«ՀԺ». Հովիկ Աբրահամյանը թռել է Դուբայ. նա դիսկոմֆորտի մեջ է

«Հայկական ժամանակ» թերթը գրում է. «Մեր ներկայիս իշխանական բուրգի ամենաազդեցիկ դեմքերից մեկը՝ ՀՀ այլեւս նախկին վարչապետ Հովիկ Աբրահամյանը, պատկերավոր ասած, ոչ այնքան կոմֆորտային վիճակում է հայտնվել:

Մեր տեղեկություններով նա նախօրեին մեկնել է Դուբայ: Պատճառը միայն այն չէ, որ ուզում էր հանգստանալ պաշտոնանկությունից հետո: Խնդիրն այն է, որ նույնիսկ մտերիմ թիմակիցների շրջանում իր նկատմամբ վերաբերմունքի որոշակի փոփոխություն է նկատվում։

Առաջիկա օրերին տեղի է ունենալու ՀՀ կապի եւ տրանսպորտի նախարարի պաշտոնակատար Գագիկ Բեգլարյանի որդու հարսանիքը, որին ներկա են գտնվելու գրեթե, բոլոր բարձրաստիճան պաշտոնյաները, այդ թվում նաեւ նորանշանակ վարչապետ Կարեն Կարապետյանը եւ առայժմ գործող կառավարության անդամները։ Եթե Աբրահամյանը լիներ Հայաստանում, ապա նույնպես պետք է մասնակցեր այդ միջոցառմանը, ինչը ակնհայտ դիսկոմֆորտ էր լինելու նրա համար։

Իսկ իր թիմակիցների վերաբերմունքի փոփոխության հիմնական պատճառն այն է, որ հրաժարականից հետո իշխանական բուրգում նրա հետագա «տեղն ու ազդեցությունը» խիստ անորոշ է։ Ի հեճուկս շրջանառվող լուրերի. Սերժ Սարգսյանը նրան գոնե առայժմ կոնկրետ որեւէ խոստում չի տվել: Այդ թվում նաեւ առաջիկա համապետական ընտրությունների ժամանակ նախընտրական շտաբը գլխավորելու առաջարկը:

Մի խոսքով այս պահին խիստ անորոշ է, թե հետագայում ինչ ազդեցություն է ունենալու Հովիկ Աբրահամյանը»:

Առավել մանրամասն՝ թերթի այսօրվա համարում