Ուռուտի գյուղապետը մեղադրվում է պաշտոնեական կեղծիք կատարելու մեջ

Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում հարուցվել է քրեական գործ՝ Ուռուտի գյուղապետ Սերգո Ջուլհակյանի կողմից պաշտոնեական կեղծիք կատարելու դեպքի առթիվ:

Ինչպես տեղեկանում ենք Դատական տեղեկատվական համակարգից՝ Լոռու մարզի Ուռուտ համայնքի ղեկավար Սերգո Ջուլհակյանին մեղադրանք է առաջադրվել այն բանի համար, որ հանդիսանալով մշտապես կազմակերպական-տնօրինչական գործառույթներ իրականացնող պաշտոնատար անձ՝ պաշտոնեական կեղծիք է կատարել: Բացի այդ պաշտոնեական կեղծիք կատարելու մեջ է մեղադրվում նաեւ կազմակերպչական-տնօրինչական գործառույթներ իրականացնող եւ պաշտոնատար անձ հանդիսացող Սաթիկ Այվազյանին:

Երկուսն էլ մեղադրվում են Քրեական օրենսգրքի 314-րդ հոդվածի(պաշտոնեական կեղծիքը) հատկանիշներով: Այս հոդվածը ենթադրում է նվազագույն աշխատավարձի երեքհարյուրապատիկից հինգհարյուրապատիկի չափով տուգանքով, կամ առավելագույնը հինգ տարի ժամկետով ազատազրկում եւ որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկում՝ առավելագույնը երեք տարի ժամկետով:

Դատական գործին կցվել է Ստեփանավանի նոտարական գրասենյակից առգրավված 10 թերթից բաղկացած թիվ 150 ժառանգական գործը:

Վերջիններիս ստորագրությամբ ազատ են արձակել:

Նշենք, որ Սերգո Ջուլհակյանը Ուռուտի գյուղապետի պաշտոնն է զբացեղնում գրեթե քսան տարի՝ դեռեւս 1998թ-ից:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ,քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի`օրինական ուժի մեջ մտած դատավճռով:

Քրիստինա Տեր-Մաթեւոսյան