Ինչպե՞ս ընտրել ժամադրության զգեստը

Shabat.am-ը գրում է.

Չե՞ս կողմնորոշվում՝ ինչ զգեստ ընտրել այդքան սպասված ժամադրության համար: Այդ հարցում քեզ կարող են օրինակ ծառայել հայտնի կանայք, որոնք, շնորհիվ հմուտ ոճաբանների, շատ լավ գիտեն՝ որ հագուստն է կատարյալ համապատասխանում իրենց կազմվածքին:

Գայթակղիչ կազմվածք 
Կերպար` Քելլի Բրուք

Քելլիին հաջողվում է իր ավազե ժամացույց հիշեցնող կազմվածքը մատուցել կատարյալ շահավետ կերպով: Նա պարբերաբար ճանաչվում է ամենասեքսուալ դերասանուհին թե՛ կանանց, թե՛ տղամարդկանց կողմից հավասարապես, բայց դա ամենևին չի նշանակում, որ Քելլին կարող է կրել ցանկացած հագուստ: Եթե դու զգայական ու հյութեղ արտաքին ունես, կարևոր է ընտրել հստակ ուրվագիծ ունեցող, բայց ոչ չափազանց ձիգ հագուստ: Արտահայտիչ գոտկատեղով զգեստը միայն կընդգծի քո բարեմասնությունները, այնպես որ մի՛ փորձիր թաքցնել արտաքինդ լայն, ընդարձակ հագուստների մեջ: Չէ՞ որ ինչքան էլ անտեսենք այդ ակնհայտ ճշմարտությունը, միևնույն է, տղամարդիկ շատ են սիրում գայթակղիչ կազմվածք:

Սպորտային կազմվածք 
Կերպար` Քեմերոն Դիաս

Եթե դու սպորտային կազմվածք ունես, վստահ ցուցադրի՛ր սլացիկ մարմինդ: Ի տարբերություն շատերի՝ դու կարող ես կրել առանց ուսակապի հագուստներ և համարձակ զգեստներ, ինչը չեն կարող իրենց թույլ տալ այլ արտաքինի տեր կանայք ու աղջիկներ: Դու մարմնիդ որևէ մասը թաքցնելու կարիք չունես, ուստի օգտվի՛ր այդ հնարավորությունից: Եթե մտավախություն կա, որ կազմվածքիդ պատճառով փոքր-ինչ տղայական տեսք ունես, ապա կրի՛ր խոշոր զարդեր, բարձր կրունկներ ու լայն գոտիներ` ավելի արտահայտիչ ուրվագիծ ստանալու համար:

Արտահայտիչ կուրծք կազմվածք 
Կերպար` Անջելինա Ջոլի

Արտահայտիչ կուրծքը միայն երջանկություն չէ: Այն ևս ունի իր բացասական կողմերը: Հարկավոր է կրել հատուկ բացվածքներով բլուզներ, որպեսզի այդ շքեղ բարեմասնությունը համապատասխան կերպով ներկայացվի և ոչ պատշաճ տպավորություն չստեղծի իր տիրուհու մասին: Օրինակ՝ թույլատրելի է ոչ շատ խոր՝ V-ձև բացվածքը, մինչդեռ փակ բլուզներից արժե խուսափել: Եվ, ամենակարևորը, հիշի՛ր ոսկե օրենքը` կա՛մ կուրծքը, կա՛մ ոտքերը: Երբեք ի ցույց մի՛ դիր երկուսը միաժամանակ: Չէ՞ որ պետք է տեղ թողնել նաև տղայի երևակայության համար:

Փոքր կուրծք կազմվածք 
Կերպար` Քիրա Նայթլի

Փորձի՛ր ուսակապերով զգեստներ, որոնք ծավալ կհաղորդեն մարմնիդ վերնամասին, և օգտվի՛ր կրծկալ չպահանջող նուրբ շապիկներ կրելու հնարավորությունից: Դու կարող ես ագնամ աչքի ընկնող բաց զգեստներ կրել առանց անհամեստ թվալու վտանգի: Արտահայտիչ զարդեր, հետաքրքիր դետալներով զգեստներ ընտրելով՝ դու կհասնես այն բանին, որ անգամ ոչ շատ մեծ կուրծք ունենալու դեպքում նրա հայացքը կգամվի մարմնիդ հենց այդ մասի վրա:

Փոքրամարմին կազմվածք 
Կերպար` Սառա-Ջեսիքա Փարքեր

Փոքրամարմին աղջիկները կարող են կրել գրեթե ցանկացած ոճի հագուստ, ուստի օգտվի՛ր այդ եզակի հնարավորությունից: Կարող ես կրել թե՛ միատոն, թե՛ նախշերով, թե՛ բարդ գործվածքներից կարված զգեստներ: Մի՛ կարծիր, թե ցածր հասակը թերություն է. այդ պակասը հեշտորեն կարելի է լրացնել բարձր կրունկների միջոցով: Երեք քառորդ թևքն ավելի երկար ցույց կտա մարմնիդ ստորին մասը, իսկ երկար, մինչև հատակը հասնող թույլ զգեստները քո կազմվածքով աղջիկներին, ընդհակառակը, խորհուրդ չեն տրվում: Շեշտի՛ր անուշիկ ու նրբագեղ ոճը և չե՛ս սխալվի:

Մարմնեղ կազմվածք 
Կերպար` Քելլի Օզբորն

Սև գույնը մարմնեղ աղջիկների լավագույն ընկերն է: Բարակ իրանի տպավորություն ստեղծելու համար հաստ գոտի կապի՛ր մարմնիդ ամենաբարակ մասին, ինչպես սիրում է անել Քելլին: Պահարանումդ կտրած թևքով հագուստներ ունեցիր` ձեռքերդ ավելի նուրբ դարձնելու համար, և բարձր կրունկներ, որոնք սլացիկություն կհաղորդեն կազմվածքիդ: Հատուկ ներքնազգեստը շատ կարևոր և օգտակար է նման կազմվածքի դեպքում: Այն, իհարկե, կարող է հրաշքներ գործել` մարմնիդ ուզածդ ուրվագիծը հաղորդելով: Բայց ճիշտ հակառակ ազդեցությունը կունենա, եթե ձեր անցկացրած հաճելի երեկոն շարունակություն ստանա: