Օլիգարխի ուսյալը ո՞րն է

Գնալով սաստկանում են Արմեն Գեւորգյանին հանրապետության վարչապետ նշանակելու մասին լուրերը:

Լա՞վ հետեւանքներ կարող է ունենալ Գեւորգյանի նշանակումը երկրի տնտեսության վրա, թե՞ հակառակը:

Առաջին հայացքից Գեւորգյանը այնպիսի կադր է, ինչի պակասը հանրապետության կառավարությունում զգալի է: Սակայն մամուլի հրապարակումներից պարզ է դառնում, որ նախկին փոխվարչապետն ու ԱԱԽ այժմյան քարտուղարը նույնպես օլիգարխ է, ինչից կուշտ է հանրությունը, սակայն ի տաբերություն շատ օլիգարխների՝ ունի հիանալի կրթություն:

Եվ հաջորդ հարցն է առաջանում. կրթվա՞ծ օլիգարխիան է վտանգավոր, թե՞ կիսագրագետ: Դժվար է ասել: Պետք է դատել Գեւորգյանի՝ տարածքային կառավարման նախարար եւ փոխվարչապետ աշխատելու տարիներով: Դա 2008-2014 թվականներին էր, եւ դժվար չէ հիշել, որ հայաստանյան իրականության մեջ առանձնապես ոչինչ չի փոխվել:

Իսկ ահա Արմեն Գեւորգյանի եւ նրա ընտանիքի բիզնես գործերը աջ են եղել եւ շարունակում են աջ գնալ: Գեւորգյանի ընտանիքը Չեխիայում բնակարանների վարձակալությամբ է զբաղվում, ինքն էլ 350 հազար դոլարի չափով տոկոսով փող է տվել:

Արմեն Գեւորգյանի ընտանիքի անդամները Չեխիայում անշարժ գույքի վարձակալությամբ զբաղվող մի քանի ընկերությունների բաժնետերեր ու համահիմնադիրներ են: Օրերս «Հետք»-ը հանդես է եկել այս մասին ծավալուն հոդվածով:

Չնայած Արմեն Գեւորգյանն իր ետբուհական կյանքի գրեթե բոլոր տարիներին պետական պաշտոններ է զբաղեցրել, զուգահեռաբար կարողացել է բիզնես գործունեություն ծավալել:

Բանը հասել է նրան, որ, ինչպես պարզել է «Հետք»-ը, հեռավոր Չեխիայում անշարժ գույքի վարձակալությամբ են զբաղվում Արմեն Գեւորգյանի կինը, հայրը, մայրը, զոքանչն ու աները, տնօրինելով միանգամից հինգ ընկերության՝ «OFTOMA»-ն, «RUBENDYAN INVEST»-ը, «RUBENDYAN CITY»-ն, «RUBENDYAN CONSULT»-ն ու «RUBENDYAN HOLDING»-ը:

«OFTOMA»-ն գրանցված է Գեւորգյանի կնոջ՝ Թամարայի անունով, եւ զբաղվում է բնակելի ու ոչ բնակելի տարածքների վարձակալությամբ, մեծածախ եւ մանրածախ առեւտրով: 2009թ. «OFTOMA»-ի 15-ական տոկոսի փայատեր են դարձել Արմեն Գեւորգյանի մայրն ու զոքանչը:

Բարձրաստիճան պաշտոնատար անձանց էթիկայի հանձանաժողովին Գեւորգյանի ներկայացրած հայտարարագրերում ոչինչ նշված չէ այդ հսկայածավալ գույքի եւ բիզնեսի վերաբերյալ որեւէ տեղեկություն:

Արմեն Գեւորգյանն իր ընտանիքի՝ Չեխիայում ծավալած բիզնեսի վերաբերյալ պարզաբանում է տվել «Հետք»-ին եւ դա փորձել հիմնավորել նրանով, որ ինքն անձամբ այդ ընկերություններում ոչ բաժնեմաս է ունեցել, ո՛չ հիմնադիրն է եղել եւ ո՛չ էլ որեւէ պաշտոն է զբաղեցրել:

Թամարա Գեւորգյանի 2008թ. հայտարարագրում նշված է, որ նա կատարել է 10 հազար 800 դոլարի ներդրում, ինչը «OFTOMA»-ի հիմնադրման համար ծախսված գումարն է:

Բարձրաստիճան պաշտոնատար անձանց էթիկայի հանձնաժողովին ներկայացված 2009թ. հայտարարագրում Թամարա Գեւորգյանի ունեցվածքի «ձեռքբերած եւ օտարած արժեթղթեր եւ այլ ներդրումներ» տողի դիմաց գրված է պաշտպանված: Սա օրենքի պահանջ է, ինչը հնարավորություն է տալիս մանրամասները թաքցնել հանրությունից: Ըստ Թամարա Գեւորգյանի 2012թ. հայտարարագրի՝ բիզնես-լեդին նշված տարում 250 հազար ԱՄՆ դոլար է պարտքով տվել: Նույն տարում Գեւորգյանի կինը 40 հազար ԱՄՆ դոլար է որպես նվիրատվություն ստացել: 2013թ-ի հայտարարագրում արժեթղթերի եւ բաժնեմասերի վերաբերյալ տվյալներ չկան:

Արմեն Գեւորգյանի՝ 2016թ-ի ն ԱԱԽ քարտուղարի պաշտոնը ստանձնելու հայտարարագրում նշված է, որ նա 11 միլիոն դրամ եւ 350 հազար ԱՄՆ դոլար փոխառություններ ունի, որոնցից ստացված տոկոսները կազմել են մոտավորապես 5 միլիոն 880 հազար դրամ:

Ըստ մամուլի հրապարակումների՝ Արմեն Գեւորգյանին են պատկանում «Արդշինինվեստբանկ», «Կոնվերս բանկ» ընկերություններում բաժնեմասեր, Հյուսիսային պողոտայում շենքերի կառուցապատմամբ զբաղվող ընկերություններում՝ 30 տոկոսի բաժնեմասեր:

Նրան է պատկանում նաեւ անշարժ գույք Դուբայում եւ ԱՄՆ-ում: Գեւորգյանը նաեւ «Տոյոտա Երեւան» ՍՊԸ-ի 30 տոկոսի բաժնետերն է։ Նա բնակարան ունի Սանկտ Պետերբուրգում, Երեւանում, իսկ Կոտայքի Քարաշամբ գյուղում՝ նաեւ 2 հողամաս:

Նելլի Ամիրյան