Իսկական տղամարդու 4 հատկություն

1. Տղամարդիկ իրենց հաշիվ են տալիս իրենց խոսքերի եւ արարքների մասին

Այն 40 տարվա ընթացքում, որ անցկացրել եմ այս մոլորակի վրա, այն եզրակացությանն եմ հանգել, որ հաճախ տղամարդկանց մեծամասնությունը (հենց «մեծամասնությունը», որովհետեւ ոչ բոլորն են այդպիսին) ուղղակի չի մտածում այն մասին, թե իր  խոսքերն ու արարքներն ինչպես կազդեն շրջապատողների վրա: Վերցրեք, օրինակ, այն տղամարդուն, որը սառնասրտորեն սպանում է կնոջ անհատականությունը, կամ` հորը, որը մշտապես բառային փսխուք է թափում իր երեխաների վրա:  Նրա, ով բռունցքներով հարձակվում է մրցակցի վրա` ջանալով ինչ-որ բան ապացուցել: Նրա, ով ականջ է դնում իր ես-ին, փոխանակ սրտին լսելու:  

Սեփական խոսքերը եւ արարքները ֆիլտրելու համար ինքնակարգապահություն է անհրաժեշտ, համբերություն եւ կշռադատվածություն: Յուրաքանչյուր պատասխանը պետք է հենց պատասխան լինի` գիտակցված եւ մտածված: Հակազդելը բնազդային է եւ միայն փոքր տղաներին է սազում: Իսկ տղամարդիկ մտածում են այն մասին, ինչ անում են եւ ասում: 

2. Տղամարդիկ իրենց իդեալական չեն համարում

Նրանք պատրաստ են ընդունել իրենց թերությունները: Նրանք բաց են եւ չեն խրտնում մտերմանալու յուրաքանչյուր փորձից:  Նրանք ուղղակիորեն արտահայտում են իրենց զգացմունքները: Նրանք չեն փորձում լինել այն, ինչ չեն: Նրանք ջանում են չներքաշվել բարձր հնչերանգով անիմաստ վեճերի մեջ: Հակամարտության բախվելով` նրանք ընդունում են դրա գոյությունը, պատասխանատվություն են ստանձնում եւ ամեն ինչ անում են դրա շուտափույթ հանգուցալուծման համար: Նրանք շարունակում են առաջանալ: 

3. Տղամարդիկ կյանքում նպատակ ունեն

Նպատակ, ձգտում, երազանք: Ինչ-որ բան, հանուն ինչի արժե մարտնչել: Եվ պարտադիր չէ, որ դա լինի աշխարհի փրկությունը: Այդ նպատակը կարող է լինել նաեւ նրանց ամբողջ կյանքի սիրո փնտրտուքը: Արեւի տակ արժանի տեղ զբաղեցնելու ձգտումը: Իրեն արվեստի մեջ արտահայտելը: Աղքատներին օգնելը: 

Ինքնակատարելագործումը: Մի խոսքով, ինչ-որ բան, որին կարելի է հավատալ, նույնիսկ եթե ուրիշներին դա հիմար է թվում: Իսկական տղամարդիկ արարիչներ են եւ կարեւոր չէ, թե նրանք կոնկրետ ինչ են կառուցում` կայսրություն, թե համեստ տուն իրենց ընտանիքի համար: Իսկ փոքրիկ տղաներն ընդամենը ի վիճակի են ամեն ինչ ավերել:  

4. Իսկական տղամարդիկ վճռական են

Տղամարդիկ անում են, իսկ փոքրիկ տղաներն ընդամենը բողոքում են: Պիտի խոստովանեմ,  ես միայն վերջերս եմ գիտակցված որոշում կայացրել` վերջ տալ նվնվալուն, երբ ամեն ինչ իմ ուզածի պես չի գնում:  Շատ վատ սովորույթներ, ինչպիսին անընդհատ նվնվալն է եւ ցասման մշտական բռնկումները, բխում են մտածողության չկարգավորվածությունից եւ սեփական հույզերը վերահսկելու անկարողությունից:  Ես առիթ եմ ունեցել շատ տղամարդկանց ճանաչել, որոնք մշտապես պատմում էին, թե ինչքան են ուզում փոխվել:   Ինչպես են ուզում «առողջացնել» իրենց ամուսնությունը: Քաշ գցել: Լավ հայր դառնալ: Ավելի քիչ խմել, ստել, խաղալ, ծախսել:   Բայց նրանցից միայն քչերի համբերությունը եւ վճռականությունն է հերիքում իրենց խոսքերը կյանքի կոչելու: Ընդամենը քչերն են ի վիճակի լինում փորձել հաղթահարել իրենց առաջ կանգնած խոչընդոտը դարձյալ եւ դարձյալ, իսկ սայթաքելիս` վեր կենալ եւ վերսկսել փորձերը: Միայն քչերի բառերը խոսքերից չեն տարբերվում: 

Իսկ այժմ մտածեք ձեր կյանքի տղամարդկանց մասին: Ընկերների: Հայրերի: Պապերի: Եղբայրների: Մարզիչների: Ընկերների: Ամուսինների: Նրանցից քանիսն ունի վերոհիշյալ բոլոր չորս որակները: Եվ եթե այդպիսիք գտնվեն, գնահատեք նրանց, ինչպես ուրիշ ոչ մեկին: Որովհետեւ նրանք հազվագյուտ են եւ այս աշխարհը նրանց նմանների կարիքն ունի:

  Աղբյուրը՝  NEWS.am STYLE