Հայ և արտասահմանցի գիտնականներն առաջ կքաշեն հայագիտության արդի խնդիրները

Գյումրիում սեպտեմբերի 23-25-ը տեղի կունենա «Շիրակի պատմամշակութային ժառանգությունը. հայագիտության արդի խնդիրներ» խորագրով 9-րդ միջազգային գիտաժողովը` նվիրված ՀՀ անկախության 25-ամյակին: Այն կանցկացվի ՀՀ ԳԱԱ Շիրակի հայագիտական հետազոտությունների կենտրոնի նախաւեռնությամբ:

 Ինչպես տեղեկացրեց կենտրոնի գիտքարտուղար Հասմիկ Հարությունյանը, գիտաժողովի աշխատանքները կազմակերպվելու են մի քանի ուղղություններով. ավանդական ազգագրություն եւ ազգահոգեբանություն, արվեստ եւ գրականություն, պատմություն,  հնագիտություն եւ մարդաբանություն,  բանահյուսություն եւ բանագիտություն:

«Գիտնականների շրջանում բավականին ակտիվություն է նկատվում: Եթե 2010 թվականին 51 հայտ էր ստացվել, ապա այս անգամ` 101: Հայտեր են ստացվել Լեհաստանից, Լիբանանից, Ռուսաստանից, Ուկրաինայից, Վրաստանից և այլն: Ներկայացված աշխատանքներն առնչվում են ամենատարբեր ուղղությունների` հնագիտությանը, պատմությանը, բանասիրությանը, գրականագիտոթյանը, արվեստաբանությանը և այլն: Հիմնական շեշտը Շիրակի պատմամշակութային արժեքներն են, սակայն ներկայացվում են հնագիտության արդի խնդիրները ևս»,-ասաց Հասմիկ Հարությունյանը: Նրա խոսքով՝ գիտաժողովը նպաստում է ոչ միայ ն նոր բացահայտումներին, այլև գիտնականների նոր կապերի հաստատմանը: Հասմիկ Հարությունյանը նկատեց, որ բավական ակտիվ են հնագետները:

Միջազգային գիտաժողովի շրջանակներում անցկացվելու են՝ «Հացի տոն» ազգագրական 4-րդ փառատոնը՝ Շիրակի եւ ՀՀ այլ մարզերի մասնակցությամբ, ինչպես նաև Շիրակի ժողովրդական երաժշտության համերգ՝ բանասացների մասնակցությամբ: Նախատեսված է Շիրակի հնավայրերի պեղածո նյութերի ցուցադրություն: