Թույլտվություն՝ Հայաստանում գործունեություն ծավալելու համար

Կառավարության այսօր կայանալիք հերթական նիստի ընթացքում կքննարկվի թվով երեք արտասահմանյան ընկերություններին Հայաստանում լիցենզավորման ենթակա գործունեություն իրականացնելու համար թույլտվություն տրամադրելու մասին նախագիծ:

Խոսքը «ՋԻԹԵՔ ՔՆՍԱԼԹ ԳՄԲՀ» (Գերմանիայի Դաշնություն), «ԷՍԱՐՓԻ Շնայդեր ընդ Փարթներ Ինժենյոր–Քընսալթինգ ՍՊԸ» (Գեմանիայի Դաշնություն) և «ՍԱՖԵԺ» (Ֆրանսիայի Հանրապետություն) ընկերությունների մասին է, որոնք «Կոմունալ ենթակառուցվածքների Ծրագիր II–Փուլ 3» ներդրումային ծրագրի շրջանակներում իրականացնելու են քաղաքաշինական փաստաթղթերի մշակում և շինարարության որակի տեխնիկական հսկողություն:

Որոշման նախագծի ընդունումը պայմանավորված է «Կոմունալ ենթակառուցվածքների Ծրագիր II–Փուլ 3» ներդրումային ծրագրի շրջանակներում քաղաքաշինական փաստաթղթերի մշակման և շինարարության որակի տեխնիկական հսկողության իրականացման թույլտվություն տրամադրելու անհրաժեշտությամբ:

Ըստ նախագծի՝ ՀՀ կառավարությունը և Գերմանիայի Դաշնային Հանրապետությունը կնքել են ֆինանսական համագործակցության համաձայնագիր, որի նպատակն է ֆինանսավորել ծրագիրը նախկին տարածքային ջրային ընկերությունների սպասարկման տարածքում՝ «Շիրակ–ջրմուղկոյուղու», «Լոռի–ջրմուղկոյուղու», «Նոր Ակունքի» և «Հայջրմուղկոյուղու»: Մասնավորապես, ծրագրի իրականացման նպատակով կնքվել են ֆինանսական համաձայնագրեր` ՀՀ կառավարության և Գերմանիայի Զարգացման Բանկի, Եվրոպական Ներդրումային Բանկի և Եվրոպական Միության Հարևանության Ներդրումային Գործիքի միջև:

«Կոմունալ ենթակառուցվածքներ Ծրագիր II–Փուլ 3»–ի նպատակն է վերանորոգել, նորացնել և ընդլայնել ջրամատակարարման և ջրահեռացման համակարգերը: Ծրագրի նպատակների իրականացման համար ի թիվս այլոց անհրաժեշտ է իրականացնել ջրամատակարարման և ջրահեռացման համակարգերի նախագծման և շինարարության որակի հսկողության ծառայություններ: Հիշյալ ծառայությունների իրականացման համար կնքվել է 3 պայմանագիր: Նախատեսված աշխատանքները պետք է իրականացնեն վերոհիշյալ արտասահմանյան ընկերությունները:

«Լիցենզավորման մասին» ՀՀ օրենքի համաձայն քաղաքաշինական փաստաթղթերի մշակումը, փորձաքննությունը և շինարարության որակի տեխնիկական հսկողությունը հանդիսանում են լիցենզավորման ենթակա գործունեություն: Օրենքի մեկ այլ կետի համաձայն էլ՝ օտարերկրյա իրավաբանական անձինք ՀՀ կառավարության որոշմամբ կարող են իրականացնել օրենքով նախատեսված լիցենզավորման ենթակա գործունեություն օտարերկրյա պետությունների կողմից տված համապատասխան լիցենզիայի առկայության դեպքում:

Հիմք ընդունելով վերոգրյալը՝ կառավարությունն առաջարկում է «ՋԻԹԵՔ ՔՆՍԱԼԹ ԳՄԲՀ», «ԷՍԱՐՓԻ Շնայդեր ընդ Փարթներ Ինժենյոր–Քընսալթինգ ՍՊԸ» և «ՍԱՖԵԺ» ընկերություններին թույլատրել Գերմանիայի Դաշնության կողմից տրամադրված պետական գրանցման վկայականների և Ֆրանսիայի Հանրապետության կողմից տրամադրված որակավորման վկայագրերի հիման վրա ծրագրի շրջանակներում իրականացնել ջրամատակարարման և ջրահեռացման համակարգերի մանրամասն նախագծման և շինարարության որակի տեխնիկական հսկողության աշխատանքները:
Նշենք, որ ներկայացված որոշման նախագիծը մշակվել է Էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի աշխատակազմի կողմից: