Երիտասարդական հավաքի մասնակիցները հյուրընկալվել են «ԱՅԲ» դպրոցում

«Հայաստան. ստեղծենք միասին» առաջին երիտասարդական հավաքի «Ինժեներիա և նոր տեխնոլոգիաներ» աշխատանքային խմբի անդամները հուլիսի 12-ին այցելեցին «ԱՅԲ» դպրոց: Այս մասին «Արմենպրես»-ին տեղեկացրին ՀՀ սփյուռքի նախարարության մամուլի և հասարակայնության հեÕ ¿ կապերի վարչությունից:

Երիտասարդներին ողջունեց «Այբ» դպրոցի տնօրեն, «ABBYY» ընկերության փոխնախագահ Արամ Փախչանյանը: Նա ներկայացրեց դպրոցի ծրագրերը, առաջիկա անելիքները: «Այբ» դպրոցի տնօրենը նշեց, որ շատ մեծ հույսեր է կապում երիտասարդների հետ: «Վերջապես մեկնարկել է շատ սպասված ծրագիրը և ժամանակն է գործի անցնելու, իրականացնելու ապագային,  Հայաստանի հզորացմանը միտված ծրագրերը»:

Հավաքի մասնակիցները հագեցած ու արդյունավետ օր անցկացրին դպրոցում, դասախոսություններ լսեցին, ինտերակտիվ քննարկումների մասնակցեցին, այցելեցին փորձարարական լաբորատորիա, որտեղ աշակերտներն իրականություն են դարձնում ամենաանհավանական, հետաքրքիր գաղափարները :

Հայաստանի ամերիկյան համալսարանի (ՀԱՀ) պրոֆեսոր, նույն համալսարանի Ճարտարագիտության բաժանմունքի դեկան Արամ Հաջյանը դասախոսությունը շարունակեց աշխույժ թիմային աշխատանքով: Իրենց մասին տեղեկությունների յուրօրինակ փոխանակումից, հարց ու պատասխանից հետո երիտասարդներն ավելի լավ ճանաչեցին իրար, ծավալվեց աշխույժ ու անբռնազբոս քննարկում-բանավեճ:

Իր մեկնարկային ծրագիրը տեսաշարով ներկայացրեց «Armdatalab»-ի հիմնադիր, Հայաստանի Ամերիկյան համալսարանի հրավիրյալ դասախոս Արթուր Խալաթյանը: Նա հանգամանորեն ծանոթացրեց ծրագրից օգտվելու կանոններին, ներկայացրեց ծրագրի հնարավորություններն ու նպատակը: Զեկուցողը նշեց, որ ծրագիրը նոր սերունդը կրթելու, գիտությունը զարգացման նոր հանգրվանի բերելու բացառիկ հնարավորություն է տալիս: «Հուսով եմ, մեկ տարի հետո, երբ դուք վերադառնաք ու նորից հանդիպենք, հպարտությամբ կպատմեք ձեր հաջողությունների մասին»:

«Տուրիզմ և ինֆորմացիոն տեխնոլոգիաներ» վերնագրով զեկուցում ներկայացրեց «Idea» հիմնադրամի տուրիզմի ծրագրերի ղեկավար Արմինե Իսրաելյանը:

Հետաքրքիր տեսանյութեր ու թարմ գաղափարներ ներկայացրեց «Trianda Studio»-ի հիմնադիր Արա Աղամյանը:

Հետաքրքիր ծրագրերով հանդես եկավ նաև «Kolba  Lab-UNDP»-ի ներկայացուցիչ Մարինա Մխիթարյանը: