Թալիշում վիրավորված Ավետիսն առաջիկայում կտեղափոխվի Հնդկաստան. ծնողներին խոստացել են

Թալիշում ապրիլի 4-ին ծանր վիրավորված եւ ավելի քան 4 ամիս վերակենդանացման բաժանմունքում մնացած Ավետիս Զարգարյանին առաջիկայում կտեղափոխեն Հնդկաստան` հետագա բուժման: Այս մասին NEWS.am-ի թղթակցին ասաց Ավետիսի մայրը՝ տիկին Սոնյան:

«Մեզ ասել են, որ շատ շուտով Ավետիսին կտեղափոխեն Հնդկաստանի հոսպիտալներից մեկը, որտեղ ե՛ւ վերականգնողական բուժում կստանա, ե՛ւ դեղորայքային: Իրենց ասելով՝ որոշումն արդեն կա եւ հիմա սպասում ենք»,- ասաց տիկին Սոնյան:

Ավետիսի հետ Հնդկաստան նաեւ մայրն է մեկնելու` որպես խնամակալ: Ավելի վաղ Պաշտպանության նախարարությունից մեզ հայտնել էին, որ Ավետիս  Զարգարյանի վերականգնողական բուժումն արտերկրում կազմակերպելու ուղղությամբ ակտիվ աշխատանքներ են իրականացվել նաեւ «Հայկական վիրավոր հերոսների հիմնադրամ» կազմակերպության կողմից: Նրանք առաջարկում են Ավետիսի վերականգնողական բուժումը կազմակերպել Հնդկաստանի «Արտեմիս» հոսպիտալում:

Ավետիսը Ռուսաստանից էր եկել՝ ծառայության նպատակով, ընտանիքը Հայաստան է վերադարձել ապրիլին, Ավետիսի վիրավորվելու մասին իմանալուց հետո: Շուրջ 5 ամիս է՝ Ավետիսի ծնողներն ապրում էին բարեկամներից մեկի տանը, օրերս ստիպված բնակարան են վարձել եւ տեղափոխվել: Ինչպես են տան վարձը վճարելու, իրենք էլ չեն պատկերացնում. Ավետիսի մայրն ամբողջ օրը հիվանդանոցում է, որդուն է խնամում, իսկ հայրը դեռ աշխատանքի չի գտել: Նշենք, որ Հայաստան է վերադարձել նաեւ Ավետիսի եղբայրը, որը հաջորդ տարի պետք է ծառայության մեկնի:

Հիշեցնենք, որ քառօրյա պատերազմից օրեր անց Հայաստանի Կառավարությունը որոշում կայացրեց, որ այն վիրավոր զինծառայողները, որոնց չեն կարողանա Հայաստանում պատշաճ օգնություն տրամադրել, բուժման կուղարկվեն արտասահման բյուջետային միջոցներով: 5 ամիս է անցել, սակայն ոչ մի զինծառայողի դեռեւս արտասահման չեն ուղարկել, թեեւ այնտեղ բուժվելու կարիք մասնավորապես մի քանի զինծառայող ունեն: