Ձկան արտադրությունը նվազել է, գինն էլ՝ կտրուկ աճել

«Փաստ»Այսօր մեծածախ շուկայում իշխան տեսակի ձկան մեկ կիլոգրամը 2100 դրամով է վաճառվում, իսկ թառափի գինը 3500–ի է հասնում: Ձկնամթերքի գինը բարձրացել է, քանի որ արտադրության ծավալներն այս տարի նվազել է:

«Նախորդ տարի շատ էին արտադրել, շուկայում լճացում էր, այս տարի քիչ են արտադրել, դրա համար գինը բարձրացել է»,– «Փաստ» օրաթերթի թղթակցի հետ զրույցում տեղեկացրեց «Հայ ձկնարտադրողների և ձկնարտահանողների միություն» հասարակական կազմակերպության նախագահ Արթուր Աթոյանը:

Որպեսզի ձկնամթերքի շուկայում լճացում չլինի, արտադրողն այս տարի ռիսկի չի գնացել: Ձկնաբուծարանները մոտ 30%–ով են արտադրություն իրականացրել:

«Ապրանքային ձուկ հիմա չկա, նորաձկները փոքր են, մոտ 3 ամսից դեռ շուկա կհանեն: Երբ շուկան լցվի, այդ ժամանակ կրկին ձկան գինը կնվազի, այսինքն՝ հիմա գործ ունենք շուկայի զարգացման տարերայնության հետ»,– նկատեց Արթուր Աթոյանը:

Ձկնամթերքի շուկայում արտահանման ուղղությամբ էլ ցածր ցուցանիշներ են գրանցվել:
«Արտահանումը մի կերպ է կատարվում: Նույնիսկ շատ դեպքերում ձուկն արտահանվում է առանց շահույթի, արտահանվում է նրա համար, որպեսզի արտահանող տնտեսությունն իր շուկան չկորցնի»,– ասաց մեր զրուցակիցը:

Նա նաև հավելեց, որ արտահանման ծավալները նախորդ տարվա համեմատ կտրուկ նվազել են:

Ազգային վիճակագրական ծառայության տվյալներով՝ սեպտեմբեր ամսին ձկան և ծովամթերքի ապրանքախմբում գրանցվել է 1,6% գնաճ: Իսկ 2017 թ. սեպտեմբերին նախորդ տարվա նույն ժամանակահատվածի համեմատ ձկնամթերքը թանկացել է 27,5%–ով: Հանրապետության դիտարկված 9 քաղաքներում 2017թ. սեպտեմբերին օգոստոսի համեմատ ձկնամթերքի գներն աճել են 0,2–2,6%–ով (գնաճի ամենաբարձր ցուցանիշն արձանագրվել է ք. Հրազդանում), մեկում գրանցվել է 0,1% գնանկում, իսկ մյուսում պահպանվել է գների նախորդ ամսվա մակարդակը: Մայրաքաղաքում ձկնամթերքի գներն աճել են 1,9%–ով:

Ձկնամթերքի շուկան կարգավորելու և արտադրությունը խթանելու համար «Հայ ձկնարտադրողների և ձկնարտահանողների միություն» ՀԿ նախագահը մեկ ելք է տեսնում՝ պետության աջակցությունը: Նրա խոսքով՝ ոլորտը կարգավորելու համար պետությունը որևէ ծրագիր չի իրականացնում: Ցածր տոկոսով վարկեր են անհրաժեշտ ոլորտը ճգնաժամից դուրս բելու համար: