Ես չեմ հավատա, որ Սեյրան Օհանյանն ընդդիմադիր է. Կարեն Քոչարյան

Past.am-ի զրուցակիցն է քաղտեխնոլոգ Կարեն Քոչարյանը։

- Վիկտոր Դալլաքյանի ընդդիմադիր դառնալն ինչպե՞ս կմեկնաբանեք:

- Մարդ է, այդպես է որոշել: Հայաստանում դա վաղուց սովորական է:

- Մեզանում տարածված են դավադրությունների տեսությունները: Ըստ Ձեզ՝ Վիկտոր Դալլաքյանն ի՞ր կամքով է որոշել դառնալ ընդդիմադիր, թե՞ այդ դաշտ «գործուղված է» իշխանություննների կողմից:

- Ես զերծ կմնամ նման պիտակավորումներից: Դա նրա անձնական գործն է:

- Պաշտպանության նախկին նախարար Սեյրան Օհանյանը կանդամակցի՞ Դալլաքյանի կուսակցությանը: Այդ մասին մամուլը վերջին շրջանում շատ է գրում:

-Ես Վանգան կամ սուրճի բաժակ նայող չեմ, որ իմանամ՝ կանդամակցի՞, թե՞ չէ: Կիմանանք, երբ անդամակցի:

- Իսկ ինչպե՞ս կարձագանքի հասարակությունը, եթե Սեյրան Օհանյանը դառնա ընդդիմադիր:

- Ես չեմ հավատա, որ Սեյրան Օհանյանն ընդդիմադիր է: Կարծում եմ՝ հասարակությունն էլ չի հավատա, բայց մեր ընտրազանգվածն այսօր ավելի շատ զանգված է, քան թե ընտրազանգված:

- Դրան քաղաքական էլիտա՞ն է նպաստել:

-Ո՛չ, դրա միակ մեղավորը հասարակությունն է: Ո՞վ է մեղավոր, երբ ամեն ինչից հետո հասարակությունը շարունակում է որոշ ուժերի նորից ձայն տալ: Եթե մարդ իրեն վաճառում է, եթե պատրաստ է մարմինը, ընտանիքը վաճառել, ապա ի՞նչ ասես: Բուլգակովի «Վարպետն ու Մարգարիտայում» խոսվում էր հոգու վաճառքի մասին: Այստեղ ավելի սարսափելի բաներ են կատարվում: Այս ամենից հետո էլ մարդիկ սկսում են խոհանոցում բողոքել կյանքից: Չեմ հասկանում՝ ումի՞ց եք բողոքում: Օրինակ՝ վաճառում եք բնակարան կամ մեքենա, երեք տարի անց չեք ասում, չէ՞՝ այդ մարդը վատն էր, որ առավ մեքենան: Վաճառողը դուք եք, հասկանո՞ւմ եք: Մի խոսքով՝ այստեղ հասարակության, ժողովրդի խնդիրն է: Խոսքս բոլորի մասին չէ, ես խոսում եմ նրանց մասին, ովքեր տարիներ շարունակ վերցնելով են քվեարկել:

- Վանաձորի քվեարկությունը նույնպե՞ս այս համատեքստում եք դիտարկում:

- Իհարկե, այդ համատեքստում եմ դիտարկում: ՀՀԿ-ի՞ց են բողոքում Վանաձորում, ինչո՞ւ: ՀՀԿ-ն քաղաքական ուժ է, իր գործն արել է, «Լուսավոր Հայաստանը» և մնացած բոլորը պաշտպանել են իրենց շահերը: Եվ պետք է ասել, որ որևէ լցոնում, էական խախտում, այսինքն՝ այն, ինչ արվում էր տարիներ առաջ, հիմա չի արձանագրվել: Մեկ-երկու տեղ կարող էր լինել, բայց գրեթե բոլոր ընդդիմադիրներն ընդունել են, որ ընտրություններն անցել են նորմալ։ Նիկոլ Փաշինյանն ասել է՝ պետք է հասկանանք, թե ինչու պարտվեցինք:

- Վանաձորում ստորագրվեց հուշագիր ընդդիմադիրների միջև, բայց քվեարկությունը շատ կասկածներ առաջացրեց: Կազդի՞ այդ ամենը ընդդիմադիրների վարկանիշի վրա:

- Ես չեմ կարողանում հասկանալ մեր ընտրողների մենթալիտետը, որպեսզի ասեմ ՝ կազդի՞, թե՞ չի ազդի: Գոնե պարզ մարդկային տրամաբանության մեջ ինձ համար որևէ բան անհասկանալի է: Սա առաջին դեպքը չէ, այնպես էլ չէ, որ նախկին իրադարձությունները եղել են հարյուր տարի առաջ: Հիշողություները դեռ թարմ են:

- Կավելանա՞ր ժողովրդի վստահությունը, եթե քվեարկությունը տեղի ունենար նախատեսվածի նման: 

- Շատ դժվար է «եթե»-ներով խոսել։ «Եթե»-ն նույն սուրճի բաժակ նայելն է:

Հարցազրույցը՝ Լևոն Փանոսյանի