Դա սպանություն է և արտաշիրիմումը պիտի արվի. մահացած զինծառայողի իրավահաջորդի ներկայացուցիչն արտաշիրիմում է պահանջում

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը` նախագահությամբ Արթուր Մկրտչյանի, մերժել է 2013թ. հուլիսի 31-ին զինծառայող Մանուչար Մանուչարյանին ինքնասպանության հասցնելու գործով տուժողի իրավահաջորդի ներկայացուցիչ Ռուբեն Մարտիրոսյանի՝ արտաշիրիմում անելու միջնորդությունը:

Այս մասին Tert.am-ի հետ զրույցում ասաց տուժողի իրավահաջորդի ներկայացուցիչ Ռուբեն Մարտիրոսյանը:

«Նախաքննության ժամանակ քննիչը զննելով Մանուչարյանի տաբատը, դրա աջ կողմում՝ ազդային շրջանում հայտնաբերել է 5 մմ տրամագծով անցք, և այդ անցքի շուրջ եղել են այրվածքի հետքեր և արյուն:

Այս բոլոր տվյալները եթե համադրում ենք, մենք հասկանում ենք, որ գործ ունենք հրազենային կրակոցի հետ: Այդ դրվագի կոծկումը ենթադրում է, որ անզգուշորեն է այդ փաստը մնացել գործում: Փորձագետներին ու դատաբժիշկներին հանձնարարություն է տրվել կոծկել այդ փաստը, իսկ քննիչը, լինելով շատ անտարբեր, դա թողել է գործի մեջ»,- ասաց Մարտիրոսյանը:

Նրա խոսքով՝ իր ասածը հաստատվում է նաև հետևյալում, որ փորձագետները գրում են, թե իբր տաբատի վրա ոչ մի անցք ու վնասում չկա, սակայն քննիչն արձանագրել է, որ կա. «Ինչպես կարող էր փորձագետը չտեսնել, եթե քննիչը տեսել է: Իմ միջնորդությամբ տաբատը հանվեց ու զննվեց, և համոզվեցին, որ այդ անցքը տաբատի վրա առկա է, բոլորին ցույց տվեցի»:

Փաստաբանը նաև նշեց, որ եթե կա մուտքի կրակոցի անցք և չկա ելքի անցք, ապա, մասնագիտորեն ասած, գնդակը՝ մխրճվելով Մանուչյանի ազդրի մեջ, մնացել է այնտեղ:

«Դատաբժշկական խմբի ղեկավարը, ով դատարանում ցուցմունք տվեց, ասաց, որ իրենք տաբատը չեն հետազոտել: Եթե դու չես հետազոտել, ինչպես ես եզրակացության մեջ գրում, որ տաբատի վրա վնասվածքներ չեն հայտնաբերվել:

Դրա հիման վրա ես հաղորդում գրեցի գլխավոր դատախազին, 1,5 տարի է այդ հաղորդումը պարբերաբար տալիս եմ, ոչ մի արձագանք՝ ո՛չ մերժման, ո՛չ ընթացք տալու մասին»,- ասաց Մարտիրոսյանը:

Փաստաբանն ասաց, որ միևնույն է, արտաշիրիմում լինելու է. «Դա սպանություն է, և քանի ես կամ՝ արտաշիրիմումն անպայման պիտի կատարվի»:

Հիշեցնենք, որ 2013-ին ՀՀ ՊՆ քննչական ծառայությունում զինվորի մահվան փաստի առթիվ հարուցվել է քրեական գործ ՀՀ քր. օր-ի 110 հոդ. 1-ին մասով՝ինքնասպանության հասցնելը:

Նշենք նաև, որ դատական նիստին ամբաստանյալ Բաբկեն Գաբոյանի պաշտպան Հրանտ Անանյանը միջնորդության է ներկայացրել իր պաշտպանյալի նկատմամբ՝ ՀՀ քրեական օրենսգրքի 360-րդ հոդվածի 2-րդ մասով քրեական հետապնդումը դադարեցնելու վերաբերյալ: Դատարանը դատական ակտ կկայացնի հաջորդ դատական նիստին;