Ցավի թեման բժշկության մեջ առանցքային է. արտասահմանում բնակվող բժիշկները կարևորեցին Աղվերանում անցկացվող գիտաժողովը

Ապրիլի 29-ին Աղվերանում մեկնարկած «Ցավը՝ ժամանակակից բժշկության հիմնահարց» խորագիրը կրող գիտաժողովին մեծ հետաքրքրություն ցուցաբերեցին արտասահմանյան բժշկական կենտրոններում աշխատող թե՛ ազգությամբ հայ, թե՛ այլազգի աշխատակիցները և բժշկական կազմակերպությունների ղեկավարները:

Ռուսաստանի երիտասարդ բժիշկների ընկերակցության տնօրեն Դիմիտրի Բուլետովը Past.am-ին ասաց, որ վաղուց են համագործակցում «Երիտասարդ բժիշկների հայկական ասոցիացիայի» հետ: Մենք ունենք հուշագիր, մշտապես մասնակցում ենք միմյանց միջոցառումներին:

Այսպիպի գիտաժողովների շնորհիվ երիտասարդները զարգանում են, փորձի փոխանակման և շփման դաշտ է ստեղծվում: Մենք ունենք շատ ընդհանուր թեմաներ, մեր երկրներն ունեն հարուստ անցյալ: Բժշկությունը նույնպես մեզ կարող է միավորել»: Գիտաժողովի թեմայի՝ ցավի մասին մեր զրուցակիցն ասաց, որ այն բժշկության մեջ առանցքային է: Ըստ Բուլետովի՝ երևի չկա մի հիվանդություն, որն առանց ցավի լինի: «Ցավն այնպիսի բան է, որը քիչ մարդ գիտի, թե ինչպես ճիշտ բուժել: Ցավը շատ ուժեղ է ազդում կյանքի որակի, աշխատունակության վրա: Այս կոնֆերանսին ցավի վերաբերյալ շատ հետաքրքիր հարցեր են դիտարկվում»:

Սրտաբան Արմեն Սևյանը բնակվում Գերմանիայում, աշխատում է Լեյպցիգի կլինիկայում:Past.am-ի հետ զրույցում նա մեծ ոգևորությամբ խոսեց այս միջոցառման մասին: «Ես ուրախ եմ, որ ինձ հրավիրել են, թեման շատ արդիական է: Հաճելի է, որ այլազգի շատ հյուրեր կան այստեղ: Սա արդեն ինչ-որ բանի մասին վկայում է: Արդեն կարելի է զեկույցներն ու դասախոսությունները միջազգային լեզվով՝ անգլերենով էլ անել, որպեսզի դրսից շատ հյուրեր լինեն և տեղի բժիշկները շատ կարողանան լսել օտարալեզու զեկույցներ»,-նշեց մեր զրուցակիցը:

Լևոն Փանոսյան