ՄԱԿ-ի գլխավոր քարտուղարը դատապարտել է Եմենում հիվանդանոցին հասցված ավիահարվածը

ՄԱԿ-ի գլխավոր քարտուղար Պան Գի Մունը դատապարտել է Եմենում հիվանդանոցին հասցված ավիահարվածը, որի պատասխանատու են համարում Սաուդյան Արաբիայի գլխավորած կառավարամետ կոալիցիային, եւ պահանջել է անցկացնել միջադեպի անկախ հետաքննություն: Գրավոր հայտարարության մեջ նա ուշադրություն է դարձրել այն բանի վրա, որ հակամարտության ընթացքում երկրում վնասվել կամ ավերվել են 70-ից ավելի բուժհիմնարկներ:

«Գլխավոր քարտուղարը դատապարտում է գյուղական հիվանդանոցին հասցված ավիահարվածը, որը վերագրվում է կոալիցիային: Նա նշում է, որ Եմենում հակամարտության կողմերը վնասել կամ ոչնչացրել են 70-ից ավելի բժշկական կենտրոններ»,-ասված է հայտարարության մեջ:

Օգոստոսի 15-ին «Բժիշկներ առանց սահմանների» մարդասիրական կազմակերպությունը հայտնել է, որ Եմենում կառավարամետ կոալիցիայի զորքերն օդային հարվածներ են հասցրել ապստամբների վերահսկողության գոտում գտնվող հոսպիտալին: Կազմակերպության բժիշկներն այդ հիվանդանոցում աշխատում էին 2015 թվականից:

Վերջին տվյալների համաձայն՝ ռմբակոծման հետեւանքով զոհվել է 11 մարդ, 19 հոգի վերքեր է ստացել:

Եմենում դիմակայությունն սկսվել է 2014 թվականի օգոստոսին: 2015 թվականի մարտի 26-ին Սաուդյան Արաբիան արաբական մի շարք պետությունների աջակցությամբ ռազմաօդային գործողություն է իրականացնում հուսիների «Անսար ալլահ» շարժման դեմ: ՄԱԿ-ի տվյալներով՝ մարտական գործողությունների հետեւանքով այնտեղ զոհվել է ավելի քան 6,4 հազար մարդ, տուժածների թիվն անցնում է 30 հազարից, հաղորդել է ՏԱՍՍ-ը: