Գուշակի՛ր՝ ինչ կա փաթեթի մեջ

«Փաստ» օրաթերթը գրում է

 

Առողջապահության նախարարությունը օրերս մի հաղորդագրություն է տարածել, որում խորհուրդ է տալիս ամանորյա այս թոհուբոհում ինչպես ճիշտ ընտրություն կատարել երեխաների համար քաղցրավենիք գնելիս: Այս օրերին գրեթե բոլոր մթերային խանութներում անպակաս են ամանորյա «պայոկները»՝ գունավառ, փայլուն, արկղիկների ու տարբեր կերպարների տեսքով:

Տոնական օրերի նախաշեմին Առողջապահության նախարարությունը խորհուրդ է տալիս հետևել մի քանի կանոնների փոքրիկներին ամանորյա անվտանգ և որակյալ քաղցր նվեր ձեռք բերելու համար:

«Ամանորյա քաղցր նվերներն անհրաժեշտ է գնել կազմակերպված առևտրի կետերից: Գնելիս ուշադրություն դարձնել մակնշման վրա, որտեղ արտադրողի կամ փաթեթավորողի կողմից պետք է նշված լինի նվերի պարունակությունը (դրա կազմի մեջ մտնող հրուշակեղենի տեսականին՝ նշելով կոնֆետների, շոկոլադի, տուփերի քանակները, դրանց արտադրման վայրը), փաթեթավորման ամսաթիվը, պիտանիության ժամկետները և պահպանման պայմանները, փաթեթավորող կազմակերպության անունը, իրավաբանական հասցեն, սննդային արժեքը, այն նորմատիվ ակտի անունը, համաձայն որի այն պատրաստվել է»,– ասված է նախարարության հաղորդագրության մեջ:

ԱՆ–ը խորհուրդ է տալիս ուշադրություն դարձնել տուփի մակնշմանը, մասնավորապես, թե դրա կազմի մեջ մտնող հրուշակեղենի տեսականին ինչպիսին է՝ կոնֆետներ, շոկոլադ և այլն: Սա ասվում է այն նպատակով, քանի որ նախարարությունը հորդորում է նվերն ընտրելիս նախապատվությունը տալ այն արտադրանքին, որը պարունակում է քիչ քանակով սննդային հավելումներ, կոնսերվանտներ և հոմոգերիզացված ճարպեր:

«Պետք է հիշել, որ ծիրանի կորիզը, գետնանուշն ալերգեններ են, և դրանց միջուկներով հրուշակեղենի օգտագործումը երեխաներին խորհուրդ չի տրվում: Կարամելային կոնֆետներ՝ այդ թվում ապակենման, խորհուրդ չի տրվում ներառել մանկական նվերների փաթեթներում, ինչպես նաև այնպիսի հրուշակեղենային արտադրանք, որոնցում ալկոհոլի՝ էթանոլի պարունակությունը 0,5 %–ից ավելի է:

Ամանորյա նվերներով փաթեթներ ընտրելիս նախապատվությունը պետք է տալ թխվածքաբլիթներին, ընդ որում` ցանկալի է ընտրել ցածր կալորիականությամբ, շոկոլադե կոնֆետներին` շոկոլադը պարունակում է նաև կալիում, կալցիում, մագնեզիում, ֆոսֆոր, քիչ քանակներով վիտամին A, C, E և հակաօքսիդանտներ, զեֆիրներին` այն չի պարունակում ճարպեր: Դրա արտադրության համար օգտագործվում է միայն ձվի սպիտակուց, շաքար, մրգային բնական այլ խտացված նյութեր, ինչպիսիք են` ագար–ագարը, դոնդողը, պեկտինը»:

Այս բոլոր խորհուրդներն, իհարկե, տեղին են ու շատ օգտակար, բայց բանն այն է, որ շուկայում մեզ հանդիպած նման փաթեթների մեծամասնության վրա արտադրողի անվան, պիտանիության ժամկետների և պահպանման պայմանների նշումից զատ ոչինչ չկա: Չկա նաև փաթեթավորման ամսաթիվ, ու տպավորություն է ստեղծվում, թե մակնշված արտադրության ժամկետը փաթեթավորման ամսաթվի փոխարեն են գրել:

Հավելենք, որ նախարարությունն իր հաղորդագրության վերջում հիշեցնում է, որ հրուշակեղենը պարունակում է մեծ քանակությամբ շաքար, այդ պատճառով պետք է սահմանափակել դրանց օգտագործումը:

Բացի այդ, եթե նվերի տուփի մեջ հրուշակեղերի հետ միասին ներառված է նաև խաղալիք, ապա այն պետք է փաթեթավորված լինի սննդամթերքի հետ շփման համար թույլատրվող փաթեթով:

 

Քրիստինա Տեր-Մաթևոսյան