Ամռանը ճիշտ սնվելու կանոնները. խորհուրդներ դիետոլոգ Վարդանուշ Պետրոսյանից

Life.panorama.am-ը գրում է.

Թե ինչպե՞ս ճիշտ սնվել ամռանը, մեր օրգանիզմն այս եղանակին ինչի՞ կարիք ունի եւ հակառակը՝ սննդի հարցում ինչի՞ց պետք է հրաժարվել: Թեմայի շրջանակում Life.panorama.am-ը զրուցել է սննդաբան (դիետոլոգ) Վարդանուշ Պետրոսյանի հետ:

«Սնունդը պետք է միշտ համապատասխանի եղանակին, եթե դրսում չոր եղանակ է, ինչպես ամռանը՝ Երեւանում, ուրեմն ավելի շատ հեղուկներ պետք է օգտագործել: Տաք եղանակին սնունդը պետք է ավելի հովացնող լինի, իսկ այս պարագայում լավագույն տարբերակը բանջարեղեներն են, մրգերն ու հատապտուղները: Հատկապես մեր երկրում աճող բանջարեղեներն ու մրգերը շատ օգտակար են մեր օրգանիզմի համար»,- նշեց սննդաբանը:

Քանի որ ամռանը սննդային թունավորման դեպքերը ավելի մեծանում են, ուստի թե այս տեսանկյունից եւ թե օրգանիզմին առողջ սնունդով ապահովելու փաստից ելնելով՝ Վարդանուշ Պետրոսյանն ընդգծեց. «Ամռանը ճիշտ սնվելու առանձնահատկություններից է նաեւ կաթնամթերքի, եւ հատկապես մածունի օգտագործումը: Մածունն իր մեջ պարունակող օգտակար նյութերի շնորհիվ ամռանը շատ կարեւոր է մեր օրգանիզմի համար: Քանի որ ամռանը սննդային թունավորումների դեպքերը խիստ մեծանում են, մարսողությունը դժվարանում է, այս պարագայում շատ օգնում է հենց մածունի օգտագործումը: Հայկական ավանդական խոհանոցում մենք թան ունենք, որը եւս կարելի է օգտագործել»:

Դիետոլոգը շոգ եղանակի համար առանձնացրեց նաեւ հեղուկի օգտագործման կարեւորությունը, սակայն այս պարագայում հավելեց.

«Հեղուկի մասին ոչ մի դեպքում չպետք է մոռանալ, քանի որ հատկապես ամռանը, երբ շատ ենք քրտնում, այն բառի բուն իմաստով անհրաժեշտ է մեր օրգանիզմին: Պետք չէ սպասել ծարավելուն, հեղուկ պետք է օգտագործել մինչեւ ծարավի զգացում ունենալը, քանի որ ծարավն իրենով ջրազրկման նշան է: Ի դեպ՝ շատերը փորձում են ծարավը հագեցնել կամ զովանալ քաղցր եւ գազավորված ըմպելիքներով, ինչը սխալ է, քանի որ դրանք ստիպում են նորից ու նորից ուտել եւ խմել: Ջրի հագեցման լավագույն տարբերակը հենց մաքուր ջուրն է»:

Անդրադառնալով ամռանը միայն մրգով, ավելի հաճախ ձմերուկով սնվելու միջոցով նիհարելուն՝ Վարդանուշ Պետրոսյանը նշեց. «Սնունդը պետք է բալանսավորված լինի: Պետք է ուտել բոլոր սննդային խմբերից՝ մրգեղեն, հատապտուղներ, բանջարեղեն, կաթնամթերք, միս, սպիտակուցային սնունդներ, հացահատիկներ, ճարպեր: Չկա մի ուտելիք, որի մեջ բոլոր օգտակար հավելումները կան, եթե մենք բալանսավորված չենք ուտում, մեր օրգանիզմին ճիշտ «վառելիք» չենք տալիս»:

Հեղինակ՝ Անուշիկ Մելքոնյան