Մանկական ցերեկային խնամքի կենտրոնը սպասարկում է հատուկ կարիքներ ունեցող 80 երեխայի

SOCIETY 28 November, 2016 11:06

Վարդենիս քաղաքի հաշմանդամություն ունեցող երեխաների ծնողների «Աստղավարդ» հասարակական կազմակերպության հիմնադրած մանկական ցերեկային խնամքի կենտրոնից օգտվում են Վարդենիսի տարածքի համայնքների հենաշարժական խնդիրներ ունեցող 80 երեխա: «Աստղավարդը» սպասարկում է նաեւ Վարդենիսի տարածքի համայնքների հաշմանդամություն ունեցող 230 շահառուների:

Ինչպես «Արմենպրես»-ին տեղեկացրեց «Աստղավարդ» ՀԿ նախագահ Մելանյա Եփրեմյանը, կազմակերպությունը հիմնվել է 2003 թվականին Վարդենիս քաղաքում, իսկ մանկական ցերեկային խնամքի կենտրոնը բացվել եւ գործում է 2007 թվականից: «Մեր կազմակերպությունը գործունեություն է ծավալում հիմնականում առողջապահական, կրթական եւ սոցիալական ոլորտներում: Շահառուներն են հաշմանդամություն ունեցող երեխաները եւ նրանց ընտանիքների անդամներ ը:

Կազմակերպության առաքելությունն է՝ աջակցել հաշմանդամություն ունեցող երեխաների հիմնահարցերի լուծմանը: «Աստղավարդն» ունի շուրջ 230 շահառու, որոնք ապրում են Վարդենիսի տարածաշրջանի համայնքներում: Նրանց մատուցվում են անհրաժեշտ ծառայություններ, ամեն տարի կազմակերպվում է 80 երեխայի համար ներառական ցերեկային ճամբար»,-ասաց Մելանյա Եփրեմյանը:

Ըստ կազմակերպության ղեկավարի՝ իրենց ամենամեծ ձեռքբերումը, սակայն, համապատասխան սարքավորումներով հագեցած մանկական ցերեկային խնամքի կենտրոնն է, որը հնարավոր է եղել ստեղծել 2003-2007 թվականներին դրամաշնորհային ծրագրերի, դոնոր կազմակերպությունների, անհատ բարերարների ֆինանսական աջակցության շնորհիվ: «Աստղավարդի» մանկական ցերեկային խնամքի կենտրոնում մատուցվում են ֆիզիոթերապիստի, լոգոպեդի, արտթերապիստի, հատուկ մանկավարժի, հոգեբանի եւ մասնագիտական ուսուցման ծառայություններ:

«Կենտրոնը հագեցած է բոլոր տեսակի մարզասարքերով, մարզական-վերականգնողական եւ մասնագիտական ուսուցման սարքավորումներով: Կենտրոնի նորոգման բոլոր աշխատանքները կատարվել են հաշմանդամ երեխաների ծնողների եւ կամավորների ջանքերով, շահառուներն են հենաշարժական ֆունկցիայի խանգարում ունեցող շուրջ 80 երեխա եւ նման խնդիրներ ունեցող մեծահասակներ: Կենտրոն այցելում են ոչ միայն այն անձիք, ովքեր հենաշարժական խնդիրներ ունեն, այլեւ ոչ ֆիզիկական խնդիրներ ունեցողները, նաեւ՝ սոցիալապես անապահով ընտանիքի երեխաները, ովքեր մարզվում են, շփվում կենտրոնի ահառուների հետ, նրանց հետ նաեւ պատրաստում իրենց դասերը: Կենտրոնի միջոցով լուծվում են մեր առջեւ դրված խնդիրներից մի քանիսը, այն է՝ հաշմանդամություն ունեցող անձանց դարձնել հասարակության լիիրավ անդամ, նպաստել նրանց շրջապատ մտնելուն, ընկերներ գտնել, ինչպես նաեւ թեթեւացնել խնդիրներ ունեցողների ծնողների հոգսերը, տալ նրանց լրացուցիչ գիտելիքներ ու հմտություններ, որոնք էլ լուծում են գտել մեր մյուս ծրագրերում»,-նշեց ՀԿ նախագահը:

«Աստղավարդ» մանկական ցերեկային խնամքի կենտրոնը համագործակցում է ՀՀ առողջապահության նախարարության հանրապետական մանկական վերականգնողական կենտրոնի հետ: Եւ տարվա մեջ մի քանի անգամ հանրապետական կենտրոնից մասնագետներ են գործուղվում Վարդենիս, իրենց կենտրոնի մասնագետների եւ շահառուների ծնողների համար կազմակերպում մասնագիտական խորհրդատվություններ, քննարկումներ: Վարդենիսից էլ երեխաներ են ուղեգրվում հանրապետական կենտրոն, որտեղ նրանք ստանում են մասնագիտական բուժում: «Աստղավարդի» ղեկավարը ներկայացրեց նաեւ մանկական ցերեկային խնամքի կենտրոնի առջեւ ծառացած խնդիրները, որոնց լուծման համար իրենք ակնկալում են պետության կամ բարերարների աջակցությունը: «Մեր հիմնական ծրագրերի ֆինանսավորման ժամկետներն ավարտվել են, ավարտվել են նաեւ մեր վերականգնողական կենտրոնի մասնագետների վճարումների ժամկետները, բայց նրանք դեռեւս շարունակում են կամավոր հիմունքներով աշխատել կարիքավոր երեխաների հետ: Մենք ունենք նաեւ ֆինանսավորման կարիք, որ կարողանանք մեր մասնագետներին աշխատավարձ վճարել ու պարապմունքները կազմակերպել: Չնայած «Վորլդ Վիժն» կազմակերպության տարածքային զարգացման ծրագրի միջոցով մեր շենքն ամբողջությամբ ապահովվել է ջեռուցման համակարգով, բայց մենք չենք կարողանում ջեռուցելշենքը՝ միջոցներ չունենալու պատճառով: Ակնկալում ենք ինչպես պետության, այնպես էլ առանձին բարերարների աջակցությունը: Մեր կենտրոնը Վարդենիսի տարածքի հաշմանդամ երեխաների եւ նրանց ծնողների համար կենսական կարեւոր խնդիր է լուծում, քանի որ հենաշարժական խնդիրներ ունեցող երեխաները մարզկենտրոնի կամ մայրաքաղաքի վերականգնողական կենտրոններ հասնելու հնարավորություն քիչ ունեն կամ չունեն»,-ընդգծեց Մելանյա Եփրեմյանը: