ԱՄՆ-ը Թուրքիային հորդորել է հարգել Իրաքի տարածքային ամբողջականությունը

Միացյալ Նահանգները Թուրքիային հորդորել է հարգել Իրաքի ինքնիշխանությունը: Ինչպես հաղորդում է «Արմենպրես»-ը, լրագրողների հետ ամենօրյա ճեպազրույցի ժամանակ խնդրին անդրադարձել է ԱՄՆ պետդեպարտամենտի խոսնակ Ջոն Քիրբին:

Անդրադառնալով Իրաքի վարչապետ Հայդալ ալ-Իբադիի հասցեին Թուրքիայի նախագահ Ռեջեփ Թայիփ Էրդողանի արած հայտարարությանը` Քիրբին ասել է. «Իրաքի բոլոր հարևանները պետք է հարգեն Իրաքի ինքնիշխանությունն ու տարածքային ամբողջականությունը: Իրաքում տեղակայված թուրքական ուժերն այնտեղ որպես միջազգային կոալիցիայի մաս չեն: Բաշիքայի հարցը պետք է լուծեն Իրաքի և Թուրքիայի կառավարությունները»:

Պետդեպի խոսնակն ընդգծել է, որ Միացյալ Նահանգները կողմ է երկխոսության ճանապարհով երկու երկրի միջև խնդրի լուծմանը:

Թուրքիայի նախագահ Էրդողանը հոկտեմբերի 11-ին, անդրադառնալով թուրքական զորամիավորումները իրաքյան Բաշիքա շրջանից դուրս բերելու վերաբերյալ Իրաքի վարչապետի հայտարարություններին, ասել է. «Դու, որ իմ անձը վիրավորում ես, իմ մակարդակին չես, իմ որակի չես, Իրաքից քո գոռալ-բղավելը մեզ համար բացարձակապես կարևոր չէ: Մենք գիտենք, թե ինչ ենք անելու, դա այդպես էլ իմացիր: Նա և առաջ չափդ ճանաչիր»:

Թուրքիայի մեջլիսը կողմ է քվեարկել Իրաքում շուրջ 2-հազարանոց զինված ուժերի տեղակայման ժամկետի երկարաձգմանը` դա պատճառաբանելով «ահաբեկչական խմբավորումների դեմ պայքարելու անհրաժեշտությամբ»:

Իրաքը դատապարտել է պաշտոնական Անկարայի նման որոշումը: Պաշտոնական Բաղդադը կատարվածն անվանել է Իրաքի ինքնիշխանության իրավունքի ոտնահարում` պահանջելով դուրս բերել զորքերն իր տարածքից: Թուրքական կողմը, սակայն, մերժել է այդ պահանջը:

Հոկտեմբերի 5-ին Անկարան և Բաղդադը կանչել էին հակառակ երկրի դեսպաններին` հայտնելու իրենց մտահոգությունը խնդրի առնչությամբ: Իրաքը հոկտեմբերի 6-ին Միավորված Ազգերի Կազմակերպության Անվտանգության խորհրդից պահանջել է արտակարգ նիստ գումարել` կապված իր տարածքում թուրքական զինված ուժերի ներկայության անօրինականության հետ:

Թուրքական զորքերը տեղակայված են Մոսուլի Բաշիքայի ռազմաբազայում: Դրանք այդտեղ են հաստատվել դեռևս 2015 թվականից` «Իսլամական պետություն» ահաբեկչական խմբավորման դեմ պայքարում իրաքցի զինվորներին և քրդական փեշմերգային վարժեցնելու հիմնավորմամբ: