«Հյուսիս-հարավ»-ին միջոցներ է տրամադրում 3 բանկ. որքան գումար է հատկացվել առ այսօր և ինչ աշխատանքների համար

Ներկա պահին «Հյուսիս-hարավ» ճանապարհային միջանցքի ներդրումային ծրագրի համար վարկային և դրամաշնորհային միջոցներ է տրամադրում 3 բանկ, ինչպես նաև գումարներ են հատկացվել ՀՀ բյուջեից։

Այս մասին Tert.am-ի գրավոր հարցմանն ի պատասխան հայտնել են ՀՀ տրանսպորտի, կապի և տեղեկատվական տեխնոլոգիաների նախարարությունից:

Հարցին, թե որ բանկերն են վարկեր տրամադրում ճանապարհի ֆինանսավորման համար, նախարարությունից պատասխանել են, որ ներկա պահին «Հյուսիս-հարավ» ճանապարհային միջանցքի ներդրումային ծրագրի համար վարկային և դրամաշնորհային միջոցներ են տրամադրում Ասիական զարգացման բանկը, Եվրոպական ներդրումային բանկը և Եվրասիական զարգացման բանկը:

Իսկ թե որքան գումար է հատկացվել ՀՀ պետական բյուջեից մինչ օրս և որքան է նախատեսվում տրամադրել ծրագրին, նախարարության պատասխանում ասվում է. «01.09.2017թ. դրությամբ ՀՀ պետական բյուջեից` որպես հարկերի համաֆինանսավորում, հողերի օտարման և տարաբնակեցման ծրագրի նպատակներով և հաղորդուղիների տեղափոխման համար տրամադրվել է շուրջ 16.9 մլրդ ՀՀ դրամ»:

Թե որքան է նախատեսվում տրամադրել ծրագրին, Տրանսպորտի, կապի և տեղեկատվական տեխնոլոգիաների նախարարությունը պատասխան չի տվել:

Ասիական զարգացման բանկի կողմից մինչ այժմ հատկացված և հատկացվելիք գումարի վերաբերյալ հարցին, նախարարությունը հետևյալ պատասխանն է տվել. «Ասիական զարգացման բանկի հետ Հայաստանի Հանրապետության կողմից կնքված թվով երեք վարկային համաձայնագրերի ներքո հասանելի են շուրջ 330 մլն ԱՄՆ դոլարի չափով վարկային միջոցներ: 01.09.2017թ. դրությամբ Ասիական զարգացման բանկի կողմից տրամադրված վարկային միջոցներից շինարարական աշխատանքների համար կապալառուներին վճարվել է 139.43 մլն ԱՄՆ դոլար գումար»:

Հարցին, թե որքան գումար է հատկացվելու և որքան է մինչ այժմ հատկացվել Եվրոպական ներդրումային բանկի կողմից, նախարարությունից հայտնել են, որ Եվրոպական ներդումային բանկի հետ Հայաստանի Հանրապետության կողմից կքված վարկային և դրամաշնորհային համաձայնագրի շրջանակներում հասանելի են 72 մլն եվրո միջոցներ: 01.09.2017թ. դրությամբ Եվրոպական ներդրումային բանկի կողմից տրամադրված վարկային միջոցներից շինարարական աշխատանքների համար կապալառուներին վճարվել է 22.37 մլն եվրո գումար:

Հարցին, թե այլ ինչ վարկատուներ կան և որքա՞ն գումար է հատկացվել նրանցից յուրաքանչյուրի կողմից, ՏԿՏՏ-ից հայտնել են, որ Եվրասիական զարգացման բանկի հետ Հայաստանի Հանրապետության կնքած վարկային համաձայնագրի ներքո հասանելի են 150 մլն ԱՄՆ դոլարի չափով վարկային միջոցներ:

Tert.am-ին ավելի վաղ նախարարությունից տեղեկացրել էին, «Հյուսիս-հարավ» ավտոճանապարհի կառուցման սկզբից մինչև 2017թ. օգոստոսի 1-ը ընկած ժամանակահատվածում ծախսվել է շուրջ 150.3 մլն ԱՄՆ դոլար և 23,14 մլն եվրո:

Հարցին, թե մինչ այժմ ծախսված, այդ թվում՝ կապալառուներին վճարված գումարներն ի՞նչ աշխատանքների վրա են ծախսվել, նախարարությունից հայտնել են, որ «Հյուսիս-հարավ» ճանապարհային միջանցքի ներդրումային ծրագրի Երևան-Արտաշատ և Երևան-Աշտարակ ճանապարհահատվածների 1 կմ-ի միջինացված գինը կազմում է մոտ 2.35 մլն ԱՄՆ դոլար: Շահագործման հանձնված 31 կմ ճանապարհը Երևան-Արտաշատ և Երևան-Աշտարակ ճանապարհահատվածներն են, որոնց շինարարական կապալի պայմանագրի գինը կազմում է 70.4 մլն ԱՄՆ դոլար: 

Ծախսված գումարը ներառում է ոչ միայն արդեն իսկ հիշատակված 70.4 մլն ԱՄՆ դոլարը, այլև Աշտարակ-Թալին և Թալին-Գյումրի ճանապարհահատվածներում իրականացված բետոնացման աշխատանքների (2017թ. օգոստոսի 1-ի դրությամբ մոտ 11 կմ հատվածում իրականացվել են ճանապարհի բետոնե պատվածքի աշխատանքներ), հողային աշխատանքների, արհեստական կառուցվածքների հնագիտական պեղումների համար վճարված գումարները, ինչպես նաև դեռևս չմարված կանխավճարը:

Նույն գումարի մեջ է ներառված նաև Թալին-Լանջիկ և Լանջիկ-Գյումրի ճանապարհահատվածների շինարարական աշխատանքների համար տրված կանխավճարը, ինչպես նաև Տրանշ 3 ծրագրի վարկային համաձայնագրի խնայողությունների հաշվին Երևան - Արտաշատ և Երևան - Աշտարակ ճանապարհահատվածներում նոր կառուցվող և վերակառուցվող 9 ուղեանցերի և մեկ կամրջի աշխատանքների համար վճարված գումարները