Մեզ համար մեծ պատիվ էր այդ ուժեղ փոքրիկների հետ նկարահանվելը. Մկրտիչ Արզումանյանը՝ «Դե ժպտա» տեսահոլովակի մասին

Օրերս համացանցում է հայտնվել «Դե ժպտա» տեսահոլովակը, որտեղ հայ հայտնիներից մի քանիսը համախմբվել են կարեւոր նախագծի շուրջ՝ ժպիտ պարգեւել ԵՊԲՀ «Մուրացան» Հիվանդանոցային Համալիրի Քիմիաթերապիայի կլինիկայում ու առհասարակ դարի սարսափելի հիվանդության դեմ բուժվող եւ արդեն իսկ հիվանդությունը հաղթահարած փոքրիկներին:

Նախագծի պրոդյուսերը դերասան Մկրտիչ Արզումանյանն է, ով Life.panorama.am-ին պատմեց այս աշխատանքի մանրամասների մասին:

«ԵՊԲՀ «Մուրացան» Հիվանդանոցային Համալիրի Քիմիաթերապիայի կլինիկայի բուժանձնակազմի մտահղացմամբ կայացավ այս աշխատանքը: Հենց բժիշկների մոտ էր առաջացել այս գաղափարը՝ ստեղծել հոլովակ, որը ժպիտ կպարգեւեր ծանր հիվանդությունը հաղթահարած եւ այդ ճանապարհին գտնվող երեխաներին: Որպես լավ ընկեր՝  նրանք ինձ առաջարկեցին զբաղվել այդ գաղափարի պրոդյուսինգով, ես էլ մեծ սիրով համաձայնեցի. Ի դեպ՝ շատ շնորհակալ եմ, որ այդ գործում հենց ինձ են տեսել, ես ուրախ եմ, որ կարողացա ինչ-որ կերպ օգտակար լինել»,- նշեց Մկրտիչ Արզումանյանը:

«Դե ժպտա» երգի հեղինակն է Էդգար Ալեքսանյանը, ռեժիսորը՝ Կարեն Ամյանը: Մասնակցել են Իվետա Մուկուչյանը, Էրիկ Կարապետյանը, Անահիտ Շահբազյանը, Միհրան Ծառուկյանը, Քրիստինե Պեպելյանը, Ռոլանդ Գասպարյանը, Յանա Հովհանիսյանը, Արամ MP3-ը եւ Մկրտիչ Արզումանյանը:

«Իրականում մի քանի երգերի շուրջ էինք տատանվում, բայց ի վերջո ընտրվեց սա, որը կարծում եմ իսկապես շատ գեղեցիկ երգ է: Իհարկե, ավելի շատ հայտնիներ կցանկանայինք ներգրավել այս աշխատանքում, բայց ֆիզիկապես չէինք կարող, ուստի ընտրեցինք նրանց, որոնց այս աշխատանքի համար ավելի նպատակահարմար գտանք, ու որոնք նաեւ շատ սիրված են երեխաների կողմից: Շատ լավ թիմ ենք ունեցել, բոլորն էլ սրտացավորեն միտված էին լավ աշխատանքի կայացմանը: Կարեւոր է, որ շատ են մարդիկ, ովքեր իսկապես ցավում են ու պատրաստ են որեւէ կերպ օգնություն ցույց տալ տարբեր հիվանդությունների դեմ պայքարող մարդկանց»,- հավելեց դերասանը:

«Դե ժպտա» տեսահոլովակի հերոսները հենց ծանր հիվանդությունը հաղթահարած եւ դեռեւս բուժման ընթացքում գտնվող երեխաներն են՝ Ռոմանը, Էդգարը, Գոռը, Միքայելը, Էդուարդը, Էդմոնը, Սելենան, Սարգիսը, Աստղիկը, Ժաննան, Սարգիսը, Նարեկը եւ Հայկը: Հետաքրքրվելով, թե ինչպես են ընթացել փոքրիկների հետ նկարահանումները, մեր զրուցակիցը պատմեց.

«Նախ պետք է շեշտեմ, որ մեզ համար մեծ պատիվ էր այդ ուժեղ փոքրիկների հետ նկարահանվելը: Նրանք մեծ ուրախությամբ ու անկաշկանդ նկարահանվում էին, ուզում էին իրենք էլ այդ աշխատանքում մի լումա ունենալ եւ իրենց իսկ օրինակով այդ խնդրի առաջ կանգնած մյուս երեխաներին ուժ տալ:  Մեր տեսահոլովակի բոլոր երեխաներն իսկական հերոսներ են, նրանք այնքան ծանր խնդրի միջով են անցնում, որ նրանց հետ շփումը յուրաքանչյուրի համար մեծ պատիվ պետք է լինի»:

Հեղինակ՝ Անուշիկ Մելքոնյան