Համաշխարհային տնտեսությունը 2016 թվականին կաճի 3%-ով

Հաճախ ենք խոսում տարբեր երկրների տնտեսության, զարգացման և տարբեր ոլորտներում արձանագրված փոփոխությունների մասին: Այս պարագայում տեղին է նաև հիշատակել, որ այդ բոլոր տնտեսությունները, ոլորտներն ու հարակից այլ ենթակառուցվածքները համաշխարհային տնտեսության բաղադրիչներն են: Իհարկե, դրանց ներգրավվածությունը համաշխարհային տնտեսության մեջ բավական տարբեր է, քանի որ այդ երկրների տնտեսական մասշտաբները խիստ տարբեր են, հետևաբար, դրանց ազդեցության չափն էլ համապատասխանաբար տարբեր է:

Որպես ասվածի վառ օրինակ կարող ենք ներկայացնել Ճապոնիայի կառավարության կողմից վերջին տարում իրականացված տնտեսական քաղաքականության փոփոխությունը և դրա ունեցած ազդեցությունը համաշխարհայի տնեսության վրա: Մասնավորապես, այդ երկրի վարած խթանող հարկաբյուջետային քաղաքականությունը պատճառ է դարձել երկրի համար տնտեսության աճի կանխատեսումների վերանայման, ինչն էլ հանգեցրել է համաշխարհային տնտեսության աճի` 2016 և 2017 թվականների համար իրականացված կանխատեսման` մինչև 0,9% փոփոխության:

Այսպիսով, համաձայն ՕՊԵԿ-ի հրապարակած տվյալների` վերջին տարում համաշխարհային տնտեսության համախառն ՀՆԱ-ն կազմել է շուրջ 75 տրիլիոն դոլար, որը նույն հրապարակման կանխատեսումների համաձայն` 2016 թվականի ընթացքում կաճի %-ով, իսկ հաջորդ տարի՝ 3,1%-ով:

Ներկայացնելով անցնող տարում համաշխարհային տնտեսության կառուցվածքը` պետք է նշենք, որ գյուղատնտեսությանը բաժին է ընկել համաշխարհային ՀՆԱ-ի 4%-ը, արդյունաբերությանը՝ 32 %-ը, և ամենամեծ մասը բաժին է ընկել ծառայությունների ոլորտին` կազմելով 64 %:

Բավականին ուշագրավ են նաև խոշոր տնտեսական սուբյեկտների` այս տարվան վերաբերվող տնտեսական ցուցանիշներն ու դրանց կանխատեսումները: Մասնավորապես, վերանայվել է ԱՄՆ տնտեսության աճի 2016 թվականի կանխատեսումը և այն իջեցվել է մինչև 1,7%-ի՝ առաջին կիսամյակում երկրի ՀՆԱ-ի ցածր աճի պատճառով։ 2017 թվականի համար կանխատեսումը մնացել է նույնը՝ 2,1%։ Եվրոգոտու համար կանխատեսումը ևս մնացել է անփոփոխ` 1,5%՝ 2016 թվականի ընթացքում և 1,2%՝ 2017 թվականի ընթացքում։