Թուրքական 32 դիվանագետներ փախուստի մեջ են

32 դիվանգետներ հետ են կանչվել Թուրքիա, սակայն անհայտ պատճառներով առանց թույլատրության չեն վերադարձել երկիր:

Այս մասին վկայակոչելով թուրքական NTV հեռուստաալիքը, Իրանի ԱԳՆ ղեկավար Մոհամեդ Ջավադ Զարիֆի հետ Անկարայում կազմակերպված համատեղ մամուլի ասուլիսում հայտարարել է Թուրքիայի արտաքին գործերի նախարար Մեւլյութ Չավուշօղլուն` նշելով, որ ռազմական հեղաշրջման փորձի հետ կապված դիվանագիտական ծառայությունից հետ են կանչվել ընդհանուր թվով 208 դիվանգետներ:

Նա նաեւ անդրադարձել է Բանգլադեշում աշխատող թուրքական դիվանագետների ԱՄՆ եւ Ռուսաստան փախչելուն:

«Մենք հետ ենք կանչել երեք դիվանագետի, որոնք աշխատում էին Բանգլադեշում մեր դեսպանատանը: Նրանցից մեկը վերադարձել է եւ աշխատանքի անցել հայրենիքում, մնացած երկուսը փախել են ԱՄՆ: Մենք այդ մասին իմացել ենք վերջերս եւ մանրամասնորեն հետաքննում ենք այդ հարցը», -ասել է Չավուշօղլուն:

Daily Star հրատարակությունը` հղում կատարելով դիվանագիտական աղբյուրներին, հայտնել էր, որ Բանգլադեշում Թուրքիայի դեսպանատան աշխատակիցը հեղաշրջման փորձին մասնակցության կասկածանքի պատճառով փախել է Ռուսաստան, իսկ դիվանագիտական առաքելության հավատարմատարը` ԱՄՆ:

Հրատարակության տվյալներով` դիվանագետը եղել է Թուրքիայի դեսպանատան երեք աշխատակիցների մեջ, որոնց Անկարան հետ է կանչել: Երկուսը, այդ թվում` գործերի հավատարմատար Ահմեդ Գուրբուզը, փախել են ԱՄՆ: Ռուսաստան փախած դիվանագետը իր հետ տարել է նաեւ իր ամբողջ ընտանիքը:

Բանգլադեշի ԱԳՆ աղբյուրները հրատարակությանը հայտնել են, որ Անկարան չեղյալ է հայտարարել երեք դիվանագետների դիվանագիտական անձնագրերը:

«Ռեյթեր» լրատվական գործակալությունը` հղում կատարելով ամերիկացի չինովնիկներին, հայտնել է, որ Ամերիկյան Վիրջինիա նահանգ Նորֆոլկ քաղաքում գտնվող ՆԱՏՕ-ի ստորաբաժանումում ծառայող թուրքական սպան ապաստան է խնդրել ԱՄՆ-ում այն բանից հետո, երբ նրան հետ է կանչել թուրքական կառավարությունը կապված երկրում հունիսի 15-ին տեղի ունեցած ռազմական հեղաշրջման փորձի հետ:

Իր հերքին Վաշինգտոնում թուրքական դեսպանության ներկայացուցիչը հայտարարել է, որ Անկարան տեղեկություն չի ստացել Թուրքիայի ռազմածովային ուժերի փոխծովակալ Մուստաֆա Ուղուրլուից այն բանից հետո, երբ Թուրքիայի իշխանությունները հուլիսին նրա ձերբակալության հրահանգ են տվել:

Թուրքական «Հյուրիեթ»-ը գրել է, որ Թուրքիայի ներքին գործերի նախարար Աֆղան Ալան հայտարարել է, որ այսպես կոչված «Ֆեթուլլահ Գյուլենի ահաբեկչական կազմակերպության» (FETO) դեմ անցկացված գործողության շրջանակում 76100 պետական ծառայողներ հեռացվել են աշխատանքից:

Թուրքիայի կրթության նախարար Իսմեթ Յըլմազը հայտարարել է, որ գյուլենականների հետ կապեր ունենալու կասկածանքով Թուրքիայում 27 հազարից ավելի կրթության, այդ թվում` 4225 ակադեմիական ոլորտի աշխատակիցներ հեռացվել են աշխատանքից, որոնց այլեւս արգելվել է աշխատել այդ ոլորտում:

Թուրքիայի ՆԳՆ ղեկավարը նշել է, որ ներկայում բերման է ենթարկվել 5171 մարդ, 16899 մարդ ձերբակալվել է: Ձերբակալվածներից 3083-ը ոստիկաններ են, 7248-ը` զինվորներ, 2288-ը` դատավորներ եւ դատախազներ: 3601 մարդ ազատ է արձակվել, իսկ 7173 մարդ գտնվում է հսկողության տակ, 75 հազար մարդու անձնագրերը չեղյալ են հայտարարվել:

Աֆղան Ալան նաեւ նշել է, որ 162 զինվորականներ, որոնցից 9-ը գեներալներ եւ 96-ը ոստիկաններ, գտնվում են որոնման մեջ: 

Հուլիսի 15-ի երեկոյան մի խումբ խռովարարներ Թուրքիայում ռազմական հեղաշրջման փորձ են ձեռնարկել: Խռովարարները իրենց հսկողության տակ են առել մի շարք ռազմավարական օբյեկտներ Անկարայում եւ Ստամբուլում, բայց մի քանի ժամ հետո խռովությունը ճնշվել է:

Վերջին տվյալների համաձայն` դիմակայության արդյունքում, որի կենտրոնը դարձել էին Ստամբուլը եւ Անկարան, զոհվել են 246 քաղաքացիներ` չհաշված 100-ից ավելի խռովարարներին, 2 հազարից ավելի մարդ էլ վիրավորվել է:

Թուրքական ԶԼՄ-ներն ավելի վաղ հայտնել են, որ հեղաշրջմանը մասնակից  Թուրքիայի զինված ուժերի հարյուրավոր զինծառայողներ փախել են Իրաք, որոնց մի մասը միացել է Քրդստանի աշխատավորական կուսակցության (PKK) զինյալներին: