Երեքծովյան նախաձեռնությունը լեհ–ամերիկյան գործարքով պսակվեց

INTERNATIONAL NEWS 8 July, 2017 18:06

G20–ի նախօրեին Կենտրոնական Եվրոպայի երկրները հավաքվել էին Վարշավայում, որպեսզի Երեք ծովերի նախաձեռնության շրջանակներում քննարկեին տարածաշրջանային ծրագրերի ընթացքն ու դրանց նոր շունչ հաղորդելու հնարավորություններ գտնեին: Խորվաթիայի ու Լեհաստանի այս գաղափարն, ինչպես գիտեք, ենթադրում է Սև, Բալթիկ և Ադրիատիկ ծովերի շրջանում տեղակայված եվրոպական երկրների ակտիվ համագործակցություն, ենթակառուցվածքների իմաստով՝ ինքնաբավություն և էներգետիկ անկախություն, ինչը, վերջին հաշվով, ազատ, խաղաղ, տնտեսապես զարգացած և միասնական Եվրոպայի կառուցման տեսլականի շրջանակներում է տեղավորվում:

Համարվում է, որ կառույցի հիմնավորումից ի վեր՝ երեքծովյան երկրները (105 մլն մարդ, ՀՆԱ–ի 3,3 տրիլիոն դոլար չափաբաժին) բազմաթիվ հաջողությունների են հասել: Սակայն, ենթակառուցվածքների՝ Հյուսիս–հարավ գծով զարգացման, նոր մարտահրավերների, անվտանգության ու էլի շատ հարցերի առնչությամբ շատ բան էր առկախված մնացել, որոնց քննարկմանը հավելյալ ինտրիգ ավելացրեց ԱՄՆ նախագահ Դոնալդ Թրամփը: Առանձին փորձագետների պատկերացմամբ՝ նա պատմական ելույթ ունեցավ Վարշավայում՝ հայտարարելով, թե «Արևմուտքը երբեք չի պարտվելու, նրա արժեքները ամուր են լինելու, ժողովուրդները՝ բարգավաճ, իսկ քաղաքակրթությունը՝ մնայուն»: Ու թեպետ հակագլոբալիստներն ու ազգայնականները հակառակն են պնդում՝ Թրամփը հավատի, ընտանիքի, մարդու իրավունքների և հանուրի բարգավաճ կյանքի թվարկմամբ սահմանեց դրանք՝ պնդելով, որ այժմ բոլոր այս արժեքների դեմ մռայլ գաղափարախոսական, ինչպես նաև՝ ահաբեկչական պայքար է ընթանում:

Հետաքրքիր է, որ չնայած Թրամփի ռուսասիրության ընդունված տեսակետին ու համբուրգյան սպասվող հանդիպմանը՝ նա, փաստորեն, ռուսներին էլ վերջիններիս շարքին դասեց: «Կոչ ենք անում Ռուսաստանին՝ դադարեցնել ապակայունացնող գործողությունները Ուկրաինայում և այլուր, դադարեցնել Սիրիայի ու Իրանի թշնամական վարչակարգերի նկատմամբ աջակցությունը՝ դրա փոխարեն միանալով պատասխանատու պետությունների հանրությանը, պայքարել ընդհանուր թշնամիների դեմ և պաշտպանել քաղաքակրթությունը»,– հայտարարեց Թրամփը՝ միաժամանակ վերահաստատելով ԱՄՆ նվիրվածությունը ՆԱՏՕ–ի պայմանագրի հիմնարար՝ դաշնակիցների պաշտպանության 5–րդ կետին:

Բնականաբար, սա ռուսներին դուր չի եկել: Այստեղ համոզված են, որ գեղեցիկ ու ամենակարևորը՝ կեղծ խոսքերի ներքո, ԱՄՆ նախագահն ու Մոսկվայի դեմ թշնամաբար տրամադրված Լեհաստանն ընդամենը միջազգային դրությունը ապակայունացնող հերթական գործարքն են կնքել՝ Վարշավայի կողմից ամերիկյան Patriot հակահրթիռային կայանների ձեռքբերման և էլի չմանրամասնվող զենքերի տեսքով: Լեհաստանը վերջնականապես և անշրջելիորեն ընտրեց Վաշինգտոնի խամաճիկը դառնալու կորստյան ճանապարհը՝ համոզված են մերձկրեմլյան փորձագետները, որոնք միաժամանակ ակտիվորեն են քննարկում ՌԴ նախագահի վերջին հոդվածը՝ Կրեմլի ուղերձների կարճառոտ համագումարը G20–ին:

Բայց այս մասին դեռ կխոսենք նաև Պուտին–Թրամփ սպասվող հանդիպման ֆոնին:

Գոհար Սիմոնյան