Հայտնի է օպերային թատրոնի 83–րդ թատերաշրջանի մեկնարկային բեմադրությունը

Ալ.Սպենդիարյանի անվան օպերայի և բալետի ազգային ակադեմիական թատրոնի 83–րդ թատերաշրջանը կմեկնարկի սեպտեմբերի 1-ին Շուշիում՝ «Սասունցի Դավիթ» օպերայի պրեմիերայով: Երևանում օպերայի պրեմիերան կկայանա սեպտեմբերի 7-ին կամ 8-ին՝ Երևանում՝ Ալեքսանդր Սպենդիարյանի անվան օպերայի և բալետի ազգային ակադեմիական թատրոնում: «Արմենպրես»-ի տեղեկացմամբ՝ այդ մասին հայտնեց Ալ.Սպենդիարյանիանվան օպերայի և բալետի ազգայինակադեմիական թատրոնի տնօրենԱնդրանիկ Արզումանյանը: «Սասունցի Դավիթ» օպերայի հեղինակը կոմպոզիտոր Հարո Ստեփանյանն է. մինչ այդ այն երբևէ չի բեմադրվել: Բացի այդ՝ մինչև տարեվերջ տեղի կունենան «Տոսկա» օպերայի և «Դիմակահանդես» բալետի պրեմիերաները:

Օպերային թատրոնի տնօրենը ցավով նշեց, որ տարեցտարի հանդիսատեսը պակասում է, սակայն այդ իրավիճակը բնորոշ է Հայաստանի բոլոր թատրոններին: Այնուամենայնիվ, նա ընդգծեց, որ հանդիսատեսի մեջ գերակշռում են երիտասարդները:

«Անցած տարի օպերային բազայի հիման վրա ստեղծվել է երիտասարդական ծրագիր, որի շրջանակում համագործակցում են Երևանի Կոմիտասի անվան պետական կոնսերվատորիայի հետ»,- նշեց օպերայի տնօրենը: 

Ծրագիրը հնարավորություն է տալիս ավելի լավ  ճանաչել լավագույն երիտասարդ երգիչներին, ովքեր իրենց հերթին կարող են ավելի մոտիկից ծանոթանալ թատրոնին և  հետագայում աշխատել այնտեղ: «Այս ծրագրի շրջանակում այս տարի կամ 2017 թ. մենք կներկայացնենք «Եվգենի Օնեգին» օպերան»,- հավելեց Արզումանյանը:

Ամփոփելով օպերային թատրոնի 82-րդ թատերաշրջանը՝ Արզումանյանն ասաց, որ այն, ինչ թատրոնը նախատեսում էր իրականացնել 2015-2016 թթ., իրականացվել է գրեթե 80-90%, այդ թվում՝ «Նորմա» և «Կարմեն» օպերաների պրեմիերաները: