Մեկնարկում է «Ամենախելացին» հեռուստանախագծի չորրորդ եթերաշրջանը. ինչ նոր անակնկալներ են սպասում հեռուստադիտողին

Blognews.am-ը գրում է.

Հոկտեմբերի 1-ից եթերում կլինի «Ամենախելացին» նախագծի չորրորդ եթերաշրջանը, որին մասնակցելու են 12-13 տարեկան դպրոցականները: Նախագիծը կրկին կդառնա իրենց գիտելիքները հարստացնել սիրող հեռուստադիտողների ուղեկիցը: Սա այն նախագիծն է, որտեղ առաջնահերթ է գիտելիքը, և որի շնորհիվ միայն կարելի է հաղթել մրցույթում: Նախագծի ստեղծագործական կազմը խոստանում է, որ նոր եթերաշրջանում ավելի հետաքրքիր մասնակիցներ կլինեն, ինչպես նաև չեն մոռանա խրախուսական նվերների մասին: Մասնակիցներն արդեն ընտրված են և արդեն նկարահանումները սկսվել են: Խաղի հայաստանյան կազմակերպիչները վստահեցնում են՝ նոր ու հետաքրքիր անակնկալների պակաս աշակերտները հաստատ չեն զգա:

Հարություն Արզումանյանը, ով նախագծի խմբագիրներից է, BlogNews.am-ի հետ զրույցում նշել է. «Մենք սպասում ենք, որ այս եթերաշրջանի մակարդակն ավելի բարձ պետք է լինի:  Պետք է ասեմ, որ նախորդ եթերաշրջանների համեմատ մենք շատ հաճելի փոփոխություն ունենք՝ հատուկ թեմաների ընտրության հետ կապված։ Եթե նախորդ եթերաշրջանների ժամանակ ընտրում էին այնպիսի թեմաներ, որոնք դպրոցում ուսումնասիրում էին, հիմա արդեն շատ հաճախ երեխաներն արվեստի,  գրականության,  կինոյի գործիչների են ընտրում, որոնց մասին դպրոցում չեն անցնում: Այսինքն՝ հաճելի է, որ երեխաներն ուսումնասիրում են արտադպրոցական նյութեր»:  

Հաղորդավարուհի Նազենի Հովհաննիսյանը խոստովանում է, որ իր կյանքում երբևէ ոչ մի նախագծի այսքան չի սպասել, որքան «Ամենախելացի»-ի նոր եթերաշրջաններին. «Ինձ համար մեծ զարմանք է, որ ժամանակն այսքան արագ անցավ, և մենք հասել ենք չորրորդ եթերաշրջանին: Ես ցանկանում եմ, որ ինտելեկտուալ հաղորդումները շատ լինեն»:

Կրթության և գիտության նախարարությունն արդեն չորրորդ եթեարշրջանն է՝ նախագծի կողքին է: Նախարարության ներկայացուցիչ ԿԳ նախարարի պաշտոնակատարի մամուլի քարտուղար Լուսինե Մարգարյանը  փաստում է, որ այս նախագիծը կարևոր խնդիրներ է լուծում գիտության և կրթության ոլորտում: «Այս առումով «Ամենախելացին» հաջողվածներից մեկն է: Հաղթողին, իհարկե, շատ կարևոր մրցանակ է սպասում, որի մասին կիամանաք միայն խաղի ավարտին»:

Նախագծի կողքին է  նաև Գազպրոմ Արմենիա ընկերությունը. «Սա այն եզակի նախագիծն է, որ ուղղված է դպրոցահասակ լսարանին, և վստահ ենք՝ շատ հաջողություններ է գրանցելու»,- նշում է  Գազպրոմ Արմենիա ընկերության հասարակայնության հետ կապերի ծառայության պետ Շուշան Սարդարյանը:

Աջակիցներից է նաև Յուքոմ ընկերությունը, որն արդեն չորս եթերաշրջան է՝ նախագծի կողքին է: «Սա ամենակարևոր ծրագրերից մեկն է, որտեղ երեխաները կարողանում են իրենց գիտելիքների շնորհիվ առաջ գնալ»,- նշում է ընկերության գլխավոր տնօրեն Հայկ Եսայանը:

Նյութը՝ Սիրանուշ Գրիգորյանի

Լուսանկարները՝ Կարեն Հովհաննիսյանի