Բանակին և պատերազմին անդրադարձած գրողներն արժանացան պարգևների

Հայաստանի գրողների միությունը ՀՀ պաշտպանության նախարարության հետ համատեղ Երևանում անցկացրեց ամենամյա գրական մրցանակաբաշխություն: Մրցանակաբաշխությանը մասնակցում էին բանակի, պատերազմի թեմային անդրադարձած գրողներ՝ Հայաստանից և Արցախից:

«Ծրագիրը չի սահմանափակվում մրցանակաբաշխությամբ: Այն ներառում է տարվա ընթացքում հանդիպումներ Հայաստանի և Արցախի զորամասերում ծառայող զինվորների հետ, տարբեր միջոցառումներ»,-«Արմենպրես»- ի հաղորդմամբ` նշեց Գրողների միության նախագահ Էդվարդ Միլիտոնյանը:

Պաշտպանության նախարարության տեղեկատվության և հասարակայնության հետ կապերի վարչության պետ, գեներալ-մայոր Վարդան Ավետիսյանն ընթերցեց մրցանակաբաշխության մասնակիցներին ուղղված ՀՀ պաշտպանության նախարար Սեյրան Օհանյանի ուղերձը.«Այս միջոցառումը գեղեցիկ ավանդույթ է դառնում: Դրա միջոցով մենք արժանին ենք մատուցում հայ բազմադարյան գրականության այսօրվա մշակներին, ովքեր ստանձնել են հայրենիքի սահմանները պաշտպանող զինվորների ու հրամանատարների կերպարը ստեղծելու դժվարին հանձնարարությունը»:

Ներկայացված էր չորս անվանակարգ:

«Լավագույն պոեզիա» անվանակարգում մրցանակների արժանացան Կարինե Աշուղյանը, Ղուկաս Սիրունյանը, Նորայր Գրիգորյանը, Նոնա Պողոսյանը, Սամվել Մարգարյանը:

«Լավագույն արձակ» անվանակարգում գլխավոր մրցանակի արժանացավ Հրաչ Բեգլարյանը` «Լոխ լավա» ստեղծագործության համար: Նույն ժանրում մրցանակներ տրվեցին նաև Ժաննա Հակոբյանին, Հակոբ Հարությունին:

«Լավագույն հրապարակագրություն» ժանրում մրցանակի արժանացան Սամվել Բեգլարյանը և Ալիխան Մամեն:

«Լավագույն գրականագիտություն» ժանրում մրցանակի արժանացան Պետրոս Դեմիրճյանը և Դիանա Մայիլյանը: «Հատուկ մրցանակ» տրվեց գեներալ-մայոր, բանաստեղծ Վարդան Ավետիսյանին: