Հայաստանը պետք է մեծ աշխատանք տանի Հայաստան-Իրան առեւտրաշրջանառությունը մեծացնելու համար. ԱԳ փոխնախարար

 ՀՀ ԱԳ փոխնախարար Ռոբերտ Հարությունյանի համոզմամբ`  Հայաստանը պետք է մեծ աշխատանք տանի Իրանի հետ առեւտրաշրջանառությունը մեծացնելու ուղղությամբ: Նրա խոսքով` թեպետ Իրան-Հայաստան առեւտրաշրջանառության 2016 թվականի առաջին եռամսյակի ցուցանիշները խոստումնալից են, դա դեռեւս բավարար չէ:

«Եթե նայենք նախորդ տարվա ցուցանիշները, ապա դրանք բավականին համեստ են` շուրջ  280 մլն դրամ, որից  80 մլն-ը արտահանումն է, իսկ 200 մլն-ը`  ներմուծումը: Եվ չնայած նրան, որ այս տարի արտահանման տեսանկյունից ունենք մոտ 3 անգամ աճ, կարծում եմ` այդ թվերը հեռու են այն նշանակետից, որ մենք կցանկանայինք ունենալ»,-«Արմենպրես»-ի հաղորդմամբ` լրագրողների հետ զրույցում նշեց Ռոբերտ Հարությունյանը:

ԱԳ փոխնախարարը կարեւորեց հոկտեմբերի 5-8-ը Իրանում հայկական ապրանքների եւ ծառայությունների ցուցահանդեսի անցկացումը հայ-իրանական առեւտրատնտեսական հարաբերությունների զարգացման տեսանկյունից:

«Այս միջոցառման կազմակերպմանն աջակցել է Իրանում ՀՀ դեսպանատունը: Սա շատ կարեւոր է, նախեւառաջ, դեսպանատների ակտիվացման համար տնտեսական բաղադրիչի մասով: Գիտենք նաեւ, որ հանվել են Իրանի դեմ կիրառվող պատժամիջոցները, այսինքն` արդեն ժամանակի հրամայական է ակտիվացնելու հարաբերությունները մեր հարեւան երկրի հետ: Սկսում ենք այս ցուցահանդեսով, սակայն, կարծում եմ, կշարունակենք կազմակերպել նաեւ այլ միջոցառումներ»,- ասաց ԱԳ փոխնախարարը: