Թևան Պողոսյան. «Առայժմ տեսնում եմ միայն անձերի գործընթաց, ծրագրեր կամ այլընտրանքային մոդելների առաջարկներ չեմ տեսնում»

Մեր հյուրն է պատգամավոր Թևան Պողոսյանը.

– Այս պահին համագործակցության եզրեր կա՞ն որևէ քաղաքական ուժի կամ դաշինքի հետ:

– Նախկինում արտահայտած իմ դիրքորոշումը նույնն է՝ սպասում եմ ծրագրերի: Երբ կլինեն ծրագրեր, կդիտարկեմ, այլ առաջարկներ դեռ չեմ ստացել: Հրավերները պետք է լինեն լուրջ և աշխատանքային: Առայժմ տեսնում եմ միայն անձերի գործընթաց, ծրագրեր կամ այլընտրանքային մոդելների առաջարկներ չեմ տեսնում: «Ելք» դաշինքն է փորձում նոր մոտեցումներ բերել՝ երիտասարդների միջոցով: Բայց բացի նրանից առկա ուժերից միայն «Հանրապետականն» է, որ հասկանում է՝ ինչ է անելու: 

– Հնարավո՞ր է, որ կրկին «Ժառանգության» ցուցակով առաջադրվեք:

– Կասկածում եմ, որ «Ժառանգությունն» ինձ առաջարկություն կանի: Այնպես, որ այդ տարբերակը կարող ենք բացառել: Մի քանի կուսակցություն կա, որոնց հավանականությունը նույնպես կարելի է բացառել, բայց աշխարհում ամեն ինչ էլ հնարավոր է: 

– Հնարավո՞ր է, որ ոչ մի դաշինքի կամ կուսակցության ծրագրերը ձեզ դուր չգան և դուք միայնակ հանդես գաք:

– Ես ամեն անգամ շեշտում եմ, որ առայժմ չունեմ ցանկություն ինձ տեսնելու Ազգային Ժողովում: Ցանկությունս ավելի շատ է վերադառնալ իմ նախկին աշխատանքին՝ Ազգային զարգացման միջազգային կենտրոնի ղեկավար լինել, այնտեղ աշխատանքս շարունակել: 

– Եթե ամեն դեպքում մտափոխվեք և ցանկանաք պատգամավոր դառնալ, քարոզարշավի ժամանակ շեշտը ինչի՞ վրա կդնեք:

– Իմ արժեքային համակարգը նույնն է՝ ազատ տնտեսություն, ժողովրդավարական ինստիտուտների հզորացում, կոռուպցիայի դեմ պայքար: Սրանք ընդհանուր լոզունգներ են կամ տեսլական գաղափար: Հարցը այն է, թե մենք ինչպես ենք հասնում այդ նույն արդարադատությանը, տնտեսական զարգացմանը, ժողովրդագրական խնդիրների լուծմանը: Իմ արժեհամակարգը չի փոխվել: Ինչ ծրագիր կառաջարկեն, ինչ շեշտադրումներ կանեն, ինչ ուղղությամբ կաշխատեն, արդյոք դա հավատ կներշնչի իրենց տեսլականով առաջ գնալու և դրա հետ միասին նաև, թե ինչպիսին կլինի ձևավորված թիմը, ըստ այդմ էլ՝ հասկանալի կլինի, թե արդյոք այդ թիմը ծրագիրը կյանքի կոչելու պոտենցիալ ունի՞:

– Միգուցե պատգամավորի աշխատանքը ձեզ հոգնեցրե՞լ է ու այդ պատճառով դուք մյուսների նման ոգևորված չեք կրկին խորհրդարանում հայտնվելու մտքից:

– Այն, որ ցանկացած աշխատանք կատարում եմ ջանասիրաբար, դա երևի ինքներդ եք տեսել հինգ տարվա ընթացքում: Այնպես, որ ես աշխատել եմ, ոչ թե հանգստացել կամ վայելել եմ: Բայց երբևէ հոգնել գաղափարը ես չունեմ: Երբևէ չեմ հոգնել որևէ բանից, հատկապես՝ աշխատելուց: Նույն ձևի ջանասիրաբար շարունակելու եմ աշխատանքս՝ որտեղ էլ, որ աշխատեմ: Արածներիցս չեմ հիասթափվել:

– Միգուցե մյուս պատգամավորների աշխատելաոճի՞ց եք հոգնել, շատերը կոճակ սեղմողի համբավ ունեն:

– Ոչ: Դա միայն ինձ օգնում է, որ ես իմ եզրակացությանը հանգեմ՝ ում համար քվեարկեմ, ում համար չքվեարկեմ ապագա Ազգային Ժողովում: Դա ավելի շատ պետք է հանրությանը, որպեսզի նրանք հասկանան, թե ում են քվե տալու: Խնդիրը հոգնածության մեջ չէ, այլ հավատի, որ այդ թիմի հետ կարող ես փոփոխություն բերել: 

– Միգուցե հավատը չկա՞:

– Հավատը գալիս է նրանից, թե ինչ գործողություն են առաջարկելու: Բոլորս էլ կարող ենք ասել, թե ուզում ենք Հայաստանը դարձնել աշխարհի ամենագեղեցիկ երկիրը: Բայց եթե գործ չանենք, կդառնա՞: Չի դառնա: 

– Սեյրան Օհանյանի՝ ընդդիմադիր դաշտ մտնելու փորձերն ինչպես կգնահատեք:

– Սեյրան Օհանյանը, իմ պատկերացմամբ, առայժմ փորձում է հայտ ներկայացնել իր տեսլականով Հայաստանի զարգացվածության համար: Թե այդ հայտը որքան քվե կստանա և նա կհայտնվի ընդդիմադիր դաշտում, թե իշխանության մեջ, դա ապագան ցույց կտա: Թեև ինձ չի թվում, թե նա ընդդիմադիր դաշտում է աշխատում: Նա այլընտրանքային մոդել է փորձում առաջարկել: Երբ մոդելը կառաջարկի, իր թիմը կգնահատի այդ, և ստացած քվեի համաձայն նոր կարող ենք խոսել, թե որտեղ է հայտնվելու Սեյրան Օհանյանը:

– Իրական և կեղծ ընդդիմությանը ինչպե՞ս եք վերաբերվում:

– Ինձ համար ընդդիմադիր լինել, չի նշանակում մյուս կողմի ամեն մի ասածի հակառակը պնդել: Ինձ համար ընդդիմադիրի գաղափարը այն է, որ դու ունես այլընտրանքային մոդելի առաջարկ և ընդդիմանում ես այն քաղաքականությանը, որը կա: Շատերը մի կողմից մյուս կողմ են գնում: Այդ ժամանակ դու ունենում ես խնդիր, որ կեղծությունը ոչ թե ընդդիմություն կամ չընդդիմություն լինելն է, կեղծությունը նրանում է, որ մարդ ասել է սա իմ արժեհամակարգն է, սա իմ տեսլականն է, հաջորդ օրը կարող է փոխել իր կարծիքը: Արժեհամակարգերը պետք է չփոխվեն: Եթե դու հավատում ես արժեքներին, ուրեմն դու պետք է ստորագրես դրա տակ ու այդպես էլ շարունակես, ոչ թե մի օր այսպես ասես, մյուս օրը՝ այնպես, մի օր միանաս այս դաշտին, մի օր էլ՝ մեկ ուրիշ:

ՔՐԻՍՏԻՆԱ ՏԵՐ–ՄԱԹԵՎՈՍՅԱՆ