Այն ամենն ինչ հայտնի է iPhone 7 և iPhone 7 Plus մոդելների մասին` պաշտոնական ներկայացմանն ընդառաջ (լուսանկարներ)

 

BlogNews.am-ը գրում է.

 

 

Սեպտեմբերի 7-ին Սան Ֆրանցիսկոյում կայանալիք միջոցառման շրջանաներում Apple-ը կներկայացնի այս տարվա նորագույն արտադրանքները, այդ թվում և երկար սպասված նոր սերնդի iPhone-ները, որոնց մասին արդեն բավական տեղեկություններ են հրապարակվել տարբեր աղբյուրների կողմից:

Business Insider-ը ամփոփել է մինչ օրս հայտնի հավաստի և ենթադրյալ տեղեկությունները iPhone 7 և iPhone 7 Plus մոդելների մասին:

Սմարթֆոնների դիզայնը, ըստ կանխատեսումների, մեծ փոփոխության չի ենթարկվելու և քիչ կտարբերվի նախորդ սերնդի մոդելից: iPhone 7-ը կներկայանա 4.7 դյույմ էկրանով, իսկ Plus մոդելը` 5.5 դյույմ:

iPhone 7-ը համալրված կլինի ավելի մեծ տեսախցիկով, որը նշանակում է, որ բարելավված որակի շնորհիվ սմարթֆոնն ավելի լավ լուսանկարներ կանի:

Plus մոդելը համալրված կլինի կրկնակի տեսախցիկով, որը միաժամանակ երկու նկար պատկերելու և դրանք մեկ նկարում համադրելու հնարավորություն կտա:

Ըստ մի շարք հաղորդումների` ականջակալների միակցիչ այլևս չի լինելու սմարթֆոնների վրա: Ականջակալները կհարմարեցվեն սմարթֆոնի լիցքավորման համար նախատեսված միակցիչին կամ Bluetooth ականջակալներ կկիրառվեն:

Հավանական է, որ նոր անլար ականջակալներ ներկայացվեն, որոնց ուղղությամբ, ըստ աղբյուրի, ամերիկյան ընկերությունն սկսել է աշխատել ամիսներ առաջ:

Սմարթֆոնի գլխավոր կոճակը ևս փոփոխության կենթարկվի: Այն իրականում կոճակի տեսքով չի լինի, այլ կներկայանա որպես ճնշման նկատմամբ զգայուն հարթակ։

Հնարավոր է սմարթֆոնները ներկայանան նոր գույներով` մուգ կապույտ և փայլուն սև:

Ինչպես նախկինում արդեն հաղորդվել էր, iPhone 7-ը կարող է լինել անջրանցիկ: Նորագույն սմարթֆոնը կկարողանա մոտ 30 րոպե աշխատել մի քանի մետր խորությամբ ջրում:  

Բացի նորագույն սմարթֆոններից, տեխնոլոգիական հսկան կարող է ներկայացնել Apple Watch-ի նոր տարբերակը, նոր Beats ականջակալներ, ինչպես նաև տեղեկացնել iOS 10, macOS Sierra, tvOS և watchOS 3 համակարգերի թողարկման ամսաթիվը: