Ռուսական մշակույթի փառատոնն աշխուժացնելու է Հայաստանի մշակութային կյանքը

Հայաստանում կանցկացվի Ռուսաստանի մշակույթի փառատոն, որը մեկնարկելու է օգոստոսի վերջին և կտևի մինչև տարեվերջ: Այս մասին հայտարարեց ՌԴ մշակույթի նախարարի տեղակալ Ալլա Մանիլովան օգոստոսի 17-ին հրավիրված ասուլիսում:  «Օգոստոսի 20-ին Գյումրի քաղաքի «Պատվո բլուր» հուշահամալիրում կանցկացվի ռուս ռազմիկների հիշատակին նվիրվծ միջոցառում Սանկտ Պետերբուրգի «Դուխովենստվո» երգչախմբի մասնակցությամբ: Միջոցառմանը ներկա կլինեն Ռուսաստանի դեսպանը, Գյումրու քաղաքապետը և այլք: Երևանում ելույթ կունենա «Բիս Կվիտ» անսամբլը: Խմբի անդամները ռուսական ժողովրդական գործիքներ են նվագում»,-«Արմենպրես»-ի փոխանցմամբ` նշեց Ալլա Մանիլովան:

Միջոցառումների պաշտոնական մեկնարկը կտրվի սեպտեմբերի 3-ին՝ Արամ Խաչատրյան համերգասրահում: Բացմանը ելույթ կունենան Մարինյան թատրոնի  մենակատարները՝ Հայաստանի սիմֆոնիկ նվագախմբի ուղեկցությամբ, «Օտրադա» մանկական երգչախումբը: Սպասասրահում կգործի «Ռուսաստանի ոգին» խորագիրը կրող մանկական ցուցահանդեսը: Սեպտեմբերի 4-ին և 5 –ին մի շարք միջոցառումներ կանցկացվեն Ստանիսլավսկու անվան ռուսական պետական դրամատիկական թատրոնում: Սեպտեմբերի 6-ին կինոյի օր կհայտարարվի Երևանի կինոյի և թատրոնի պետական ինստիտուտում: Սեպտեմբերի 14-ից 16 -ը Երևանում, Գյումրիում, Աբովյանում կանցկացվի Ռուսական կինոյի շաբաթ: Կցուցադրվեն ռուսական լավագույն ֆիլմերը. կլինեն հետահայաց ցուցադրություններ:

«Ռուսական և հայկական մշակույթները պատմականորեն փոխկապակցված են: Հայաստանի և Ռուսաստանի միջև հարաբերությունները  միշտ կայուն են եղել և՛ տնտեսական, և՛ մշակութային, և՛ քաղաքական առումով: Կարծում եմ՝ մեր հարաբերությունները այս փառատոնի շրջանակում չեն ավարտվի:  Կլինեն այլ  համագործակցություններ: Հուսամ՝ Հայաստանի և Ռուսաստանի հարաբերությունները ապագայում էլ կայուն և խոստումնալից կլինեն»,-ասաց միջազգային մշակութային համագործակցության գծով ՌԴ նախագահի հատուկ ներկայացուցիչ Միխայիլ Շվիդկոն:

Ռուսաստանը նման նախագծեր է իրականացնում 2008թ-ից: 2016թ-ից մշակութային իրադարձություններ են անցկացվել Հունաստանում, Մակեդոնիայում, Ղրղըզստանում, Սլովենիայում, Ուզբեկստանում: Նախատեսվում են փառատոններ անցկացնել Բուլղարիայում, Ֆրանսիայում, Իսպանիայում: