«Կարմիր» Ալաբամայի «կապույտ տվայտանքը»

«Փաստ» օրաթերթը գրում է

 

Ինչպես երևում է՝ ԱՄՆ նախագահ Դոնալդ Թրամփը «Տիեզերքի յուրացման» իր նորարարական ծրագրով ավելի շուտ հայրենակիցներին Լուսին «կվերադարձնի», քան՝ ամերիկյան իսթեբլիշմենթի բարեհաճությունը կստանա: Ասվածի վառ օրինակն ավանդաբար Հանրապետական կուսակցության կարմիրով ներկվող Ալաբամայում ծավալված իրադարձություններն էին, որոնք Սպիտակ տանն ու Աբրահամ Լինքոլնի Grand Old Party–ին ստիպեցին հիմնովին ցնցվել:

Իսկապես. ԱՄՆ–ում Սենատի աթոռի համար մղվող պայքարը դեռ երբեք այսպիսի դրամատիկ ընթացք չէր ունեցել: Եվ այն փաստը, որ դեմոկրատ Դագ Ջոնսը երեկ 1%–ից էլ քիչ ձայներով առավելության հասավ (49,6%՝ ընդդեմ 48,8%–ի) հանրապետական Ռոյ Մուրի նկատմամբ, ոչ միայն Ալաբամայի «ընթացիկ ընտրություն» է պետք դիտարկել, ինչպես նախագահ Դոնալդ Թրամփը փորձեց Twitter–ում ներկայացնել՝ թաքցնելով հիասթափության ցավը, այլևս մի խոշոր ապացույց առ այն, որ իսթեբլիշմենթը շարունակում է ցանկացած միջոցի գործադրմամբ դուրս մղել իր համար «օտար մարմին» դիտարկվող Թրամփին ու «թրամփիզմը»՝ ինչպես դրա դեմոկրատական հատվածն է սիրում ձևակերպել:

Ինչ նկատի ունենք «ցանկացած միջոց» ասելով՝ բացատրենք: Բանն այն է , որ 70–ամյա Ռոյ Մուրը, որ հանրապետական Ալաբամայի սիրելին էր (Մուրը ամերիկյան կոնսերվատիզմի չլռող ձայնն էր Ալաբամայում. նա դեմ է աբորտներին, նույնասեռականությանը, անօրինական ներգաղթին, պնդում է, որ ԱՄՆ–ում քրիստոնեությունը պիտի պետական կրոն հռչակվի և նույնիսկ զրկվեց շրջանային դատարանի քարտուղարության պաշտոնից՝ չկատարելով Դաշնային դատարանի պահանջն ու չհանելով դատարանի միջանցքում դրված բիբլիական Տասնաբանյայի մարմարյա արձանը), օրինավոր քաղաքացու, պարկեշտ քրիստոնյայի, ընտանիքի բարեխիղճ հոր և համոզված հանրապետական իմիջ ուներ, ընտրությունների ընթացքում դեմոկրատների կողմից մեղադրվեց ԱՄՆ–ի համար սովորական դարձած sexual harassment կոչվածում:

Ավելի ճիշտ՝ չգիտես էլ որտեղից 4 կանայք հայտնվեցին, որոնք պնդեցին, թե չգիտես էլ՝ երբ, «տպավորություն են ունեցել, որ Մուրը կամեցել է բռնաբարել իրենց»: Ոչնչով չապացուցված այս պնդումները մեծ ազդեցություն ունեցան ոչ միայն Ալաբամայի բնակչության, այլև հանրապետականների վրա, և նույնիսկ «Փղերի» Երեց պատգամավորը հրապարակայնորեն հրաժարվեց Մուրից՝ համաձայնելով, որ արդարացի կլինի, եթե իրենց թեկնածուի հաղթանակի դեպքում Սենատի Էթիկայի հանձնաժողովն այդ գործով զբաղվի: Եվ այս ամենն այն դեպքում, երբ Մուրը երդվել էր, որ չի էլ ճանաչում այդ կանանց, իսկ նախագահ Թրամփն անձամբ էր կասկածներ հայտնել՝ sexual harassment–ի հետ կապված:

Արդյունքում, չնայած դեմոկրատների՝ ատելությամբ լի պայքարին, Մուրը 1%–ից էլ քիչ ձայներով պարտություն կրեց: Բայց պարտվե՛ց, և դեմոկրատների՝ CNN–ի ուղիղ եթերով սփռվող ցնծությունն այժմ խնդիրներ է ստեղծելու հենց Հանրապետականի ու Սպիտակ տան համար, որովհետև Ալաբամայի նախկին դատախազ Դագ Ջոնսի հայտնությամբ Հանրապետական աթոռների թիվը Սենատում ընդամենը 51–ի կհասնի՝ 49 դեմոկրատ և անկուսակցական սենատորների աթոռների դիմաց…

 

Գոհար Սիմոնյան