Թուրքիան Հնդկաստանից պահանջել է փակել Գյուլենի դպրոցները

Հնդկաստանում Թուրքիայի գլխավոր հյուպատոս Էրդալ Սաբրի Էրգենը հայտարարել է, որ Անկարան Հնդկաստանի իշխանություններին կոչ է անում փակել երկրի տարածքում գործող հաստատությունները, որոնք կապված են չափավոր իսլամի քարոզիչ Ֆեթուլլահ Գյուլենի հետ, որին թուրքական իշխանությունները մեղադրում են հուլիսի 15-ին Թուրքիայում պետական հեղաշրջման փորձ կազմակերպելու մեջ: 

Ինչպես հաղորդում է «Արմենպրես»-ը, այս մասին հայտնում է «Անադոլու» լրատվական գործակալությունը:

«Ամեն բան, ինչ կապված է այդ ցանցի հետ, պետք է փակվի: Դրանք պետք է մանրազնին ստուգել: Դա չարիք սերմանող ապօրինի ցանց է: Այդ ցանցի հետ կապված հաստատություններ կան Մումբայում: Մեր դեսպանը տեղեկացրել է հնդկական իշխանություններին»,- լրագրողներին հայտարարել է թուրք հյուպատոսը:

«Մենք Հնդկաստանի կառավարությանը խնդրել ենք փակել Մումբայում եւ Մախարաշտիում այդ ցանցի հետ կապված բոլոր հաստատությունները», -հավելել է նա:

Օգոստոսի սկզբին Թուրքիայի ԱԳՆ ղեկավար Մեւլութ Չավուշօղլուն Իսլամաբադ կատարած այցի ընթացքում նման խնդրանք էր ներկայացրել նաեւ Պակիստանի իշխանություններին: 

Թուրք նախարարը Գյուլենի՝ արդի իսլամ քարոզող «Հիզմեթ Հարեքեթի» կազմակերպությունը «ահաբեկչական» է անվանել, որն ամբողջ աշխարհում, այդ թվում` մահմեդական երկրներում կրթական եւ մշակութային հաստատությունների մեծ ցանց ունի: 

«Նախկինում մենք պաշտպանել ենք նրանց, բայց մենք չենք իմացել, որ նրանք գաղտնի մտադրություն ունեն, որ նրանք ուզում են նման փորձերով գրավել իշխանությունը Թուրքիայում, ինչի առաջին փորձը եղել է 2013 թվականի դեկտեմբերին», -ասել է Չավուշօղլուն` նկատի ունենալով խոշոր կոռուպցիոն սկանդալը, որի ժամանակ բացահայտվել էր Թուրքիայում Էրդողանի որդու, դստեր, փեսայի եւ կառավարության 4 անդամների մասնակցությամբ մեծածավալ կոռուպցիոն գործողություններ:

Ի պատասխան Ղրղզստանում գյուլենական դպրոցները փակելու Չավուշօղլուի պահանջին՝ պաշտոնական Բիշքեկն Անկարային կոչ է արել չմիջամտել Ղրղզստանի ներքին գործերին: Ղրղզստանում ներկայում գործում են 16 ուսումնարաններ, երեք տարրական դպրոցներ, մեկ միջազգային դպրոց եւ մեկ խոշոր` «Աթաթուրք-Ալա-Թոո» համալսարան, որոնցում սովորում է 11 հազար դպրոցական եւ ուսանող, մոտ նույնքան շրջանավարտ են ունեցել այդ դպրոցները սկսած 1996 թվականից:

Անկարայի հորդորով գյուլենական կրթական հաստատությունները փակել են Սուդանը եւ Ադրբեջանը: Գյուլենական դպրոցները հրաժարվել են փակել Ղազախստանը եւ Կամբոջան: 

Հուլիսի 15-ի երեկոյան մի խումբ խռովարարներ Թուրքիայում ռազմական հեղաշրջման փորձ են ձեռնարկել: Խռովարարները իրենց հսկողության տակ են առել մի շարք ռազմավարական օբյեկտներ Անկարայում եւ Ստամբուլում, բայց մի քանի ժամ հետո խռովությունը ճնշվել է:  

  «Հիզմեթ Հարեքեթի» ազդեցիկ կրոնական կազմակերպության առաջնորդ  Ֆեթուլլահ Գյուլենի շարժումը, որը համարվում է նաեւ նուրսիստների (նուրչուլար) շարժում, արդի իսլամ քարոզող հզոր շարժում է: Գյուլենական շարժումը քարոզում է իսլամական չափավորություն, հանդուրժողականություն, միջկրոնական երկխոսություն, իսլամի եւ ժողովրդավարության համատեղելիություն:

Այժմ Էրդողանը փորձում է հասնել ԱՄՆ-ից Գյուլենի արտահանձնմանը, որտեղ նա բնակվում է 1998 թվականից: Գյուլենն, իր հերթին, դարձել է Էրդողանի առավել նշանակալի քննադատներից մեկը:

2014 թվականի դեկտեմբերին Ստամբուլի դատական իշխանությունները Գյուլենին ձերբակալելու հայտ են ներկայացրել` կապված Թուրքիայի գործող ղեկավարության եւ իշխող «Արդարութուն եւ զարգացում» կուսակցության դիրքերը խարխլելու համար ահաբեկչական կազմակերպություն ստեղծելու կասկածների հետ: