Ինձ և Սիրուշոյին մաղթում եմ հաղթանակ. Անդրեն BAMA Music awards-ի և իր նոր ռեալիթի շոուի մասին

Երգիչ Անդրեն երկար ժամանակ է, ինչ բնակվում է Միացյալ Նահանգներում: Շուտով նա իր երկրպագուներին կներկայանա նոր հեռուստանախագծով` իր նոր հեղինակային Andrenaline շոու-ծրագրով, որն իր շուրջն է համախմբել տաղանդավոր երիտասարդների:

 

Tert.am Life-ի հետ զրույցում աշխատասեր երգիչը պատմեց նոր նախագծի և BAMA Music մրցանակաբաշխությանը նոմինացվելու մասին:

«Ռեալիթի շոու ունենալու գաղափարը վաղուց էր ծագել ինձ մոտ և ահա որոշեցի իրականացնել այն: Դա լինելու է երաժշտական նախագիծ, որտեղ կմրցեն նոր դեմքեր: Մասնակիցները կմրցեն վոկալային տվյալներով, և ստիպված կլինեն անցնել մի շարք այլ փորձությունների միջով: Հեռուստադիտողը կկարողանա հետևել նրանց պայքարին նաև կադրից դուրս: Իսկ հաղթող մասնակիցը կունենա ինձ հետ պայմանագիր: Անհամբերությամբ սպասում եմ Andrenaline շոուի եթեր հեռարձակվելուն: Ուզում եմ, որ վերջապես, հեռուստադիտողը տեսնի մեր այս օրերի ընթացքում տարած աշխատանքի արդյունքը: Շատ տաղանդավոր, հետաքրքիր ու հմայիչ մասնակիցներ ունենք: Համոզված եմ,  նրանցից յուրաքանչյուրը կկարողանա ուրույն տեղ գրավել հեռուստադիտողների սրտերում»,- ասաց երգիչը:

 

 

Երգիչը դեռևս անցած տարվանից ծրագրել էր ԱՄՆ-ում ներկայանալ մեծ մենահամերգով: Նրա խոսքով. «Ճիշտն ասած` այս պահին ամբողջությամբ կլանված եմ ռեալիթի շոուի աշխատանքների մեջ: Շոուն իրոք ժամանկատար է և ուրիշ ոչինչ չեմ հասցնում անել այս ընթացքում, իսկ համերգի հետ կապված կոնկրետ փակագծեր դեռևս չէի ցանկանա բացել, քանի որ դեռ ինքս էլ շատ բաների շուրջ չեմ հասցրել մտածել: Բայց մենահամերգն ինձ համար լուրջ քայլ է, և կարող եմ վստահեցնել, որ այդ համերգն էլ է տարբերվելու շքեղ շոուներով և սիրված ելույթներով»:

 

 

Ինչպես արդեն նշեցինք երգիչը նոմինացված է գերմանական հեղինակավոր BAMA Music մրցանակաբաշխության «Լավագույն կատարող» անվանակարգում:

 

««Լավագույն կատարող» անվանակարգում ինձ հետ առաջադրված են նաև այլ սիրված անուններ, այդ թվում Ելենա Ռիստեսկան, որին հեռուստադիտողը, միգուցե հիշի «Եվրատեսիլ 2006»-ի ելույթով: Նա ներկայացնում էր Մակեդոնիան: Միասին մասնակցում էինք մրցույթին, փաստորեն, տասը տարի անց կրկին միասին ենք ներկայանալու այս անգամ նման հեղինակավոր մրցանակաբաշխությանը, ինչն ինձ համար հետաքրքիր և հաճելի զուգադիպություն է»,- նշեց երգիչը:

 

 

Գերմանական հեղինակավոր մրցանակաբաշխությանը, որը կկայանա օգոստոսի 27-ին, նոմինացված են մի շարք սիրված արտիստներ` Alvaro Soler-ն ու Jennifer Lopez-ը,  Maître Gims-ը, Timati-ն, Sergey Lazarev-ը, Ani Lorak-ը և շատ ու շատ հայտի դեմքեր: Նշենք, որ Հայաստանի երգիչներից նոմինացված է նաև Սիրուշոն:

 

«Ես` ինքս այս մրցույթից ակնկալում եմ դրական հույզեր, նոր հնարավորություններ, նոր լսարան և ինչո՞ւ ոչ` նաև հաղթանակ: Նույնը մաղթում եմ Սիրուշոյին, որն ինձ համար շատ հարազատ ընկեր և քույր է: Հուսով եմ` երկուսիս սպասելիքներն էլ կարդարանան»,- ասաց Անդրեն:

 

 

Անդրեն Միացյալ Նահանգներում կմնա այնքան ժամանկ մինչև ամբողջությամբ ավարտի իր բոլոր աշխատանքները:

 

«Այստեղ կմնամ դեռ այնքան, մինչև որ կարողանամ ավարտին հասցնել բոլոր ծրագրերս: Երբ ես նպատակ եմ դնում իմ առջև, ամեն ինչ անում եմ դրան հասնելու համար: Սա էլ բացառություն չէ և հույս ունեմ, որ նախագիծը կսիրվի և կունենա հետագա հաջողություններ: Բայց անչափ կարոտում եմ Հայաստանը, Երևանը, Ստեփանակերտը: Կարոտում եմ ընտանիքիս, ընկերներիս: Համոզված եմ` անգամ կարճ ժամանակ գտնելու դեպքում անպայման կայցելեմ Հայաստան»,- նշեց նա:

 

 

Վերջում հետաքրքրվեցինք երգչի անձնական կյանքով: Հարցին` Անդրե, երկար ժամանակ գլխավորում եք ցանկալի փեսացուների շարքը: Չեք ցանկանաում զիջել Ձեր դիրքերը, երգիչը պատասխանեց. «Կարծում եմ դա մեր ուզելով կամ չուզելով չէ լինում: Ժամանակն է ամեն ինչ իր տեղը դնում: Ես դեռ պատրաստ եմ սպասել այնքան, մինչև գտնեմ իմ իրական ու անբաժան կողակցին: Ինձ համար դա լուրջ քայլ է, այնպես որ ես դեմ չեմ առայժմ մնալ այդ ցուցակում (ժպտում է)»:

 Մելինե Տոնոյան