Լյուդմիլա Սարգսյանն իմ ընկերը չէ. Զոյա Թադևոսյան

Ընդդիմադիր քաղաքական կուսակցությունների այցելությունները նախագահական նստավայր և նրանց մասնակցությունը սահմանադրական փոփոխությունների շուրջ քննարկումներին սուր քննադատությունների են ենթարկվում մամուլում, սոցիալական ցանցերում, նրանց գործընկերների շրջանում և այլուր:

Այդ ամենն առավել անսպասելի է դառնում, երբ հիշում ես այդ նույն ընդդիմադիրների նախկինում արված հայտարարություններն առ այն, որ այս փոփոխություններն արվում են իշխանության վերարտադրության համար:

Հիշեցնենք, որ Սերժ Սարգսյանի հետ արդեն հանդիպել են ԲՀԿ-ն, ՕԵԿ-ը, ՍԴՀԿ-ն, «Ազատ Դեմոկրատները», նույնիսկ ՀՀՇ-ն և այլ կուսակցություններ:

Նշենք, որ ՀՀՇ անդամ Կարապետ Ռուբինյանն այսօր հայտարարեց կուսակցությունից հեռանալու մասին: Ռուբինյանն իր ֆեյսբուքյան էջում գրեց, որ մամուլից է տեղեկանում ՀՀՇ ղեկավարների՝ Բաղրամյան 26 այցի մասին:

Ըստ Կարապետ Ռուբինյանի՝ կուսակցության համագումարը, խորհուրդը կամ վարչությունը չեն լիազորել Բաղրամյան 26 այցելածներին ներկայացնելու կուսակցության դիրքորոշումը խնդրի վերաբերյալ, այն պարզ պատճառով, որ չեն քննարկել նման հարց: Անսպասելի էր նաև Վերամիավորված սոցիալ-դեմոկրատական հնչակյան կուսակցության ներկայացուցիչների այցը նախագահական:

Past.am-ը ՀԱԿ-ի ներկայացուցիչ Զոյա Թադևոսյանին հարցրեց՝ ինչպիսի՞ն է վերջինիս վերաբերմունքն ընդդիմադիր դաշտի իր այն գործընկերների հանդեպ, ովքեր այցելում են նախագահական նստավայր:

Զոյա Թադևոսյանն ասաց, որ իր ընկերները նախագահականում չեն հայտնվում: Տիկին Թադևոսյանին հարցրեցինք՝ ինչ կարծիք ունի ՀԱԿ խմբակցության պատգամավոր, ՍԴՀԿ ատենապետ Լյումիլա Սարգսյանի այցի մասին և արդյոք դիտարկում է նրան որպես գործընկեր: «Նա իմ ընկերը չէ»,- պատասխանեց մեր զրուցակիցը:

Լևոն Փանոսյան