Գերմանիայի առաջնությունում ավարտվել է 2-րդ տուրը

 Գերմանիայի առաջնությունում ավարտվել է 2-րդ տուրը: «Արմենպրես»-ը հայտնում է, որ տուրի կենտրոնական խաղում միմյանց հետ հանդիպել են «Շալկե 04»-ը և Մյունխենի «Բավարիա»-ն:

Թիմերի միջև հանդիպումըկայացել է «Ֆելտինս» արենայում: Կառլո Անչելոտիի գլխավորությամբ  հանդես եկող «Բավարիա»-ն կարողացել է դժվարին պայքարում հաղթել 0-2 հաշվով: Ամբողջ խաղի ընթացքում հավասար պայքար է ընթացել խաղադաշտում և միայն խաղավարտին են մյունխենցիները կարողացել կոտրել համառ մրցակցի դիմադրությունը: Գոլերի հեղինակ են դարձել Ռոբերտ Լևանդովսկին և Ջոշուա Կիմիխը:

Բունդեսլիգայի նորեկներից «Լեյպցիգ»-ը սեփական դաշտում հանդիպեց չեմպիոնի կոչման գլխավոր հավակնորդներից մեկին՝ Դորտմունդի «Բորուսիա»-ին: Թոմաս Թուխիլի թիմն անակնակալ պարտություն կրեց նվազագույն հաշվով: Խաղի հիմնական ժամանակի նախավերջին րոպեին գոլի հեղինակ դարձավ Նաբի Կեյտան:

Առաջնության մեկնարկում երկրպագուներին զարմացնում է Բեռլինի «Հերտա»-ն: Այս տուրում մայրաքաղաքը ներկայացնող ակումբը մրցեց «Ինգոլշտադ»-ի հետ: Վեդադ Իբիշրիչի և Յուլիան Շիբերի գնդակները հաղթանակ պարգևեցին «Հերտա»-ին: 2-րդ տուրից հետո բեռլինյան ակումբը «Բավարիա»-ի հետ 6 միավորով գլխավորում է մրցաշարային աղյուսակը:

2-րդ տուրի մյուս զույգերում գրանցվեցին հետևյալ արդյունքները.

«Բայեր»-«Համբուրգ»` 3-1

«Դարմշտադ»-«Այնթրախտ»` 1-0

«Ֆրայբուրգ»-«Բորուսիա Մյունխենգլադբախ»` 3-1

«Վոլսբուրգ»-«Քյոլն»` 0-0

«Վերդեր»-«Աուգսբուրգ»` 1-2

«Մայնց»-«Հոֆենհայմ»` 4-4: