Կին, ով կարդում է. Տաթև Հովակիմյան

Wnews.am-ը շարունակում է հարցազրույցների շարքը, որոնց շրջանակում հայտնի կանանց հետ զրուցում ենք բացառապես գրքերի մասին։

Այս անգամ մեր զրուցակիցը դերասանուհի Տաթեւ Հովակիմյանն է։

-Հիշո՞ւմ եք Ձեր առաջին գիրքը:

-Ոչ մի կերպ չեմ կարողանում մտաբերել։Երևի նրանից է,որ միշտ սովորությունն եմ ունեցել միաժամանակ ունենալ մի քանի գիրք և կարդալ ըստ պահի տրամադրության։ Շատ հաճախ էլ, որ շուտ չվերջանա գիրքը, որովհետև գրքեր կան, որ չեմ ուզի երկրորդ անգամ կարդալ, հենց նրա համար, որ չափազանց լավն են, ինձ մոտ հակառակ ռեակիցիան է. շատերը սիրում եմ վերընթերցել գիրքը, իսկ ես շատ սիրելի գրքերը չեմ կարդա երկրորդ անգամ, բայց կդժվարանամ ասել՝ ինչու, երևի տպավորությունը չկոտրելու համար։

-Քանի՞ տարեկանում եք սկսել գրքեր կարդալ։

-Կարդալ սկսել եմ, երբ սովորել եմ կարդալ։Ինձ համար առհասարակ կարդալը, լինի փոքրիկ պատմվածք, թէ հաստափոր գիրք, մեծ իրադարձություն է միշտ ու դա  անում եմ  սրած մատիտով)))։

-Տարիքի հետ ինչպե՞ս են փոխվել գիրք կարդալու Ձեր ժանրային նախասիրությունները։

-Տարիքի հետ կապ չունի ժանրային փոփոխությունը, հիմա էլ մեծ սիրով կարող եմ հեքիաթներ կարդալ, որից հետո անցնեմ Գոգոլին կամ Քամյուին։

-Հեղինակներ, որոնց գրքերը հետևողական, իրար հաջորդելով կարդացել եք:

-Երևի թե Ալբերտ Քամյու,Գոգոլ,Կուբո Աբե,Թագոր …շատ կան։

-Գրքեր, որոնք կիսատ եք թողել և ո՞րն է պատճառը:

-Հաճախ կիսատ եմ թողնում արդեն ասացի, որ անցնեմ մյուսին, ու միաժանակ սկսում եմ կարդալ, դժվար բնավորություն է երևի, էդտեղ եմ շտապում, ուզում եմ հասցնել։Ֆիլմերն էլ եմ մեկ մեկ էդպես նայում, բայց նայած Ժանրային գիրք կամ ֆիլմ։ Օրինակ՝ Հերման Հեսսեյի «Տափաստանի Գայլը» շատ դժվար եմ կարդացել, որովհետև շատ լավն էր ու մոտ 3 ամիս կարդում էի շատ դանդաղ՝ զուգահեռ կարդալով այլ գործեր։

-Գրքի հերոսուհիներ, կերպարներ, որոնց մեջ Ձեզ տեսնում եք, նմանեցնում եք:

-Չեմ գտել դեռ, գուցե հերոսների հոգեվիճակները նմանեցրել եմ, գուցե մասնագիտությունից ելնելով, բայց մեկ կերպար ամբողջապես դեռ  չեմ գտել, երևի նրա համար, որ գրքերի հերոսները հենց կան գրքերի հերոսներ ու իրենք այդքան էլ շոշափելի չեն։

-Ձեր կարդացած սիրո պատմությունը, որին հավատում եք:

-Կարծում եմ հավատում ես մարդկանց, որոնք սիրում են կամ կարծում են թե սիրում են։Երևի բոլոր մարդկանց սերերն էլ եսասիրական բնույթ ունեն։ Ուղղակի որևէ սիրո պատմության հավատալու համար պետք է նախ իմանաս՝ որն է սերը. ես չգիտեմ Աննա Կարենինայի սերն էր ճիշտ,Կլեոպատրայինը, Ջուլետտինը, թե՞ Ջեյն Էյրինը։

-Գիրք, որի վերջաբանն այլ կերպ կգրեիք:

-Առհասարակ չեմ մտածել։ Ֆիլմերի դեպքում հեշտ է ասել՝ այ ես վերջը ուրիշ ձև կնկարեի, բայց գրքերը երևի հենց դրանով են հարուստ, որ դու ես կարդում ու ինքդ ես էդ պահին պատկերում քո կարդացած հերոսներին արտաքնապես, շարժ ու ձևով, դու ես որոշում՝ հեղինակի գրած վերջը ինչպես տեսնես։Գիրք կարդալը քո հոգեվիճակն է։Կինոն քեզ ցույց են տալիս, գիրքը դու ես քեզ համար նկարում։

-Գիրք, որը հիմնովին փոխել է Ձեր աշխարհայացքը։

-Բոլոր գրքերը, որ կարդացել եմ, կարդում եմ , պետք է կարդամ։

-Հիմա ի՞նչ գիրք եք ընթերցում:

-Հիմա ընթերցում եմ Дина Рубина «Синдром петрушки» գիրքը։

– Must read գրքեր Տաթեւ Հովակիմյանից։

-Երբեք չեմ կարող ասել, ըստ տրամադրության, մի օր կարթնանամ ու կվերցնեմ էն ինչ հոգեվիճակիս պետք  է կամ շատ հաճախ մասնագիտության մեջ այն, ինչ պետք է այդ պահին, որը կապված է խաղացվող դերի կամ գալիք դերի հետ։