Հայկական զինված ուժերը միշտ պատրաստ են հակառակորդին արժանի հակահարված տալ. ԱԺ պատգամավորներ

 Ադրբեջանի կողմից անընդհատ ակտիվացող սահմանային լարվածության սանձազերծումը հաջողություններ չի գրանցելու, քանի որ հայկական Զինված ուժերը կարողանում են արժանի հակահարված հասցնել նրանց ցանկացած ոտնձգությանը: Ինչպես հայտնում է «Արմենպրես»-ը, լրագրողների հետ հանդիպմանը սա շեշտեց Ազգային ժողովի ՀՀԿ խմբակցության պատգամավոր, ԱԺ պաշտպանության , ազգային անվտանգության եւ ներքին գործերի մշտական հանձնաժողովի նախագահ Կորյուն Նահապետյանը` նշելով, որ Ադրբեջանը շարունակում է իր մշակած մարտավորությունը, ինչն ունի երեք նպատակ:«Անընդհատ լարվածության մեջ պահելով սահմանամերձ համայնքների բնակիչներին, խանգարելով բերքահավաքը` նրանք ցանկանում են խուճապի և անպաշտպանվածության վիճակ ստեղծել: Երկրորդը` սեփական հասարկության ուշադրությունը ներքին իրական խնդիրներից շեղելու միջոց է: Դուք գիտեք, որ առաջիկայում Ադրբեջանում նաև ընտրություններ են սպասվում, ու յուրաքանչյուր նեքին խնդիր Õ �րանք կապում են Արցախյան հիմնախնդրի հետ: Երրորդը, որ հոգեբանական ճնշում են ցանկանում գործադրել մեր հասարակության վրա»,-ասաց Կորյուն Նահապետյանը` հավելելով, որ ադրբեջանական կողմը էական ժամանակ է` թաքցնում է նաև սեփական կորուստները:

Պատգամավորը նկատեց, որ Ադրբեջանի նշյալ մարտավարությունը շարունակական է լինելու, հետևաբար պետք է միշտ պատրաստ լինել արժանի հակահարված տալուն թե ռազմական, թե դիվանագիտական մակարդակներում: «Առաջիկայում ՆԱՏՕ-ի խորհրդարանական վեհաժողովի տարեկան նստաշրջանն է կայանալու Նորվեգիայում: Ենթադրում եմ, որ ադրբեջանցիները փորձելու են աղավաղված ներկայացնել իրողությունները, սահմանին տիրող իրավիճակը և անդրադարձ է կատարվելու տխրահռչակ անձնավորության` Վահան Մարտիրոսյանի կողմից սահմանը հատելու փաստին: Ուզում եմ վստահեցնել, որ հստակ պարզաբանու մներ են տրվելու միջազգային կառույցներում այդ անձի առաջ քաշած հարցերի վերաբերյալ: Բոլոր խնդիրները, որոնց մասին նա բարձրաձայնել է, դրանց կապակցությամբ, գիտեք, գերակշիռ մասը իրականությանը չի համապաստախանում: Եթե կան խնդիրներ, դա չի կարող անձին մղել հայրենիքի դավաճանության»,-ընդգծեց Կարյուն Նահապետյանը:

«Ժառանգություն» խմբակցության քարտուղար Թևան Պողոսյանը, ով նաև ԱԺ վերոնշյալ հանձնաժողովի անդամ է, նշեց, որ մեզ համար պատերազմը դեռ չի ավարտվել, պետք է այդ հոգեբանությամբ ու պատրաստակամությամբ վարել քաղաքականությունն ու ապրել կյանքը: «Հակառակորդի ցանկացած գործողությանը պետք է արժանի պատասխան տալ, մեր հակառակորդը հասկանում է միայն մեկ լեզու` ուժի լեզուն»,-ասաց Թևան Պողոսյանը` ուրախություն հայտնելով, որ միջազգային կառույցները քիչ-քիչ սկսում են Ադրեբջանի գործողություններին համապատասխան արձագանք տալ:

Աշնան առաջին իսկ օրերից ադրբեջանական կողմը կրկին ակտիվացրել է կրակոցները սահմանամերձ բնակավայրերի ուղղությամբ: Սեպտեմբերի 23-ին կրակահերթերի տակ է եղել նաև Բարեկամավանը, իսկ սեպտեմբերի 21-ին` Հայաստանի անկախության օրը, սահմանամերձ Բաղանիսը: Սեպտեմբերի 23-ին ադրբեջանական կողմի կրակահերթից վնասվել է Դովեղի գազատարը: