Հարց է, թե ինչ տեխնիկական վիճակում գտնվող ավտոբուսներ են շահագործվում Երեւան-Մոսկվա եւ նման բազմաթիվ «գծերի» վրա

Արմեն Հակոբյանը Ֆեյսբուքյան իր էջում գրում է.

Երեկվա առավոտը բացվեց ծանր եւ տխուր լուրերով. Մոսկվայից Երեւան ուղերթ կատարող «Higer» մակնիշի, 510 OP 61 պետհամարանիշով ավտոբուսը, որը պատկանում է հայկական «Քինգ դելյուքս» ընկերությանը, նոյեմբերի լույս 3-ի գիշերը, մեր ժամանակով ժամը 3:10-ի սահմաններում, Տուլայի մարզով անցնող Մ-4 «Դոն» մայրուղու 221-րդ կիլոմետրի վրա, Ուզլովոյե քաղաքից ոչ հեռու, դուրս է եկել երթեւեկելի մասից եւ կողաշրջվել:
Ռուսական լրատվամիջոցների տարածած, հետագայում նաեւ պաշտոնապես հաստատված տեղեկությունների համաձայն, ավտոբուսում եղել են մեքենայի երկու վարորդները եւ 59 ուղեւոր՝ մեծ մասամբ տղամարդիկ, բոլորը Հայաստանի քաղաքացիներ: 
Վթարի հետեւանքով ստացած վնասվածքներից ուղեւորներից 7-ը տեղում մահացել է: Եվս մեկ ուղեւոր մահացել է հիվանդանոցում: Հարկ է նկատել, որ մի քանի տասնյակ տուժած, տարբեր աստիճանի մարմնական վնասվածքներ ստացած ուղեւորներին հնարավորինս արագ տեղափոխել են վթարի վայրին մերձակա հիվանդանոցներ: Տուժածներից մի քանիսի վիճակը գնահատվում է ծանր եւ ծայրահեղ ծանր: 
Նկատենք, որ ուղեւորների մեծ մասն այդ ժամին, բնականաբար, քնած է եղել, ու ինչ-որ տեղ նաեւ դրանով է բացատրվում տուժածների մեծ թիվը: Գառնիկ Հարությունյան անունով վարորդը վթարից չի տուժել, սակայն մի որոշակի ժամանակահատված շոկային վիճակում է եղել եւ չի կարողացել որեւէ բացատրություն տալ կատարվածի վերաբերյալ: Ներկայումս նա ձերբակալված է։
Տուլայի մարզի ոստիկանությունը վթարի փաստով քրեական գործ է հարուցել ՌԴ քրեական օրենսգրքի 264 հոդվածի հատկանիշներով՝ ճանապարհային երթեւեկության եւ տրանսպորտային միջոցների շահագործման կանոնների խախտում, որը հանգեցրել է երկու եւ ավելի անձանց մահվան: 
Շրջանառվում էին լուրեր, որ վթարը տեղի է ունեցել վարորդի քնելու հետեւանքով: Սակայն ավելի ուշ այդ լուրերը հերքվեցին: Շոկային վիճակից դուրս եկած վարորդը ՈԴ իրավապահ մարմիններին ցուցմունք է տվել, որ վթարը տեղի է ունեցել մեքենայի ինչ-որ անսարքության պատճառով։

Ամբողջությամբ այստեղ