Հայաստանում ԵՄ դեսպանի կարծիքով` հայերի գենետիկ կոդում ամրագրված է ձեռնարկատիրական ջիղը

Հայաստանը հայտնի է իր առևտրական, գործարար ոճով, հայերի գենետիկ կոդում ամրագրված է ձեռնարկատիրական ջիղը, որի իրացման համար պետք է տարածք ու բարենպաստ օրենսդրություն ստեղծել: «Արմենպրես»-ի փոխանցմամբ` հուլիսի 7-ին «Բիզնեսի հեռանկարները, խոչընդոտներն ու հնարավորությունները Հայաստանում» համաժողովի ժամանակ հայտարարեց Հայաստանում ԵՄ պատվիրակության ղեկավար, դեսպան Պյոտր Սվիտ ալսկին: Նա իր երախտագիտությունը հայտնեց ՀՀ վարչապետին նշյալ ֆորումին մասնակցության համար` նշելով, որ նրա ներկայությունը խորհրդանշում է լավ գործարար միջավայր ստեղծելու կառավարության կողմից ներդրվող ջանքերը:«Մեզ բոլորիս միավորում է մեկ ընդհանուր նպատակ` ավելի շատ եվրոպական գործընկերներ ունենալ, ովքեր Հայաստանում առևտուր ու ներդրումներ կանեն: Գալիք ամիսներին կկարողանանք բիզնես համայնքի ու Եվրոպական բիզնես ասոցիացիայի համագործակցությամբ նոր էջ բացել»,-ասաց Սվիտալսկին:

Խոսելով համաշխարհային տնտեսության առջև ծառացած խնդիրներից` ԵՄ դեսպանը նկատեց, որ տնտեսական աճ ապահովելու հարցը շատ երկրներում, այդ թվում` ԵԱՏՄ և ԵՄ անդամ-պետություններում, մարտահրավեր է: «Հուսով եմ, որ մենք կկարողանանք օգտվել Հայաստանի հավելյալ արժեքից. Հայաստանը բնականորեն կամրջող երկիր է, հայերը գիտեն ինչպես կամուրջներ կառուցել այլ մշակույթների, հեռավոր տարածքների հետ»,-նշեց եվրոպացի պատվիրակը:

Սվիտալսկին ընդգծեց նաև, որ Հայաստանի ու Եվրամիության համագործակցության տեսանկյունից ներկայում կարևոր շրջափուլ է: «Եվրոպացի գործարարների համար Հայաստանի միջավայրը շատ բարենպաստ է, մենք գնահատում ենք այդ ջանքերը, հիմա մնում է այդ միջավայրը վերածել ներդրումների ու առևտրական հարաբերությունների»,-եզրափակեց Պյոտր Սվիտալսկին: