Էլբակյանների գեղեցիկ ընտանիքը (լուսանկարներ)

Wnews.am-ը շարունակում է ներկայացնել հայ հեղինակավոր եւ սիրված անձանց ընտանիքները։ Այս անգամ ներկայացնում ենք հայ դերասան, թատերական ռեժիսոր, ՀՀ արվեստի վաստակավոր գործիչ Արմեն Էլբակյանի ընտանիքը։

Շատերի համար օրինակելի Էլբակյանների ընտանիքն այսօր նշում է Արմեն Էլբակյանի 62-ամյակը։ Wnews.am-ը եւս միանում է բոլոր շնորհավորանքներին եւ դերասանին մաղթում առողջություն ու երկար տարիների կյանք։

Արմեն Էլբակյանի կինը բազմաթիվ սիրված դերեր կերտած դրամատիկական թատրոնի սիրված դերասանուհի Աննա Էլբակյանն է։

«Կյանքիս որոշակի փուլում այնպես ստացվեց, որ ամուսնական ուխտս նորից պիտի նորոգեի, որ շատ բան էր խզվել: Ամուսնացել եմ 17 տարեկանում և այս անգամ արդեն գիտակից տարիքում` 35 տարեկանում, կանգնած էի այդ որոշման առջև:

Եվ այդ ժամանակ իսկապես պետք էր նժարի վրա դնել` ապրեմ մենա՞կ, նորից փորձեմ ուրիշի հետ կյանքս կապե՞լ, թե՞ նորոգեմ ուխտս: Եվ այդ ժամանակ հարցեր բարձրացան, թե ինչո՞ւ նորից, ինչո՞ւ միանալ: Բոլորս էլ գիտենք, որ կոտրված ափսեն որքան էլ ամրացնես, միևնույն է այդ ճաքը երևում է: Բայց երբ հասկացա, որ Աստծո կամքն է, որ բաժանված ամուսինները միանան, նորից փորձեցի անել այդ քայլը:

Եվ մինչ այսօր ես ոչ մի ուրիշ տղամարդու մեջ, որքան որ հանդիպել և հանդիպում եմ, չեմ տեսել այն մեծ տարողությամբ ու մեծ կշիռով առաքինությունը, որ կա իմ ամուսնու մեջ: Այսինքն` մարդ, ով ունի հստակ սկզբունքներ և այդ սկզբունքները բարոյական են, աստվածային են, և նա փորձում է ոչ միայն խոսքով, այլ նաև գործով ապրել դրանցով: Դա առաքինի տղամարդն է, և ինձ համար դա շատ կարևոր է»,- ասում է Աննա Էլբակյանը:

«Յուրաքանչյուր ամուսին, երբ քնից արթնանում է, պետք է այնպես անի, որ իր կինն իրեն նորից սիրահարվի: Չգիտեմ՝ ինձ դա հաջողվում է, թե ոչ, բայց ես շատ եմ սիրում իմ կնոջը, իմ զավակին, իմ թոռնիկին»,- խոստովանում է սիրված դերասանը։

Զույգը խոստովանում է, որ ամուր ընտանիքի հիմքը սերն է։

«Ամենադժվար բանն այս կյանքում հարաբերությունն է, անգամ մայր ու աղջիկ, որ թվում է` նույն սեռի են` մոր արգանդից դուրս եկած, բայց միևնույն է, կան տարաձայնություններ, որովհետև երկու տարբեր մարդիկ են: Ուստի բոլոր տեսակի հարաբերություններում շատ կարևոր է անկեղծությունը, միմյանց առաջ բացվելը, խոստովանելը, ներելը և երբևէ չմտածելը, որ դու ավելի լավն ես: Այս սկզբունքները ընտանիքում պետք է գործեն»,- ասում է Աննա Էլբակյանը:

Էլբակյանների դուստրը՝դերասանուհի Լիլի Էլբակյանը ամուսնացած է ռեփեր Համոյի հետ։ Նրանք ունեն  դուստր ու որդի։ Լիլին  դերասանուհի է և ռեժիսոր: