Վրաստանի խորհրդարանի նախկին խոսնակը պահանջում Է վերահաշվել ընտրողների ձայները

 Վրաստանի խորհրդարանի նախկին խոսնակ, «Նինո Բուրջանաձե- Ժողովրդավարական շարժում» դաշինքի առաջնորդ Նինո Բուրջանաձեն հայտարարել Է, թե չի ճանաչում ընտրությունների արդյունքները եւ պահանջում Է վերահաշվել ընտրողների ձայները, տեղեկացնում Է «Արմենպրես»-ը:

Վրաստանի Կենտրոնական ընտրական հանձնաժողովի տվյալների համաձայն՝ բոլոր ընտրատեղամասերում ձայների հաշվումից հետո խորհրդարան Է անցնում երեք կուսակցություն՝ իշխող «Վրացական երազանքը», նախկին նախագահ Միխեիլ Սահակաշվիլիի «Միասնական ազգային շարժում» ընդդիմադիր կուսակցությունը եւ «Հայրենասերների դաշինքը»: Բուրջանաձեի դաշինքը հավաքել Է ձայների 3,53 տոկոսը՝ դրանով իսկ չհաղթահարելով նվազագույն շեմը:

«Ես հանդիպել եմ ԿԸՀ-ի նախագահ Թամարա Ժվանիայի հետ, նա ուշադիր լսել Է ինձ եւ վերցրել իմ պատրաստած բոլոր փաստաթղթերը, որոնք ինձ հիմք են տալիս մտածել, որ օրակարգում պետք Է դրվի ընտրությունների արդյունքների վերանայման հարցը: Մենք արդեն պատրաստել ենք ավելի քան 200 գանգատ, որոնք դատարան ենք ներկայացնելու: Իրականում մենք անհամեմատ ավելի շատ ձայներ ենք հավաքել, արդյունքները պետք Է վերանայվեն»,- ասել Է Բուրջանաձեն լրագրողներին:

«Միասնական ազգային շարժում» կուսակցությունում նույնպես հայտարարել են, որ ընտրությունները կեղծված են, այդուհանդերձ մտադրություն հայտնելով «շարոնակել պայքարը երկրորդ փուլում»: «Դրանք անարդար ու անազատ ընտրություններ Էին… արդյունքները շատ հեռու են իրականությունից»,- ասել Է ընդդիմադիր կուսակցության անդամ Գիգա Բոկերիան հոկտեմբերի 10-ին կայացած մամուլի ասուլիսում: Կուսակցության հիմնադիր Սահակաշվիլին Facebook-ի իր Էջում ընտրությունների արդյունքները համարել Է «համատարած զեղծարարություն», հաղորդել Է ՌԻԱ Նովոստին :