է Փաշինյանի այն դիրքորոշմանը, որ վրեժխնդրություն չպետք է լինի և օրենքի առջև պետք է հավասար լինեն բոլորը: Ինչ տեղի է ունենում այս օրերին, ոչ միայն նրա երազանքն է եղել, այլև իր և իր համախոհների ընդհանուր նպատակը, որն այսօր իրականություն է դարձել: «Ինձ մոտ համոզմունք կա, որ Փաշինյանը ցանկանում է երկիրը մաքրել աղբանոցից, երկիրն ազատագրել ճորտատիրական և գաղութացման կարգերից, ինչը միանգամայն ողջունելի է: Եվ յուրաքանչյուրն իր տեղում, իր հնարավորությունների չափով պետք է օգնի այս հեղափոխությանը, քանի որ հեղափոխություն անելն առաջին քայլն է, բայց այն պահպանելն ու ամրագրելն արդեն բարդ խնդիր է: Եվ քանի որ Փաշինյանը ստանձնել է այդ բարդ խնդրի իրականացումը, ուստի պետք է, որ յուրաքանչյուրը, անգամ իսկ չխանգարելով, օգնի գործին: Ես հումանիստ եմ, և ինձ համար շատ թանկ է ցանկացած հայ, և հարց է ծագում, թե ինչու մինչ օրս այդպես էլ չբացահայտվեցին հոկտեմբերի 27–ը, մարտի 1–ը: Այդ մասին էլ, կարծում եմ, դեռ խոսելու ժամանակ կլինի»,–ասաց Գ. Մարգարյանը:

Հիմա քաղաքական գործիչն ավելի կարևոր գործեր ունի: Նա պետք է դեռ բացահայտի, թե իրականում ինչու է Նորք–Մարաշի պատմությունը հյուսվել, ինչու է իր անունը կապվել այդ խմբի հետ, երբ ինքն այնտեղից ոչ մեկին էլ չի ճանաչում:

«33 հոգուց միայն մեկի հետ եմ հանդիպել, այն էլ արցախյան հարցերի շուրջ ենք զրուցել: Եվ երբ այդ մասին զեկուցել են նախկին նախագահ կոչեցյալին, քանի որ ես իմ հակակոռուպցիոն գործունեությամբ մնացել էի նրա կոկորդում, հրամայել է ինձ փակել: Ես ժամանակին փաստեր ու փաստաթղթեր կներկայացնեմ հանրությանը, ինչը կապացուցի, որ իմ նկատմամբ կայացվել է քաղաքական որոշում: Եվ եթե Նիկոլ Փաշինյանը չիրականացներ հեղափոխությունը, ես տասնյակ տարիներ, անգամ առանց դատավճռի, առանց ապացույցների, փակված կմնայի բանտում»,–ասաց Գ. Մարգարյանը: