Ողբերգական ավտովթար Լոռու մարզում. ВАЗ 2106-ը մի քանի պտույտ գլորվելով՝ կողաշրջվել է մայթին. կա 1 զոհ, 2 վիրավոր. ֆոտոռեպորտաժ

Shamshyan.com-ը գրում է.

Այսօր` օգոստոսի 22-ին, Լոռու մարզի Ալավերդի քաղաքում ողբերգական ավտովթար է տեղի ունեցել:

Ժամը 18:20-ի սահմաններում Ալավերդի քաղաքի Ջրավազան թաղամասի հարակից տարածքում Լոռու մարզի Աքորի գյուղի բնակիչ, 50-ամյա Լյովա Մարտիրոսյանը իր վարած ВАЗ 2106 մակնիշի 34 LQ 816 համարանիշի ավտոմեքենայով ընթանալիս՝ կորցրել է կառավարումը և մի քանի պտույտ գլորվելով՝ կողաշրջվել մայթեզրի երկաթյա ձողերի և դեղատան պատի արանքում:

Ինչպես հայտնում է ֆոտոլրագրող Գագիկ Շամշյանը, վթարի հետևանքով, Լ. Մարտիրոսյանը, նրա ուղևորներ, համագյուղացիներ, 71-ամյա Ռոբերտ Թաթոյանը և 55-ամյա Սեյրան Պեպանյանը դեպքի վայր ժամանած շտապօգնության մեքենայով տեղափոխվել են Ալավերդու բժշկական կենտրոն:

Ֆոտոլրագրողի տեղեկություններով՝ Ս. Պեպանյանը հիվանդանոցի ճանապարհին գիտակցության չգալով՝ մահացել է: Փաստի առթիվ Լոռու մարզային քննչական վարչության Թումանյանի քննչական բաժնի ավագ քննիչ Արարատ Ուլիխանյանի կողմից նյութեր են նախապատրաստվում:

Քննիչի որոշմամբ ավտոմեքենան տեղափոխվել է պահպանվող հատուկ տարածք: Ֆոտոլրագրողը հայտնում է նաև, որ վարորդ Լ. Մարտիրոսյանն ու նրա ուղևորներ, Ռ. Թաթոյանը և Ս. Պեպանյանը նախկին ոստիկաններ են և նրանք վերադառանալիս են եղել ծառայակցի որդու հոգեհանգստի արարողությունից:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Լուսանկարները Էդիկ Սիմոնյանի