Սամվել Ֆարմանյանը պայմանավորվեց «Ելք»-ի պատգամավորի և ավագանու անդամի հետ «Սպայկա» այցելել

«Սիրելի Արայիկ և Լենա, ի՞նչ կարծիքի եք համով ծիրան ուտելու ու գիշեր-ցերեկ ճանապարհների ու կամուրջների հետ կռիվ տվողներին մի քիչ «քյոմակ» անելու մասին»:  Այս մասին ֆեսյբուքյան իր էջում գրառում է կատարել  ՀՀ ԱԺ պատգամավոր Սամվել Ֆարմանյանը՝ լրատվամիջոցների ուշադրությունը հրավիրելով իր գործընկերներ Լենա Նազարյանի տարածած և «Ելք»-ի մյուս գործընկերոջ՝ Արայիկ Հարությունյանի գրառած պատմության մյուս կողմին։  

Սամվել Ֆարմանյանը, մասնավորապես, գրել է.

«Մամուլի հետ աշխատանքի տարիներին սովորություն եմ ձեռք բերել «մեկի պատմած - մյուսի գրառած» պատմությունների հետևից գնալ, հասկանալ մյուս կողմին, որ ամբողջական պատկեր ունենամ։ Տասնամյակների փորձով շա՜տ հարգված ավագ ընկեր ունեմ «Սպայկայում», (2012 թ. ընտրություններում, երբ ես մեծամասնականով առաջադրվել էի, իմ ամենաակտիվ աջակիցներից ու քննադատներից մեկն էր) վերցրեցի ու զանգեցի։ Ասում եմ․

- Ձյաձ Ժորա, ո՞նց ա վիճակներդ բերքահավաքի էս պիկ օրերին։ Ոնց որ հարամություն էլ եք հա՞ անում։

- Ոչինչ Սամվել ջան, էսօր գյուղացու համար ամենասպասված մարդիկ մեր ընդունողներն են, փորձում ենք չքնելով ու չհոգնելով բոլորին հասնել։ Յեքքա կոլեկտիվ ենք, կեսս ճանապարհներին ենք, կեսս դաշտերում, հաց ուտելն ենք թարգել (ծիծաղում է)։ Բա էդ ի՞նչ հարամություն ես ասում որ։

- Ասում են Ռուսաստանի քաղաքների շուկաները փակում եք մեր փոքր արտահանողների համար, որ միայն ձեր տարած ապրանքը վաճառվի։ Հենց հիմա ես Մոսկվայում եմ, մեկնում եմ Սեուլ, ստեղի հայերի հետ խոսելուց առաջ ասի քեզ զանգեմ։

- Լու՞րջ ես ասում Սամվել։ Էդ ո՞վ ա ասում։ Էդ ի՞նչ փոքր արտահանող ա, որ բան ու գործ թողած ընկել ենք իր հետևից։ Կամ ինչի՞ համար։ Էդ ասողները թող գան տեսնեն էդ մեծ երկրի, որ հիմա էդտեղ ես, ամեն մի քաղաքի ու մեծ խանութի համար մեր տղերքը ինչ կռիվ են տալիս Ադրբեջանի ու Թուրքիայի դեմ։ Էդտեղ ես՝ հարցուփորձ արա, իմացի։ Կռիվ են տալիս, որ հենց մեր գյուղացու ապրանքը վաճառվի։ Էդ կատաղած կռվի մեջ էդ ի՞նչ փոքր արտահանող ա, որ եկել էդ մեծ պատերազմի մեջ շուխուր ա դրել։ Էդ ում չի օգնել Սպայկան որ՞։ Սամվել ջան, էդ ո՞վ ա ասում։

- Ձյաձ Ժորա, մեր ընկերներն են, Նիկոլին Փաշինյան գիտե՞ս, իրա կուսակցությունից են, գրագետ ու լավ մարդիկ են։

- Սամվել ջան, Նիկոլը խելոք տղա ա, վեկալ էդ ընկերներիդ բեր ստեղ, բեր թող տենան ամեն օր քանի ընտանիքի տարվա հաց ենք Հայաստան բերում՝ խլելով հարևան պետությունների ախորժակից։ Ես մեր շեֆությանը կասեմ, չնայած ո՞վ ա տենց շեֆություն տեսել, որ բանվորի երկու գործն ա անում իրա հետ։ Բեր բալա ջան, ինչի՞ սխալ իմանան էրեխեքը։ Բեր համով ծիրան էլ կտանք։

- Լավ ձյաձ Ժորա, հարցնեմ կասեմ։ Դուք պինդ կացեք։

Սիրելի Արայիկ և Լենա, ի՞նչ կարծիքի եք համով ծիրան ուտելու ու գիշեր-ցերեկ ճանապարհների ու կամուրջների հետ կռիվ տվողներին մի քիչ «քյոմակ» անելու մասին »:



ԱԺ պատգամավորի այս գրառման ներքո մեկնաբանություններ են թողել ինչպես ԱԺ պատգամավոր Լենա Նազարյանը, այնպես էլ ավագանու անդամ Արայիկ Հարությունյանը:

Վերջինս, մասնավորապես, նշել է.

«Նախորդ տարիներին էլ այս սեզոնին եղել եմ գյուղերում, գիտեմ արտահանողների կողմից ստեղծվող բարդությունները: Այս պահին իմ և նաև Ձեր խնդիրը պետք է լինի հարցի արագ լուծումը, որովհետև ծիրանը ծառերի վրա չի սպասելու, մինչև մենք գնանք գանք, նամակագրության մեջ մտնենք, հարցումներ ուղարկենք և այլն: Հիմա կարևոր եմ համարում, որ նախարարությունն ու լրագրողներն արագ հետաքննեն խնդիրը, որ գեթ մեկ ժամի հապաղում չլինի արտահանման գործում»:

Արայիկ Հարությունյանի այս մեկնաբանությանը Սամվել Ֆարմանյանը պատասխանել է. «Արայիկ ջան, վստահ եղիր, որ այս օրերին ոչ մի հատիկ պտուղ չիրացված ու տեղում չվճարված չի մնում (գոնե թե Սպայկայի կողմից), նախկին խնդիրներն այսօր արդիական չեն։ Իսկ այս մեկ կոնկրետ փոքր արտահանողի հետ կապված խնդիրը միասին կհասկանանք, լավ է, որ պայմանավորվեցինք հյուրընկալվել Սպայկա»։

Ֆարմանյանի այս մեկնաբանությունից հետո Արայիկ Հարությունը համաձայնել է միասին այցելել «Սպայկա»՝ նշելով, որ այնուհանդերձ գտնում է, որ նախարարությունը միջգերատեսչական լծակներով պետք է լուծի այդ հարցը: 



Հիշեցնենք, որ ԱԺ պատգամավոր Լենա Նազարյանը և Երևանի ավագանու անդամ Արայիկ Հարությունյանն իրենց ֆեյսբուքյան էջերում գրառումներ էին կատարել՝ նշելով, որ ահազանգել են ստացել Կրասնոդարից, թե «Սպայկա» ընկերությունը վերջին օրերին «փակել է Կարսնոդարի ամենամեծ` «Ռոզա վետռով» մեծածախ շուկան մնացած բոլոր ծիրան արտահանողների համար: Հայաստանից ծիրան արտաահնողները գալիս են այդ շուկա, այնտեղ հայտնում են, որ «Սպայկայից» են միայն ծիրան ընդունելու»: