Առաջին մանրամասները հայտնի դերասանների մասնակցությամբ «Կայարան» հեռուստասերիալից

Blognews.am-ը գրում է.

Անի Երանյանին, Ալեքսանդր Բաբասյանին, Աննա Հարությունյանին, Արփինե Իսրայելյանին, Տաթև Հովակիմյանին և այլ հայտնի դերասանների առաջինը նկատած և գլխավոր դերեր վստահած ռեժիսոր Ելենա Արշակյանը նոր դեմքերի է բերում հեռուստաեթեր։ Սեպտեմբերի 26-ին «ATV» հեռուստաընկերությամբ կմեկնարկի նոր հեռուստանովել՝ «Կայարան»-ը, որի ռեժիսորն ու պրոդյուսերը Ելենա Արշակյանն է, սցենարի հեղինակը՝ Անահիտ Մխիթարյանը։ Ելենան ֆիլմի մասին առաջին անդրադարձը վստահել է BlogNews-ին։

Ֆիլմում խաղում են Ալեքսանդր Բաբասյանը, Աննա Դովլաթյանը, Հայկ Սարգսյանը, Տաթևիկ Մելքոնյանը, Եվա Խաչատրյանը, Վարդան Հովսեփյանը և այլք, իսկ գլխավոր հերոսների դերերը Ելենան վստահել է Թատերական ինստիտուտի դերասանական բաժնի 4-րդ կուրսի ուսանողներ Վարուժան Մարգարյանին և Քրիստինե Կույումչյանին։ «Սովորությանս համաձայն՝ ի հայտ կբերեմ նոր դերասանների։ Համոզված եմ, որ Վարուժանն ու Քրիստինեն շատ կսիրվեն։ Թող մեծամիտ չհնչի, բայց այդ առումով դեռ չեմ սայթաքել։ Շատ տաղանդավոր երեխեք են, շատ եմ ուզում, որ հանրությունն իրենց ընդունի առաջին հերթին որպես լավ դերասանների։ Ժամանակը ցույց կտա՝ սխալվել եմ, թե ոչ»,- նշեց ռեժիսորը։

Անոնսում պատմությունը սկսվում է երեխաներով, սակայն Ելենան նշեց, որ ֆիլմը երեխաների մասին չէ։ «Պարզապես գործողությունները սկսվում են 1998 թվականից, երբ մեր հերոսները դեռ երեխաներ են։ Փակագծերը չեմ ուզում բացել, թե ինչու։ Դա պարզ կլինի ֆիլմի առաջին երեք սերիաներում»,- ասաց պրոդյուսերը և հավելեց, որ ֆիլմի հիմքում սիրո պատմություն է։

 

«Շատերի համար գուցե հասարակ թվա, սակայն որոշել ենք անդրադառնալ աշխարհում ամենամեծ զգացմունքին՝ սիրուն, կարծում եմ՝ հեռուստադիտողներին հետաքրքիր կլինի։ Հետաքրքիր, լարված, էմոցիոնալ մելոդրամա է լինելու։ Տևական դադարից հետո կրկին համագործակցել ենք Անահիտ Մխիթարյանի հետ։ «Անավարտ թռիչքից» հետո առաջին անգամ ենք համագործակցում»,- նշեց նա։

Թե ինչու «Կայարան», ռեժիսորը նկատեց, որ դա ևս պարզ կլինի առաջին սերիաների ընթացքում. «Չեմ ուզում մարդիկ բառի բուն իմաստով ընկալեն կայարանը. մեր հոգու կայարաններից մենք ճանապարհում և դիմավորում ենք մարդկանց։ Այս բառը փոխաբերական շատ իմաստներ ունի, և այդ ենթատեքստերը լինելու են ֆիլմում»։

Նախատեսվում է, որ «Կայարանի» առաջին եթերաշրջանը կավարտվի դեկտեմբերի վերջին։ Երկրորդ եթերաշրջան կլինի՞, թե՞ ոչ, կախված է հանրության արձագանքից։

Նյութը՝ Ամալյա Հովհաննիսյանի