Հայաստանում բեռնափոխադրումների ծավալների աճը տնտեսագետը կապում է ՌԴ-ում տնտեսական ճգնաժամի թուլացման հետ

 Այս տարվա հունվար-օգոստոսին նախորդ տարվա նույն ժամանակահատվածի համեմատ Հայաստանում բեռնափոխադրումների 85.1 տոկոս աճը` մինչև 12 մլն 199 հազար տոննա, պայմանավորվել է ավտոմոբիլային տրանսպորտով բեռնափոխադրումների ծավալի 2.4 անգամ ավելացմամբ (9 մլն 624.6 հազար տոննա): Այս մասին տեղեկացնում է «Արմենպրես»-ը` հիմնվելով ՀՀ ազգային վիճակագրական ծառայության տվյալների վրա:

Ավտոմոբիլային բեռնափոխադրումների ընդհանուր ծավալում արտահանումը կազմել է 301.6 հազար տոննա (աճը 2015 թ. առաջին ութ ամիսների նկատմամբ` 15.3 տոկոս), ներկրումը` 860.7 հազար տոննա (աճը` 3.7 տոկոս), իսկ ներհանրապետական բեռնափոխադրումները` 8 մլն 462.3 հազար տոննա (աճը` 2.9 անգամ): 

Հայաստանի գործատուների հանրապետական միության նախագահ Գագիկ Մակարյանը «Արմենպրես»-ի հետ զրույցում Հայաստանում բեռնափոխադրումների ծավալի այս զգալի աճը կապեց ՌԴ- ում տնտեսական ճգնաժամի թուլացման հետ:

 «Բնականաբար, պարզ է, որ բեռնափոխադրումների ծավալների աճը կապված է Ռուսաստանում պահածոների և խմիչքների ծավալների ավելացման հետ, որոնք նախորդ տարիներին Ռուսաստանի հանդեպ պատժամիջոցների կիրառման և ռուբլու արժեզրկման պատճառով կրճատվել էին»,-ասաց Մակարյանը:

Իսկ ավտոմոբիլային բեռնափոխադրումների ծավալների աճը, տնտեսագետի խոսքով, պայմանավորված է գյուղատնտեսական մթերքների արտահանման ծավալների ավելացմամբ, քանի որ դրանք տեղափոխվում են ավտոմեքենաներով:

Ըստ ազգային վիճակագրական ծառայության տվյալների՝ երկաթուղային տրանսպորտով փոխադրվել է 1 մլն 670.1 տոննա բեռ. նվազումը կազմել է 5.5 տոկոս: Օդային բեռնափոխադրումերի ծավալը և աճը 2015 թ. հունվար-օգոստոսի նկատմամբ կազմել են, համապատասխանաբար, 9.7 հազար տոննա և 67.2 տոկոս: Մայրուղային խողովակաշարային տրանսպորտով բեռնափոխադրումների ծավալը 2016 թ. առաջին ութ ամիսներին, նախորդ տարվա նույն ժամանակահատվածի համեմատ, նվազել է 8.9 տոկոսով` մինչև 894.6 հազար տոննա: